اقپارات جانە قوعامدىق دامۋ مينيسترلىگىنىڭ تاپسىرىسى بويىنشا ازاماتتىق باستامالاردى قولداۋ ورتالىعى «Zhas Project» جوباسىن ىسكە اسىرۋ ماقساتىندا قازاقستاندىق ۇەۇ-دان وتىنىمدەردى قابىلداۋدى باستادى, دەپ حابارلايدى Egemen.kz اقدم ءباسپاسوز قىزمەتىنە سىلتەمە جاساپ.
بۇل جوبا الماتى, قاراعاندى, ماڭعىستاۋ, تۇركىستان وبلىستارىندا پيلوتتىق رەجيمدە, ۇكىمەتتىڭ 2022 جىلعا ارنالعان ءىس-قيمىل باعدارلاماسى اياسىندا ىسكە اسىرىلادى.
«Zhas Project» الەۋمەتتىك جاعىنان وسال توپتارداعى, اسىرەسە اۋىلدىق جەرلەردە تۇراتىن جاستاردى ءوز ەلدى مەكەندەرىن الەۋمەتتىك-ەكونوميكالىق تۇرعىدا دامىتۋعا, ءونىمدى جۇمىسپەن قامتۋعا تارتۋ, سونداي-اق جاستاردىڭ بيزنەس-يدەيالارىن جەرگىلىكتى جەرلەردە قولداۋعا باعىتتالعان.
ابقو باسقارما توراعاسىنىڭ ورىنباسارى جاسۇلان بيسەمبيەۆتىڭ ايتۋىنشا, جوبا وڭىرلەرگە قاتىستى 4 لوتقا بولىنگەن. جوبانى ىسكە اسىرۋدىڭ ءبىرىنشى كەزەڭىندە بەلگىلى ءبىر وڭىردە جوبانى جۇزەگە اسىراتىن ۇەۇ تاڭدالماق. تاۋەلسىز كونكۋرستىق كوميسسيا ۇەۇ-نىڭ وتىنىمدەرىن قاراۋ كەزىندە الماتى, قاراعاندى, ماڭعىستاۋ, تۇركىستان وبلىستارىندا الەۋمەتتىك جوبالاردى ىسكە اسىرۋ تاجىريبەسىن ەسكەرەدى.
ەكىنشى كەزەڭدە گرانتقا يە بولعان ۇەۇ قوعام بەلسەندىلەرىنەن, سالالىق ساراپشىلار مەن كاسىپكەرلەردەن تۇراتىن وڭىرلىك كوميسسيالاردى قۇرادى. اتالعان وڭىرلەردىڭ ارقايسىسىندا بەلگىلى ءبىر جوبانى قارجىلاندىرۋعا 1 ميلليون تەڭگەنى قۇرايتىن 63 شاعىن گرانت بولىنبەك. ءار جوبا الدىمەن ساراپتامادان وتەدى. وڭىرلىك كوميسسيانىڭ باقىلاۋىمەن ءار جوبانىڭ تيىمدىلىگى ارنايى مونيتورينگ بارىسىندا انىقتالادى دەپ كۇتىلۋدە.
ايتا كەتەيىك, جوبانىڭ ماڭىزدى كەزەڭى «Zhas Project» قورىتىندىلارىن شىعارۋ مەن شاراعا قاتىسۋشىلاردىڭ فورۋمىن وتكىزۋ بولادى.
ۇەۇ-دان وتىنىمدەردى قابىلداۋ 2022 جىلعى 17 ماۋسىمدا ساعات 18:30-دا اياقتالادى.