13 مامىردا ءۇندىستان بيداي ەكسپورتىنا تىيىم سالدى, دەپ حابارلايدى Egemen.kz BBC.com-عا سىلتەمە جاساپ.
بيداي ەكسپورتىنا شەكتەۋ ىستىق اۋا رايىنىڭ بيداي ەگىنىنە اسەر ەتۋىنە بايلانىستى جاسالعان. ءۇندىستان ءىرى بيداي ەكسپورتتاۋشى بولماسا دا, بۇل قادام الەمدىك نارىقتى الاڭداتىپ وتىر. ءۇندىستاننىڭ ساۋدا ءمينيسترى پيۋش گويالدىڭ ايتۋىنشا, ەكسپورتقا تىيىم سالۋ الەمدىك نارىققا اسەر ەتپەۋ كەرەك. ويتكەنى ءۇندىستان بيدايدىڭ نەگىزگى ەكسپورتتاۋشىسى ەمەس.
اتالعان ەلدە بيدايدىڭ كەيبىر تۇرلەرىنىڭ باعاسى بىرنەشە كۇن بويى كوتەرىلىپ, 17-18 مامىردا شارىقتاۋ شەگىنە جەتكەن.
«ۇندىستانداعى شەكتەۋ باعانىڭ ودان ءارى وسۋىنە اكەلدى. ويتكەنى جاھاندىق ساتىپ الۋشىلار قارا تەڭىز ايماعىنان ەكسپورت تومەندەگەننەن كەيىن ۇندىستانعا تاۋەلدى بولدى», دەدى Gro Intelligence اۋىلشارۋاشىلىق دەرەكتەرىن زەرتتەۋ توبىنىڭ قىزمەتكەرى كەللي گوفاري.
ءۇندىستان بيداي ءوندىرۋ بويىنشا دۇنيەجۇزىندە ەكىنشى ورىندا. شەكتەۋ جاريالانعانعا دەيىن اتالعان ەل ەكسپورتتى ۇلعايتۋدى كوزدەپ, بيىل رەكوردتىق دەڭگەيدە 10 ميلليون توننا بيداي جونەلتتى. بۇل كورسەتكىش بىلتىرعىمەن سالىستىرعاندا 2 ميلليون تونناعا كوپ.
گۇلدانا ەلۋباي