بالالارعا باۋىرمال باس قالا

نۇر-سۇلتان قالاسىنىڭ اكىمى التاي كولگىنوۆ باس شاھاردا بالالاردىڭ شى­عارماشىلىعى مەن ءبىلىمىن دامىتۋعا ار­نالعان بىرنەشە ورتالىق اشىلعانىن ءمالىم ەتتى.

– حالىقارالىق بالالاردى قورعاۋ كۇنى ونەر-ءبىلىم, تانىمدىق جانە وقۋ ورتا­­لىقتارى, اۋلالار اشىلدى. سونداي-اق ەلوردانىڭ بارلىق اۋدانىندا فەس­تيۆالدار, سپورتتىق جارىستار مەن كون­تسەرتتەر ءوتتى. ماسەلەن, ء«بىلىم-پارك» ونەر-ءبىلىم ورتالىعى اشىلدى. ون­دا بالالار روبوتتەحنيكامەن, كەمە ۇلگى­لەۋمەن, اۆيامودەلدەۋمەن, ۆيدەوگرافيكامەن اينالىسا الادى. سول سياقتى بوكس­پەن شۇعىلدانىپ, دومبىرا شەرتۋ مەن شاحمات ويناۋدى ۇيرەنەدى. ء«بىلىم-پاركتەگى» ساباقتار تەگىن. بالالار وعان وقۋشىلار سارايىنىڭ سايتى ارقىلى جازىلا الادى, – دەدى ا.كولگىنوۆ.

سونىمەن قاتار قالا باسشىسى وقۋ­شىلار سارايىنىڭ بوس تۇرعان ورىندارىن پايدالانا وتىرىپ, قىزمەتى ايتار­لىقتاي كەڭەيتىلگەنىن اتاپ ءوتتى.

– وندا SANA كرەاتيۆتى ءبىلىم بەرۋ ورتالىعى مەن TANYM كرەاتيۆتى تەح­نو­­لوگيالار ورتالىعى اشىلدى. بۇل ورتالىقتاردا بالالارعا باعدار­لامالاۋ جانە كومپيۋتەرلىك گرافيكا دارىستەرى وتەدى. ال ويىن بارىسىن­دا بالالار قاجەتتى ءبىلىم مەن داعدىلاردى, اسىرەسە روبوتتاردى باعدارلامالاۋدى, لوگيكالىق ويلاۋدى ۇيرەنەدى. ال ساباقتارى تەگىن وتكىزىلەدى. كەزدەسۋ سوڭىندا تۇلەكتەرىمىزبەن, سونداي-اق حالىقارالىق جانە رەس­پۋب­ليكالىق وليم­پيادالاردىڭ جەڭىم­پازدارىمەن اڭگىمە وربىتتىك. كومان­دامىز جىل سا­يىن رەسپۋبليكالىق وليمپيادالاردا «ۇزدىك وليمپيادالىق كوماندا» اتاعىنا يە بولىپ كەلەدى. بيىل ءبىزدىڭ كوماندا رەكورد ورناتىپ, 93 جۇلدەلى ورىنعا يە بولدى. مۇنىڭ ءبارى – ۇستازداردىڭ, مەكتەپ وقۋشىلارىنىڭ جانە ولاردىڭ اتا-انالارىنىڭ تىنىمسىز ەڭبەگىنىڭ جەمىسى. مەملەكەت باسشىسى وسى جىلدى بالالار جىلى دەپ جاريالادى. وسكەلەڭ ۇرپاققا جاعداي جاساۋ بويىنشا ءتيىستى جۇمىستار جۇيەلى ءجۇرىپ جاتىر: مەكتەپتەر سالامىز, ۇستازداردىڭ جالاقىسىن ارتتىرامىز, تانىمدىق جانە وقۋ ورتالىقتارىنىڭ جەلىسىن كەڭەيتەمىز, – دەدى ەلوردا اكىمى.

مەرەكە كۇنى تاڭەرتەڭ قالاداعى اۋرۋحا­نالاردىڭ اكۋشەرلىك بلوكتا­رىنىڭ بارىندە جاڭا تۋعان نارەستەلەرگە ارنال­عان ءىس-شارالار ۇيىمداستىرىلدى. نۇر-سۇلتان قالاسى قوعامدىق دەن­ساۋلىق ساقتاۋ باسقارماسىنىڭ باسشىسى تيمۋر مۇراتوۆ قالا باسشىلىعىنىڭ اتىنان باقىتتى انالاردى قوس مەرەكەمەن قۇتتىقتاپ, ەلوردا اكىمى التاي كولگىنوۆتىڭ العىسحاتىن تابىستادى.

– بۇگىن سىزدەر ءۇشىن ەكى بىردەي مەرەكە. دۇنيەگە ۇل-قىزداردى اكەلىپ وتىرسىزدار. ءومىر ەسىگىن ەندى اشقان سابيلەرىڭىز ەلىمىزدىڭ ابىرويلى, بەتكە ۇستار ازاماتتارى بولسىن. تەك ءبىر اۋلەتتىڭ عانا ەمەس, بارشا قازاق ەلىنىڭ ماقتانىشى بولىپ ءوسسىن. بولاشاقتارى جارقىن بولسىن, – دەپ قۇتتىقتادى باسقارما باسشىسى.

قالالىق ەمحانالاردا اشىق ەسىك كۇندەرى انيماتورلاردىڭ قاتىسۋى­مەن مەرەكەلىك باعدارلامالارعا ۇلاستى. بۇلدىرشىندەردىڭ اسىر سالىپ, اسى­عا كۇتەتىن مەرەيلى مەرەكەسى ەلوردا­نىڭ 4 اۋ­­­دانىندا دا جوعارى دەڭگەيدە ۇيىم­داستىرىلىپ, كىشكەنتاي تۇرعىن­داردى قۋانىش پەن شاتتىققا بولەدى.

ەسىل اۋدانىندا ورنالاسقان جەتىسۋ ساياباعىندا ب.سوقپاقباەۆتىڭ «مەنىڭ اتىم قوجا» شىعارماسى نەگىزىندە سالىنعان ەسكەرتكىشتىڭ اشىلۋى كوپتىڭ كوڭىلىنەن شىقتى. ەسكەرتكىش اشۋ يدەياسىن جازۋشى جانبولات اۋپباەۆ ۇسىنعان. ول قازاق حالقىنىڭ بالا تار­بيە­لەۋگە ەجەلدەن ەرەكشە ءمان بەرە­تىنىن ايتا كەلە, وسى ءبىر بولمىستى بەينەلەيتىن ب.سوقپاقباەۆ پوۆەسىنىڭ كەيىپكەرىنە مونۋمەنت ورناتۋ جونىندە ويىن ايتتى. ەسكەرتكىشتىڭ بيىك­تىگى – 183 سم, ول قولادان جانە گرا­نيت­تەن جاسالعان. ءمۇسىنشى ازامات تالاپ­حاننىڭ ايتۋىنشا, جۇمىس ءۇش ايعا سوزىلعان.

– ماعان وسى ەسكەرتكىشتى جاساۋ تۋرالى ۇسىنىس تۇسكەن بويدا ءتۇرلى يدەيالاردى ويلاستىرا باستادىم. ەسكەرتكىش ارقىلى باس كەيىپكەردىڭ مىنەزىن كورسەتۋ, شىعارما جەلىسىن جەتكىزۋ وتە ماڭىزدى بولدى. سونىمەن, ءفيلمنىڭ ەستە قالار­لىق كورىنىستەرىنىڭ ءبىرىن بەينەلەۋ جو­نىندە شەشىم قابىلداپ, قوجانىڭ اينا الدىندا وتىرعان ءساتىن كورسەتتىك, – دەدى مونۋمەنت اۆتورى.

سونىمەن قاتار ەلورداعا ەلىمىزدىڭ بارلىق وڭىرىنەن 30-دان استام مەكتەپ وقۋشىسى كەلىپ, ولارعا تانىمدىق ەكسكۋرسيا وتكىزىلدى. ءىس-شاراعا ارنايى شاقى­رىلعان وقۋ وزاتتارى مەن زياتكەرلىك جانە شىعارماشىلىق باي­قاۋلاردىڭ جەڭىمپازدارى اۋەلى «اقوردا» رەزيدەنتسياسىن ارالادى. سون­داي-اق بايتەرەك مونۋمەنتىنە شىقتى.

– مۇنداي ءىس-شارالار بالالارىمىز­دىڭ وسى ەلدىڭ ازاماتى ەكەندىگىن, ولار­دىڭ بولاشاقتا قازاقستان ءۇشىن ۇلكەن ءرول اتقاراتىندارىنا سەنىم بەرەدى. وقۋ-بىلىمگە قۇشتارلىقتارىن ارتتىرادى, – دەدى نۇر-سۇلتان قالاسى ءبىلىم بەرۋدى جاڭعىرتۋ ورتالىعى باسشىسىنىڭ ورىنباسارى سىندار مۇراتقىزى.

مەرەكەگە وراي «Balapan الەمى» OPEN AIR فەستيۆالى ءوتىپ, 800-گە جۋىق جاس ونەرپاز مەرەكەلىك ءىس-شارادا ونەر كورسەتتى. رەسپۋبليكالىق دەڭگەيدەگى اۋقىم­دى ءىس-شارا ەسىلدىڭ جاعاسىنداعى ام­فيتەاتردا ءوتتى. ءار وڭىردەن كەلگەن تالانتتى بۇلدىرشىندەر وسى جەردە ونەر­لەرىن ورتاعا سالىپ, ءتۇرلى بايقاۋعا قا­تىستى. 100 دومبىراشى ءبىر مەزەتتە كۇي ويناپ, «Qazaqstan داۋىسى. بالالار» جوباسىنىڭ قاتىسۋشىلارى اننەن شاشۋ شاشتى. سونىمەن قاتار امفيتەاتر ماڭىندا مەرەكەگە وراي ءتۇرلى سپورتتىق شارالار, قولونەر جارمەڭكەسى مەن كىتاپ كورمەسى ۇيىمداستىرىلدى. ۇلتتىق ويىن­دار وينالىپ, بالالار اسفالتقا سۋرەت سالدى.

بالالاردىڭ ساعىنا كۇتەتىن مەرەكە­سىن سارىارقا اۋدانىنىڭ سابيلەرى دە كوڭىلدى وتكىزدى. ويىن-ساۋىققا تولى كۇن ەرەكشە ەستەرىندە ساقتالارى ءسوزسىز. حالىقارالىق مەرەكە اياسىندا ين­كليۋ­زيۆتى سپورتتى دامىتۋ جانە سالاماتتى ءومىر سالتىن ناسيحاتتاۋ ماقساتىندا مەرەكەلىك ءىس-شارا ۇيىم­داس­تىرىلدى. بيىلعى مەيرام اتال­عان اۋداننىڭ ءۇش جەرىندە ءوتتى. Demalys promenade الاڭىندا, كوكتال ساياباعىندا جانە ارباتتا جالعاستى. Demalys promenade-تا artsportedu مەر­دىگەرلەرى اۋقىمدى فەس­تيۆال وتكىزدى. مەرەكە قوناقتارىن انيماتورلار قارسى الدى. ال ساحنادا 2000-نان اس­تام بالا ونەر كورسەتتى. مۇندا بالا­لار سۋرەتتەرىنىڭ ۇلكەن كورمەسى ءوتتى. كونتسەرت كورەرمەندەرىنە بالمۇزداق تاراتىلىپ, اكۆاگريم جاسالدى. مەرەكە تاڭەرتەڭنەن كەشكە دەيىن تويلاندى. سونىمەن قاتار «داۋلەت» تەننيس ورتالىعى ۇيىمداستىرعان اشىق ەسىك كۇنىنە 250 بالا قاتىستى.

– ءىس-شارانىڭ باستى ماقساتى – بالا­لارعا سپورتتى كوڭىلدى ويىن تۇرىندە تانىستىرۋ. بۇل بالالاردى سالاماتتى ءومىر سالتىنا تارتۋعا مۇمكىندىك بەرىپ, سپورت­تىڭ قانشالىقتى كوڭىلدى جانە پايدا­لى ەكەنىن كورسەتەدى, – دەدى تەننيس ورتا­لىعىنىڭ جەتەكشىسى دينا تەمىر­عاليەۆا.

وسىعان ۇقساس سپورتتىق ءىس-شارالار ءبىر ۋاقىتتا ءۇش جەردە – «داۋلەت» تەن­نيس ورتالىعىندا, بوتانيكالىق سايا­باقتىڭ تەننيس كورتىندا, كوكتال سايا­باعىنىڭ تەننيس كورتىندا ءوتتى. ءىس-شاراعا 6 جاستان 10 جاسقا دەيىنگى 250 بالا قاتىسىپ, باعدارلاما بارىسىن­دا تاپسىرمالار, ەستافەتالىق ويىندار, بيلەر ۇيىمداستىرىلىپ, پايدا­لى تاعامدار ۇسىنىلدى. سونىمەن قاتار كوكتال ساياباعىندا تەننيستەن شەبەر­لىك ساعاتتارى مەن كوڭىلدى ستارتتار ءوتتى. ساياباقتىڭ كىشكەنە قوناقتارىنا «داۋ­لەت» تەننيس ورتالىعىنىڭ كاسىبي جات­تىقتىرۋشىلارى ۇلكەن تەننيس ويىنى بويىنشا شەبەرلىك ساعاتىن وتكىزدى. بالالارعا راكەتكامەن قالاي ءدال ۇرۋ, تەپە-تەڭدىكتى ساقتاۋ, جىلدامدىق پەن كوورديناتسيانى دامىتۋ تۋرالى ايتىلدى. بۇدان بولەك بالالار اراسىندا كوڭىلدى ستارتتار ءوتتى. سپارتاكيادا جەڭىمپازدارى ماراپاتتالدى.

ال ايتۋلى مەرەكە قارساڭىندا الما­تى اۋدانى ينتەرناتسيونالنىي تۇرعىن الابىنداعى مەرەكە كوشەسى, 40-ءۇيدىڭ جاڭا اۋلاسى مەن سول ماڭداعى سكۆەردى اباتتاندىرۋ جۇمىستارى اياقتالدى. بيىل جازدا اۋداندا 80 جاڭا اۋلا الاڭى سالىنادى, اباتتاندىرۋ, جارىقتاندىرۋ جانە كوگال­داندىرۋ جۇمىستارى كەشەندى تۇردە جۇرگىزىلۋدە. ءبىرىنشى كەزەكتە قالا­­نىڭ ەسكى بولىگىندەگى شاعىن اۋدان­داردا جاڭا اۋلا الاڭدارىن ورناتۋ قاجەت بولدى. بۇگىنگى كۇنى تاۋەلسىزدىك, قاجى­مۇقان, جۇماباەۆ, مايلين كوشە­­لەرىندەگى جۇمىستار اياقتالدى. جال­پى كوشەلەرگە 250 ترەناجەر, 30 workout ايماعى ورناتىلادى, 20 سپورت الاڭى جوندەلىپ, 15-ءى جاڭادان سالىنادى. اتالعان اۋداننىڭ ستۋدەنتتەر ساياباعىندا بالالاردى قورعاۋ كۇنىنە ارنالعان مەرە­كەلىك باعدارلاما ۇسى­نىلدى. ۇيىم­داستىرۋشىلار اربا شە­رۋىن, ۆەلو­سيپەدشىلەر بايقاۋىن جانە 6 ايدان 39 ايعا دەيىنگى بالالار اراسىندا ەڭ­بەك­تەۋدەن جارىس وتكىزدى. ءدال سول كۇنى ءال-فارابي اتىنداعى وقۋشىلار سارايى الاڭىندا شىعارماشىلىق ۇجىم­­­داردىڭ قاتىسۋىمەن مەرەكەلىك كون­­­تسەرت, سونداي-اق Samga چەمپيوندار ليگاسى جاس سپورتشىلارىنىڭ كورسەتىلىمدەرى ۇيىمداستىرىلدى. الاڭ­دا بالالار سۋرەتتەرى مەن قولدان­بالى شىعارماشىلىق كورمەسى, «جازدىڭ ايشىقتى بوياۋلارى» اتتى اسفالتتا سۋرەت سالۋ كونكۋرسى وتكىزىلدى.

– مەن بالالار كۇنىن ەرەكشە كۇتە­مىن. سەبەبى ول كۇنى ءبىز اتا-انامىزبەن سەرۋەن­دەپ, ءتۇرلى ويىندار ويناپ, كوڭىل كوتەرەمىز. قىدىرامىز. بيىلعى مەرە­كە دە شاتتىق پەن قىزىققا تولى بولدى. جاڭا دوستارمەن تانىستىم, سۋرەت سالدىم, وزىمە قاتتى ۇنادى. بىز­گە وسىنداي كوڭىل كۇي سىيلاعان ۇيىمداس­تىرۋشىلارعا العىس ايتامىن, – دەدى قالا­مىزدىڭ كىشكەنتاي تۇرعىنى ايالا نۇرلىبەك.

نۇر-سۇلتان قالاسى اكىمدىگىنىڭ «ما­مانداندىرىلعان بالالار ءۇيى» مەم­لەكەتتىك كوممۋنالدىق مەكەمەسىندە مە­رەكەگە ارنالعان «عارىش الەمىنە سايا­حات» اتتى سالتاناتتى ءىس-شارا ءوتتى. بۇلدىرشىندەردى مەرەكەمەن قۇتتىقتاپ, ءتۇرلى سىيلىقتارىمەن قۋانىش سىيلاۋ ماقساتىندا نۇر-سۇلتان قالاسى دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ, نۇر-سۇلتان قالاسى ءبىلىم باسقارماسى قامقورشىلىق جانە قورعانشىلىق ورگانى وكىلدەرى, «مەرەكە» قايىرىمدىلىق قورىنىڭ وكىلدەرى, مەتسەناتتار مەن دەمەۋشىلەر, نۇر-سۇلتان قالاسى اكىمىنىڭ اپپاراتى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميس­سياسىنىڭ باس ينسپەكتورى-حاتشىسى قارلىعاش سابيتقىزى مەن ايەلدەر ىستەرى جونىندەگى كوميسسيا مۇشەلەرى كەلىپ, سالتاناتتى مەرەكەلىك ءىس-شارانىڭ قادىرلى قوناعى بولدى. بۇلدىرشىندەر مەن قوناقتار – عارىشكەر, قاراقشى, كەمپىرقوساق, كۇن جانە بۇلتتارمەن بىرگە «عارىش الەمىنە» ساياحات جاسادى. عاجايىپقا تولى عارىش الەمىندە بالالارىمىز ءوز ونەرلەرىن ورتاعا سالىپ, «جۇلدىزدار», «كۇن ساۋلەلەرى», «اق بۇلتتار», «كۇن جۇيەسىندەگى عا­لام­شارلار», «عارىش­كەرلەر» ءبيى مەن «زىمىران» فلەشموبىن بيلەپ, «جۇل­دىزداردى جينا», «كۇن مەن جاڭبىر» اتتى قىزىقتى ويىنداردى ويناپ قۋا­نىشقا كەنەلدى. سونىمەن قاتار بالالاردى قۋانتۋ ماقساتىندا اتالعان مەكەمەگە قازاقستاندى الەمگە تانىتقان وليمپيا­دا چەمپيوندارى, حالىقارالىق سپورت شەبەرلەرى كەلدى. ولاردىڭ قاتارىندا, بوكستان الەم چەمپيونى مەرەي اقشا­لوۆ پەن ازيا چەمپيونى ۆاسيلي لە­ۆيت, بەلگىلى زىلتەمىرشى, وليمپيادا ويىن­دارىنىڭ ەكى دۇركىن چەمپيونى, الەمنىڭ ءتورت دۇركىن چەمپيونى يليا يلين اتباسىن بۇردى.

– ەلىمىزدىڭ ماقتانىشتارى مەرەي اقشالوۆ, ۆاسيلي لەۆيت, يليا يلين ورتالىعىمىزدىڭ قادىرلى قوناعى بولىپ, مەرەكەلىك ءىس-شارادا بۇلدىرشىندەرىمىزگە ارنايى اكەلگەن سىيلىقتارىن تابىستادى. مەرەكەلىك ءىس-شارا وتە قىزىقتى ءوتتى. قىلىقتى بالاپاندارعا ءتۇرلى تاتتىلەر مەن ادەمى ويىنشىقتار ۇلەستىرىلىپ, مە­رەكەلىك باعدارلاما ەستە قالارلىق ەس­تەلىك سۋرەتتەرگە تۇسۋمەن ۇلاستى, – دەدى بالالار ءۇيىنىڭ ديرەكتورى ساۋلە كەنجەتايقىزى.

ەلورداداعى بايقوڭىر اۋدانى اكىم­دىگى بالالار جىلى اياسىندا استا­نا­لىق مەكتەپتەر اراسىندا «مەنىڭ قولىمنان كەلەدى» بايقاۋىن وتكىزدى. ەكى ايعا سوزىلعان بايقاۋ ءوز مارەسىنە جەتىپ, حالىقارالىق بالالاردى قورعاۋ كۇنى قارساڭىندا بايقاۋ جەڭىمپازدارى ماراپاتتالدى. جارىس قورىتىندىسى بويىنشا ءبىرىنشى ورىندى فاريزا وڭعارسىنوۆا اتىنداعى №77 مەكتەپ-گيمنازياسىنىڭ 4 «ز» سىنىپ وقۋشىسى ارسەن قازاقباەۆ جەڭىپ السا, ەكىنشى ورىندى اباي اتىن­داعى №87 مەكتەپتىڭ 6-سىنىپ وقۋ­شىسى ميراس ابۋباكىر يەلەندى. جۇل­دەلى ءۇشىنشى ورىنمەن №27 مەكتەپ-ليتسەيى­نىڭ ء2«ا» سىنىپ وقۋشىسى دايانا بە­كەنوۆا ماراپاتتالدى. ۇزدىكتەرگە «باي­قوڭىر» اۋدانى اكىمدىگى اتىنان با­عالى سىيلىقتار مەن ديپلومدار بەرىل­دى. بۇدان بولەك, بايقاۋعا قاتىسقان باسقا قاتىسۋشىلار دا نازاردان تىس قالمادى. وزدەرىنىڭ ەرەكشە جۇمىستارىن ۇسىنىپ, بايقاۋدا باق سىناعان بارلىق قاتىسۋشىعا بايقوڭىر اۋدانى اكىمدىگى اتىنان «مەكتەپكە جول – 2022» اكتسياسىنا قاتىسۋ سەرتيفيكاتتارى تابىستالدى.

قالاداعى «قالامگەرلەر» اللەيا­سىندا وتكەن مەرەكەلىك ءىس-شارا كىش­كەنتاي تۇر­عىندارعا كوتەرىڭكى كوڭىل كۇي سىيلادى. ءان ايتىلىپ, بي بيلەپ, بۇلدىرشىندەر شاتتىققا كەنەلدى.

– ءاربىر اتا-انا بالالارىنىڭ باقىت­تى بولعانىن, ۇنەمى ك ۇلىپ جۇرگەنىن قا­لايدى. ولاردىڭ شاتتىققا تولى ءجۇزىن كورۋ – ءبىزدى دە قۋانىشقا كەنەلتەدى. بۇگىنگى مەرەكەدە سابيلەرىمىز ءماز بولىپ, شاتتانىپ, ەرەكشە سەزىمگە بولەندى. ولاردى كورىپ ءبىزدىڭ دە قۋانعانىمىز راس. جىل سايىن حالىقارالىق بالالاردى قورعاۋ كۇنى كەڭىنەن اتالىپ وتىلۋدە. بالاپاندارىمىزدىڭ اسىعا كۇتەتىن مەيرامى بيىل دا جوعارى دەڭگەيدە ءوتتى. قالامىزدىڭ ءار جەرىندە مەرەكەلىك, دۋماندى كوڭىل كۇيدى سەزىندىك, – دەدى اتا-انالار.

بالالاردى قورعاۋ كۇنى بايقوڭىر اۋدانىنىڭ ورتالىق الاڭدارىنان باس­­تاپ تۇرعىن الاپتارعا دەيىن كەڭى­نەن اتالىپ ءوتىپ, بالاقايلار ءۇشىن مەرە­كەلىك كونتسەرتتەر مەن اۋلا مەرەكەلەرى وتكىزىلدى. سونىمەن قاتار «كازگورودوك» تۇرعىن الابىندا بالالار اراسىندا فۋتبولدان تۋرنير ءوتتى. تۋرنيردە ۇز­دىك ويىن كورسەتكەن ويىنشىلار مەن كوماندالار ماراپاتتالىپ, ارنايى سىيلىقتار مەن ديپلومدار تابىس ەتىلدى. بۇدان بولەك, «كوڭىلدى ما­رە» ويىندارى ۇيىم­داستىرىلىپ, انيماتورلاردىڭ قىزىقتى سايىستارى مەرەكەنى جانداندىرا ءتۇستى.