پرەزيدەنت قاسىم-جومارت توقاەۆتىڭ قازاقستان حالقىنا ۇندەۋىنىڭ تولىق ءماتىنى جاريالاندى, دەپ حابارلايدى Egemen.kz.
قۇرمەتتى وتانداستار!
قازاقستان وتە ماڭىزدى ءارى بەتبۇرىستى كەزەڭگە قادام باسقالى تۇر. 5 ماۋسىم كۇنى ازاماتتارىمىز جالپىۇلتتىق رەفەرەندۋمدا داۋىس بەرەدى. كونستيتۋتسياعا تۇزەتۋلەر ەنگىزۋ ماسەلەسى بويىنشا شەشىم قابىلدايدى. بۇل – مەملەكەتتىڭ جانە بۇكىل قوعامنىڭ بولاشاعىن ايقىندايتىن جاۋاپتى ءسات. ەل تاعدىرى ەشكىمدى بەي-جاي قالدىرمايتىنى انىق.
ءبىز قازىر بارلىق سالانى جاڭعىرتۋعا كىرىستىك. وسى جولدا مەملەكەتتى باسقارۋ ۇلگىسىن تۇبەگەيلى وزگەرتۋ قاجەتتىگى تۋىندادى. سول سەبەپتى مەن ناۋرىز ايىنداعى جولداۋىمدا ساياسي جاڭعىرۋدىڭ اۋقىمدى باعدارلاماسىن ۇسىندىم. ونىڭ باستى ماقساتى – ەلىمىزدى ودان ءارى دەموكراتيالاندىرۋ, حالىقتىڭ مەملەكەتتى باسقارۋ ىسىنە قاتىسۋ مۇمكىندىگىن كەڭەيتۋ. سونداي-اق ۇكىمەتتىڭ تيىمدىلىگىن ارتتىرۋ. بۇل وزگەرىستى تولىق جۇزەگە اسىرساق, ىقپالدى پارلامەنتى بار پرەزيدەنتتىك رەسپۋبليكا ۇلگىسىنە ءبىرجولا كوشەمىز.
كونستيتۋتسيالىق رەفورما ادام قۇقىقتارى مەن بوستاندىقتارىن قورعاۋ جۇيەسىن بارىنشا كۇشەيتەدى. سونىمەن بىرگە ەلىمىزدەگى ساياسي باسەكەنىڭ ءادىل جانە اشىق بولۋىن قامتاماسىز ەتەدى.
ءبىز اتا زاڭىمىزدىڭ وتىزدان استام بابىنا وزگەرىس ەنگىزگەلى وتىرمىز. ونىڭ ءبارى ازاماتتارىمىزدىڭ مۇددەسىنە تولىق ساي كەلەدى. وسىلايشا مەملەكەتىمىزدى تۇبەگەيلى جاڭعىرتامىز. سول ارقىلى ەكىنشى رەسپۋبليكانىڭ نەگىزىن قالايمىز.
قۇرمەتتى وتانداستار!
ەلىمىزدىڭ تاريحىندا كونستيتۋتسياعا ەنگىزىلەتىن وزگەرىستەر العاش رەت جالپىحالىقتىق رەفەرەندۋم ارقىلى جۇزەگە اسىرىلادى.
رەفەرەندۋم وتكىزۋ – قازاقستاندا دامىعان دەموكراتيالىق قوعام قۇرۋ جولىنداعى ماڭىزدى قادام.
اتا زاڭعا ەنگىزىلەتىن تۇزەتۋلەر جوباسى ەلىمىزدە ءبىر اي بويى قىزۋ تالقىلاندى. ءتۇسىندىرۋ جۇمىستارى جۇرگىزىلدى. قوعامدا كونستيتۋتسيالىق رەفورماعا قاتىستى پىكىرلەر كوپ ايتىلىپ جاتىر. ونىڭ ەرەجەلەرى پرەزيدەنتتىڭ ارتىقشىلىقتارى مەن وكىلەتتىگىن كۇشەيتۋگە ەمەس, بيلىك تارماقتارى اراسىنداعى ۇيلەسىمدى جانە تەپە-تەڭدىك جۇيەنى نىعايتۋعا, بارلىق ازاماتتىڭ مۇددەسىن, قۇقىعى مەن ەركىندىگىن قورعاۋعا باعىتتالعان.
بۇكىل حالىقتىڭ كونستيتۋتسياعا ەنگىزىلەتىن وزگەرىستەرگە قاتىستى ەرىكتى تاڭداۋى جاڭا, ادىلەتتى قازاقستاننىڭ بەرىك ىرگەتاسىن قالايدى. ءبىز بىرلەسە وتىرىپ, شىن مانىندە, جاڭا قازاقستان قۇرامىز. وندا الەۋمەتتىك ادىلدىك جاڭا قوعامدىق كەلىسىمنىڭ باستى قۇندىلىعى جانە نەگىزگى وزەگى بولادى.
رەفەرەندۋم قوعامىمىزدىڭ ازاماتتىق كەمەلدىگى مەن ساياسي سانالىلىعىن باعالاۋعا مۇمكىندىك بەرەدى. رەفەرەندۋمنىڭ ورتالىق كوميسسياسى مەن باسقا دا ۋاكىلەتتى مەملەكەتتىك ورگاندار سايلاۋ زاڭناماسىنداعى بارلىق نورمانىڭ مۇلتىكسىز ساقتالۋىن قامتاماسىز ەتەدى. داۋىس بەرۋ بارىسىن حالىقارالىق باقىلاۋشىلار مەن ەلىمىزدەگى قوعامدىق بىرلەستىكتەردىڭ وكىلدەرى قاداعالايدى.
سايلاۋ ۋچاسكەسىندەگى ءسىزدىڭ داۋىسىڭىز قوعامدىق ءومىردىڭ ءادىل ءارى تۇسىنىكتى جاڭا ەرەجەلەرىن ايقىنداۋدا ماڭىزدى جانە شەشۋشى ءرول اتقارۋى مۇمكىن. ءسىز سايلاۋ ۋچاسكەسىنە كەلۋ ارقىلى حالقىمىزدىڭ بىرلىگى مەن ىنتىماعى مىعىم ەكەنىن كورسەتەسىز.
بۇرىن-سوڭدى بولماعان قۇبىلمالى گەوستراتەگيالىق جاعدايدا جانە ەلىمىزدىڭ الدىندا تۇرعان كۇردەلى مىندەتتەردى ورىنداۋ ءۇشىن ءبىزدىڭ بىرلىگىمىز بەكەم, ىنتىماعىمىز بەرىك بولۋعا ءتيىس. شىنايى دەموكراتيا ءاربىر ازاماتتىڭ ورتاق ىسكە بەلسەندى ءارى سانالى تۇردە قاتىسۋىن بىلدىرەدى. ءسىز جاڭا تۇزەتۋلەرگە داۋىس بەرە وتىرىپ, جەمقورلىققا, تامىر-تانىستىققا, ساياسات پەن ەكونوميكاداعى مونوپولياعا باتىل قارسى شىعاسىز.
قۇرمەتتى وتانداستار, سىزدەردى تاريحي تاڭداۋ جاساۋعا شاقىرامىن. ويتكەنى, بۇل قازاقستاننىڭ دامۋ باعدارىن ايقىندايدى. ارقايسىڭىز ءبىرتۇتاس قازاقستان حالقىنىڭ اجىراماس بولشەگىسىز جانە تۇتاس ۇلتتىڭ بولاشاعىنا ىقپال ەتە الاسىز. دەمەك, بۇل – ءوز تاعدىرىڭىز دەگەن ءسوز. وتانىمىزدىڭ تاعدىرى سىزدەرگە بايلانىستى.
الداعى رەفەرەندۋم مەملەكەتىمىزدى نىعايتۋعا جانە قوعامدى تىڭ سەرپىنمەن دامىتۋعا جول اشادى. مەن ءاربىر ازاماتىمىزدى ەل تاعدىرىن ايقىندايتىن تاريحي تاڭداۋ جاساۋعا شاقىرامىن. بۇل رەفەرەندۋمدا ءار ازاماتتىڭ داۋىسى – ماڭىزدى. ءاربىر ازامات تۇتاس ۇلتتىڭ تاعدىرىنا, ياعني تىكەلەي ءوز تاعدىرىنا وڭ ىقپال ەتە الادى.
ەندەشە, 5 ماۋسىم كۇنى ءوز تاڭداۋىمىزدى جاسايىق!
جاڭا قازاقستاندى ءبارىمىز بىرگە قۇرايىق!