ءۇندىستاننىڭ نيۋ-دەلي قالاسىندا سان مارتين پارك سكۆەرىندە قازاقتىڭ ۇلى ويشىلى اباي قۇنانباەۆتىڭ ءبيۋستى سالتاناتتى تۇردە تانىستىرىلدى, دەپ حابارلايدى Egemen.kz قر ءسىم ءباسپاسوز قىزمەتىنە سىلتەمە جاساپ.
ءىس-شارا قر پرەمەر – ءمينيسترىنىڭ ورىنباسارى-ساۋدا جانە ينتەگراتسيا ءمينيسترى باقىت سۇلتانوۆتىڭ, ءۇندىستاننىڭ سىرتقى ىستەر جانە مادەنيەت مەملەكەتتىك ءمينيسترى ميناكشي لەكحيدىڭ, سونداي-اق ديپلوماتيالىق كورپۋس وكىلدەرىنىڭ قاتىسۋىمەن ءوتتى.
«اباي – ۇلى اقىن عانا ەمەس, كەمەڭگەر ويشىل, ايگىلى اعارتۋشى. ول جۇرتتى عىلىم يگەرۋگە, ءبىلىمدار بولۋعا ۇندەدى. جاڭاشىلدىق پەن جاسامپازدىقتى دارىپتەدى. اباي مۇراسى – ءبىزدىڭ ەلىمىزگە عانا ەمەس, بارشا ادامزاتقا ورتاق قۇندىلىق», دەدى ب. سۇلتانوۆ.
ول ماحاتما گانديدىڭ تۋعان جەرىنە قازاق اعارتۋشىسىنىڭ ءبيۋستىن ورناتۋ تەرەڭ سيمۆولدىق مانگە يە ەكەنىن اتاپ ءوتتى. اباي مەن گاندي يدەيالارى ءبىر-بىرىمەن تىعىز بايلانىستى.
ماسەلەن اباي: «تەگىندە, ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق. ونان باسقا نارسەمەنەن وزدىم عوي دەمەكتىڭ ءبارى دە – اقىماقتىق», دەگەن ءسوزى بار. بۇل قاسيەتتەردى ماحاتما گاندي دە باعالاعان. ول ء«سىزدىڭ سەنىمىڭىز ءسىزدىڭ ويىڭىزعا اينالادى, ويىڭىز سوزىڭىزگە اينالادى, ءسوزىڭىز ارەكىڭىزگە, ال ارەكەتىڭىز ادەتكە, ادەت ءسىزدىڭ قۇندىلىعىڭىزعا, قۇندىلىقتارىڭىز ءسىزدىڭ تاعدىرىڭىزعا اينالادى», دەگەن.
باقىت سۇلتانوۆ اباي ءبيۋستىنىڭ ورناتىلۋى ەكى ەل اراسىنداعى رۋحاني ىنتىماقتاستىقتى ودان ءارى نىعايتا تۇسەتىنىن اتاپ ءوتتى. سونداي-اق تاراپتار ءبىلىم, عىلىم جانە مادەنيەت سالاسىنداعى ىنتىماقتاستىقتى دامىتۋدى جالعاستىرادى.
نيۋ-دەلي قالاسىندا اباي ءبيۋستىنىڭ اشىلۋىنا ارنالعان سالتاناتتى ءىس-شارا قازاقستان رەسپۋبليكاسى مەن ءۇندىستان رەسپۋبليكاسى اراسىنداعى ساۋدا-ەكونوميكالىق, عىلىمي-تەحنيكالىق, ونەركاسىپتىك جانە مادەني ىنتىماقتاستىق جونىندەگى ۇكىمەتارالىق كوميسسيانىڭ 14-وتىرىسىنا قاتىسۋ ءۇشىن قازاقستان رەسپۋبليكاسى دەلەگاتسياسىنىڭ ۇندىستانعا ساپارى شەڭبەرىندە ءوتتى.
ايانا توعانبەك