ءساۋىر ايىنداعى ساۋدا-ساتتىق

ءساۋىردىڭ سوڭىنداعى جاعداي بويىنشا, ءاىح-ءتىڭ رەسمي تىزىمىنە 84 ەميتەنتتىڭ 126 باعالى قاعازدار شىعارىلىمى كىردى. ونىڭ ىشىندە 2 ETF (Exchange traded funds) پەن 17 ETN (Exchange traded notes) بار. 18 قازاقستاندىق جانە 12 حالىقارالىق بروكەر ءاىح-ءتىڭ ساۋدا مۇشەلەرى بولىپ سانالادى. ءاىح-ءتىڭ ورتالىق دەپوزيتاريىندە ينۆەستورلاردىڭ 306 مىڭنان استام شوتى اشىلدى. شوتتاردىڭ سانى Jusan Invest بروكەرىنىڭ 128 مىڭنان اسا شوت اشۋى ەسەبىنەن ايتارلىقتاي ۇلعايدى.

ءساۋىردىڭ سوڭىندا ءاىح-تە ۇلەستىك قۇرالدار ليستينگى بار كومپانيالاردىڭ («قازاتومونەركاسىپ», Polymetal, «حالىق بانك», Ferro-Alloy Resources Limited, «تسەنتركرەديت بانكى», Kaspi.kz) جالپى نارىقتىق كاپيتالداندىرۋى 24,9 ملرد دوللاردان استى.

2022 جىلعى ساۋىردە ءاىح-ءتىڭ رەسمي ءتىزىمى «حالىق بانكتىڭ» جالپى سوماسى 200 ملن دوللاردى قۇرايتىن, كۋ­پون­دىق مولشەرلەمەسى 2,5 پايىز ءۇش جىلدىق وبليگا­تسيا­لارىنىڭ ليستينگىمەن تولىقتى. وتاندىق بانك سەكتورى كوشباسشىسىنىڭ وبليگاتسيالارىن شىعارۋ 500 ملن دوللار سوماسىنداعى وبليگاتسيالىق باعدارلاماسىنىڭ ءبىرىنشى ترانشى بولىپ سانالادى.

AIXQI يندەكسى 932.51 پۋنكتتەن 863.49 پۋنكتكە دەيىن, ياعني 7,4 پايىزعا تومەندەدى. 9 كومپانيانىڭ ۇشەۋى عانا ايدى وڭ ناتيجەمەن اياقتادى. ەڭ جاقسى ءوسىمدى Kaspi.kz اكتسيالارى كورسەتتى, ولاردىڭ ءوسۋى 22,4 پايىزدى قۇرادى. Kaspi.kz قۇنىنىڭ وسۋىنە كومپانيا قىزمەتىنىڭ وڭ ناتيجەسى قوزعاۋ سالدى. 2022 جىلدىڭ 1-توقسانىنداعى تازا پايدا 117 ملرد تەڭگەگە جەتتى. بۇل وتكەن جىلدىڭ 1-توقسانىنا قاراعاندا 49 پايىزعا كوپ. بۇعان قوسا Kaspi.kz كومپانياسىنىڭ ديرەكتورلار كەڭەسى لوندون قور بيرجاسىندا 100 ملن دوللار سوم­اسىنا عالامدىق دەپوزيتارلىق قولحاتتاردى ساتىپ الۋ باعدارلاماسىن بەكىتكەنىن حابارلادى.

Central Asia Metals اكتسيالارىنىڭ باعاسى ازداپ ءوستى (+1,7 پا­يىز). بازالىق مەتالدارعا وسكەن سۇرانىس كومپانيا بيز­نەسىنىڭ ۇزاق مەرزىمدى كەلەشەگىنە وڭ اسەرىن تيگىزۋدە. «بانك تسەنتركرەديتتىڭ» اكتسيالارى ءساۋىردى جاسىل ايماقتا اياق­تا­دى (+1,41 پايىز). بانك ساۋىردە «الفا-بانكپەن» قارجى ينس­تي­تۋ­تىنىڭ قازاقستانداعى ەنشىلەس بانكىن ساتىپ الۋ بويىنشا تۇبە­گەيلى ۋاعدالاستىققا قول جەتكىزدى. سوعان سايكەس «بانك تسەنتركرەديت» رەسەيلىك بانكتىڭ ەنشىلەس ۇيىمىنىڭ 100 پايىز جاي اكتسيالارىن ساتىپ الىپ, ونىڭ جاڭا اكتسيونەرىنە اينالادى.

«قازاقتەلەكوم» اكتسيالارىنىڭ قۇنى ازداپ تومەندەدى (-0,64 پايىز). «حالىق بانك» اكتسيالارى ءساۋىردى قۇلدىراۋمەن اياقتادى (-6,32 پايىز). اكتسيونەرلەردىڭ جينالىسىندا قابىلدانعان 2021 جىلعا ديۆيدەند تولەمەۋ تۋرالى شەشىمدى نارىق تەرىس قابىلدادى. سونىمەن قاتار ساۋىردە «حالىق بانك» 330 ملرد تەڭگە كولەمىندەگى «سبەربانك» پورتفەلىنىڭ ءبىر بولىگىن ساتىپ العانىن اتاپ وتكەن ءجون.

ءساۋىردىڭ قورىتىندىسى بويىنشا Kcell اكتسيالارى -17,64 پايىزعا تومەندەدى. كومپانيا باسقارماسىنىڭ توراعاسى تەلەكوم-وپەراتور اكتسيالارىنىڭ قۇنىنا ىقتيمالدى اسەر ەتەتىن فاكتورلار بولۋى سەبەپتى نارىقتىڭ مۇنداي جاۋابىن نەگىزدەۋدىڭ قيىن ەكەنىن اتاپ ءوتتى. ولاردىڭ قاتارىنا ىرگەلى ماكروەكونوميكالىق كورسەتكىشتەر مەن گەوساياسي تاۋە­كەلدەردى جاتقىزۋعا بولادى. 2022 جىلدىڭ 1-توقسانى بو­يىنشا جاريالانعان ەسەپتىلىككە سايكەس, قارجىلىق كورسەتكىشتەر تۇراقتى بولىپ قالىپتاستى.

KazTransOil-دىڭ جاريالانعان ەسەپتىلىگى مەن ديۆيدەندتەر تولەۋ جونىندەگى جاريالانعان شەشىمى نارىقتىڭ كۇتكەنىندەي بولمادى. ايدىڭ قورىتىندىسى بويىنشا مۇناي قۇبىرى كومپانياسىنىڭ اكتسيالارى ايتارلىقتاي تومەندەدى (-21,13 پايىز). جوعارى گەوساياسي شيەلەنىستىڭ Polymetal اكتسيالارىنا قىسىمى جالعاسۋدا. ول ساۋىردە -27,08 پايىز جوعالتتى. نارىق سونىمەن بىرگە رەسەيگە قارسى قولدانىلعان سانكتسيالاردىڭ «قازاتومونەركاسىپكە» اسەر ەتۋ الەۋەتىن دە جوعارى باعالاپ وتىر. ونىڭ اكتسيالارى ساۋىردە -14,05 پايىزعا تومەندەدى. سانكتسيالىق رەجىم ازىرگە ۋران سالاسىنا اسەر ەتكەن جوق. الايدا «قازاتومونەركاسىپ» ورىن العان جاعدايدىڭ بارلىق ىقتيمالدى تاۋەكەلدەرى مۇقيات باعالانىپ وتىرعانىن رەسمي حابارلادى. كومپانيادا تاۋەكەلدەردى بارىنشا ازايتۋعا جانە ءوز اكتسيونەرلەرىنىڭ مۇددەسىن قورعاۋعا كۇش سالىناتىنى اتالىپ ءوتتى.