اقتوبە وبلىسىندا 517 سايلاۋ ۋچاسكەسى بولسا, وڭىردە داۋىس بەرۋ قۇقىعى بار 560 مىڭ ادام تىركەلگەن. ەل كونستيتۋتسياسىنا ەنگىزىلەتىن وزگەرىستەر بويىنشا وتكىزىلىپ جاتقان جالپىحالىقتىق رەفەرەندۋمدا اقتوبەلىكتەر بەلسەندىلىك تانىتۋدا, دەپ حابارلايدى Egemen.kz.
سايلاۋ ۋچاسكەلەرىنە كەلگەندەردىڭ سانى جاعىنان اقتوبە قالاسى كوش باستاپ تۇر. بۇگىندە وبلىس ورتالىعىندا 162 سايلاۋ ۋچاسكەسى تىركەلگەن.
اقتوبە قالاسىنداعى 11 ىقشاماۋداندا ورنالاسقان №110 ۋچاسكەلىك سايلاۋ كوميسسياسى تاڭعى ساعات 7.00-دەن باستاپ جۇمىسىن باستادى. وسى ۋچاسكەدە 1920 ادام تىركەلگەن. تاڭەرتەڭگىلىك ساعات 09.30-عا دەيىن 327 تۇرعىن داۋىس بەرىپ كەتتى. بايقاعانىمىز, وسى اۋماقتا زەينەتكەرلەر مەن ورتا جاستاعى تۇرعىندار وتە بەلسەندىلىك تانىتىپ جاتىر. №110 ۋچاسكەلىك سايلاۋ كوميسسياسىنىڭ توراعاسى ساۋلە مىرزاعۇلوۆانىڭ ايتۋىنشا, سايلاۋ كوميسسياسى جۇمىسىن باستالاردان ەكى كۇن بۇرىن سايلاۋشىلار رەفەرەندۋم تۋرالى كوميسسيا مۇشەلەرىنەن سۇراپ كەتىپتى.
وسى ۋچاسكەدە ءتورت بايقاۋشى وتىر. سولاردىڭ ءبىرى اقتوبە وبلىسى اۋلا كلۋبتارى بىرلەستىگىنىڭ جەتەكشىسى – ايگۇل ورازباعانبەتوۆا. باقىلاۋشى سايلاۋ ۋچاسكەسىنىڭ تاڭعى ساعات 7.00-دە اشىلعانىن, ەڭ الدىمەن ءبىر ايەل ادام كەلىپ داۋىس بەرىپ كەتكەنىن ايتادى. تۇسكە تامان ادام قاراسى كوبەيگەن. بايقاۋشىلار وسى كەزگە دەيىن ەشقانداي زاڭ بۇزۋشىلىقتىڭ بايقالماعانىن, بارلىعى دا ءوز رەتىمەن ءوتىپ جاتقانىن حابارلادى.