تاريحىمىز سان ءتۇرلى كەزەڭدەردى باستان وتكەردى. كەشەگى كۇننىڭ بەينەسىن, قوعامنىڭ كەيپىن سول ۋاقىتتان قالعان ەستەلىكتەر مەن جازبا مۇرالاردان بىلە الامىز. ءبىزدىڭ دالامىزعا سان مىڭ ساياحاتشى كەلىپ, تۇگىن تارتسا مايى شىعىپ جاتاتىن ۇلى دالانىڭ كەرەمەتتەرىنە قىزىعۋشىلىقپەن قاراعان. سول قىزىعۋشىلىق ولاردىڭ بىرىنە كىتاپ جازدىرسا, بىرىنە فوتوسۋرەت تۇسىرگىزىپتى. ءبارى دە ءبىز ءۇشىن قۇندى بولماق. تاريحىن بىلگىسى كەلەتىن وقىرماندارعا اقش كونگرەسىنىڭ كىتاپحاناسىنداعى قولجازبالار بولىمىندە ساقتالعان قازاققا قاتىستى بىرنەشە سۋرەتتى ۇسىنعاندى ءجون كوردىك.
سازگەر
بۇل سۋرەتتى كىتاپحاناشىلار Kazakh man, a musician with a dombra, seated (قازاق جىگىتى, دومبىرا ۇستاپ وتىرعان سازگەر) دەگەن اتپەن ساقتاپتى. ارحيۆ ەسكەرتپەسىندە بۇل سۋرەت 1870-1886 جىلدار ارالىعىندا تۇسىرىلگەن, فوتو اۆتورى ەرمولين, قولجازبالار بولىمىنە دجوردج كەننان قۇجاتتارىنىڭ ءبىر بولىگى رەتىندە ساقتالعان دەگەن تۇسىنىكتەمە جازىلعان.
قازاق اۋىلى
ال «ومبىعا تاياۋ جەردەگى قىرعىز (قازاق) اۋىلى» دەپ ارحيۆكە تۇسكەن فوتودان قازاق اۋىلىن, اربا مەن بەلدەۋگە بايلاۋلى تۇرعان اتتى كورەمىز. تۇسىنىكتەمەدە ساۋلە ساتاەۆانىڭ قورىنان الىندى دەلىنگەن. ۋاقىتى 1885-1886 جىلدار ەكەن. بۇل دا قولجازبالار بولىمىندەگى دجوردج كەننان قۇجاتتارىنىڭ ءبىر بولىگى رەتىندە ساقتالىپتى.
بولىس
اتالعان سۋرەتتىڭ تاقىرىبى «قىرعىز رۋباسى جەرگىلىكتى ورىس ۇلىعى جانە ونىڭ ايەلىمەن بىرگە» دەپ كورسەتىلگەن. ال فوتودان سولتۇستىك قازاقستانداعى ءبىر توپ قازاقتىڭ بىرگە سۋرەتكە تۇسكەنىن كورە الامىز. قولجازبالار بولىمىندەگى دجوردج كەننان قۇجاتتارىنىڭ ءبىر بولىگىندەگى قازاققا قاتىستى تاعى ءبىر سۋرەت وسى.
شولاق
ال «قازاق شولاق» دەگەن اتپەن ساقتالعان مىنا فوتوسۋرەت قازاقتا بالۋان شولاقتان باسقا تاعى ءبىر شولاق ەسىمدى تۇلعالى ادام بولعانىن ايعاقتايدى.
ايگىلى كىتاپحانانىڭ قولجازبالار بولىمىنەن «ۇتقۇل باي», «ۇزان باي», «ارسىلان باي» دەگەن تاقىرىپتارمەن ساقتالعان فوتولار كەزدەسەدى. ارسىلان بايدىڭ تۇسىرىلگەن جىلى 1865-1872 جىلدار ارالىعىندا دەگەن سىلتەمە قوسا بەرىلگەن. «جاريالاۋعا ەش شەكتەۋ جوق» دەگەن ەسكەرتپە دە وسى فوتونىڭ استىندا تۇر.