ۇلىتاۋعا ادال ازامات

ول كىسىنىڭ وتانىن, ونىڭ ىشىندە تۋعان جەرىن سونشالىقتى سۇيەتىنىن ءبىزدىڭ « ۇلىتاۋ» قورىق-مۇراجايىنا قىزمەتكە كەلگەن سوڭ-اق جاقىنىراق بىلە باستادىق. جۇمىسىن 2009 جىلى ديرەكتوردىڭ ورىنباسارى بولىپ باستاعان اعامىز ءسال ۋاقىت وزا ديرەكتورلىققا تاعايىندالىپ, وسى قىزمەتتى 2021 جىلدىڭ جارتىسىنا دەيىن اتقاردى. سول ارالىقتا مۇراجاي قىزمەتكەرلەرىنە تاعىلىم الار كوپ نارسە ۇيرەتتى. «ۇستازدان شاكىرت وزار» دەمەكشى, ول كىسىنىڭ تاربيەسىن كورگەن تالاي جاس بۇگىندە ءتۇرلى لاۋازىمدى قىزمەتتەردە ەڭبەك ەتىپ ءجۇر.

شىنى كەرەك, العاشىندا بۇل كىسىنى اسپانداعى ايعا ۇمتىلعان قيالشىل ازامات رەتىندە قابىلدادىق, بىراق جوسپارلارىن بىردەن ىسكە اسىرىپ, ءبىزدى ءبىراز تاڭعالدىردى. ماسەلەن, 1991 جىلى تۇيە كەرۋەنىمەن ۇلى جىبەك جولىنىڭ بويىمەن ءجۇرىپ وتكەن «وتىرار – ۇلىتاۋ» جانە 1999-2005 جىلدارداعى ۇلى ەۋرازيا دالاسىمەن ماجارستانعا دەيىنگى «التاي – دۋناي» ەكسپەديتسيالارى وسى ءسوزىمىزدىڭ ايقىن ايعاعى. ءسويتىپ, اتالعان ەكى ەكسپەديتسيانىڭ ناتيجەسىندە ۇلىتاۋ ءبىراز شەت مەملەكەتكە تانىلىپ, ماقسات ۇدەسىنەن شىققان بولاتىن. جالپى, باكەڭ بەس جىلدا التى باعىتتا « ۇلىلىققا تاعزىم» ەكسپەديتسياسىن ۇيىمداستىرىپ, قىزمەتكەرلەرىنە ۇلكەن مۇمكىندىك جاساعان ەدى.

ەكسپەديتسيا مۇشەلەرى ءىسساپارلارى بارىسىندا ۇلىتاۋ تاريحى جايلى جىلجىمالى فوتوكورمەلەر وتكىزىپ, ماقالالار ۇيىمداستىردى جانە تەلەارنالارعا سۇحباتتار بەردى. سونىمەن قاتار دامىعان تۋريزم ورتالىقتارىمەن, تاريحي ورىندارمەن, مۇراجايلىق ارىپتەستەرىمەن تانىسىپ, ءىس-تاجىريبە الماسىپ, جادىگەرلەر جيناقتاپ, كوپتەگەن يگىلىكتى ءىس اتقاردى. ال جارعاق قۇلاعى جاستىققا تيمەي ەڭبەك ەتىپ جۇرگەن اعامىز بۇگىندە اسقارالى 60 جاستىڭ بەلەسىنە دە كوتەرىلىپ قالىپتى. ول كىسىنى وسى مەرەيلى جاسىمەن قۇتتىقتاي وتىرىپ, ارمان-ماقساتتارىڭىزعا جەتە بەرىڭىز, عۇمىرلى بولىڭىز دەگەن تىلەك قوسامىز.

بايان شايگوزوۆا,

« ۇلىتاۋ» قورىق-مۇراجايىنىڭ باس قور ساقتاۋشىسى

قاراعاندى وبلىسى