كەلەسى جىلى قازاقستاندا گاز ەكسپورتى توقتاپ قالۋى مۇمكىن. بۇل تۋرالى ماجىلىستەگى ۇكىمەت ساعاتىندا QazaqGaz ۇك اق باسقارما توراعاسى سانجار جاركەشوۆ ءمالىم ەتتى, دەپ حابارلايدى Egemen.kz.
«2024 جىلى گاز سالاسى داعدارىسقا تاپ بولۋى مۇمكىن. ەگەر تۇتىنۋشىلاردىڭ بارلىق ءوتىنىمىن ورىنداساق, وندا بۇل داعدارىس 2023 جىلى بايقالادى. بىرىنشىدەن, تاۋارلى گازدىڭ تاپشىلىعى 2024 جىلى باستالادى. ىشكى نارىققا قاجەت كولەم قولدا بار رەسۋرستاردان اسىپ تۇسەدى. ەگەر شۇعىل شارالار قابىلدانباسا, گاز ەكسپورتى 2023 جىلى توقتاپ قالۋى ىقتيمال», دەدى س. جاركەشەۆ.
وسى ورايدا ول ىشكى باعانى سۋبسيديالاۋ باعىتىندا ەكسپورت باستى تابىس كوزى بولعانىن ەسكە سالدى.
«ىشكى نارىقتا جاڭا ءىرى تۇتىنۋشىلار پايدا بولدى. ولاردىڭ اراسىندا جىلۋ ەلەكتر ورتالىقتارىن گاز جاعۋعا اۋىستىرۋ جوبالارى, جاڭا وندىرىستەردى گازعا قوسۋ, سونداي-اق ءىرى كوممەرتسيالىق تۇتىنۋشىلاردىڭ جۇيەگە قوسىلۋى بار», دەدى باسقارما توراعاسى.
س. جاركەشەۆ ماجىلىستەگى ۇكىمەت ساعاتىنان كەيىن تىلشىلەرگە گاز ەكسپورتىنىڭ شارتتارى تۋرالى ايتتى.
«جىل سايىن بىزدە قىتايمەن 10 ملرد-قا دەيىن ەكسپورتتىق كەلىسىم بار. الايدا بۇل كولەمدى ورىنداي الماي وتىرمىز. سەبەبى ەكسپورتقا تيەسىلى گاز ەلىمىزدىڭ ىشكى نارىعىنا باعىتتالىپ جاتىر. ەلىمىزدە ىشكى نارىقتى قامتاماسىز ەتۋگە باسىمدىق قويىلعان», دەدى ول.