11 ماۋسىمدا الماتىدا ارالاس جەكپە-جەكتەن Naiza Fighting Championship ءتۋرنيرى وتەدى. بۇل جارىستا اتالعان ۇيىمنىڭ ەكى بىردەي التىن بەلبەۋى ساراپقا سالىنادى.
اتاپ ايتساق, ەرلەردىڭ جارتىلاي ورتا سالماعىندا قازاقتىڭ قوس ورەنى – نۇرعالي نۇرعايىپ ۇلى مەن ولجاس ابزاليەۆ ايقاسسا, ايەلدەردىڭ ەڭ جەڭىل سالماق دارەجەسىندە رەسەيلىك ۆالەريا كارىگينا مەن ديلشودا ۋماروۆا كۇش سىناسادى.
جوعارىدا ايتىلعان كەزدەسۋلەردەن بولەك, سپورت سۇيەر قاۋىم تاعى بىرنەشە قىزىقتى جەكپە-جەكتىڭ كۋاسى بولادى. سولاردىڭ ءبىرى جارتىلاي جەڭىل سالماقتاعى رەسەيلىك گەورگي پوپوۆ پەن قازاق جىگىتى ەلجان الياسقار اراسىندا وتەدى دەپ كۇتىلۋدە. 38 جاستاعى گەورگي – ساحا رەسپۋبليكاسىنىڭ تۋماسى. وسى كۇنگە دەيىن 18 مارتە وكتاگونعا شىققان ول 14 رەت جەڭىسكە جەتتى. وسىدان ءۇش جىل بۇرىن پوپوۆ UFC-دە ونەر كورسەتتى. بىراق مۇحيتتىڭ ارعى جاعالاۋىندا ونىڭ جولى بولمادى. ياكۋت سپورتشىسى امەريكالىق ەددي ۆاينلەند پەن ۇلىبريتانيالىق دەيۆي گرانتتان جەڭىلگەننەن كەيىن ايگىلى پروموۋشەن رەسەيدىڭ وكىلىمەن كەلىسىمشارتتى ۇزارتۋدان باس تارتتى. سوڭعى كەزدەسۋىن پوپوۆ بىلتىر جازدا الماتىدا سەرجان ساپارعاليەۆپەن وتكىزىپ, ونى ءۇشىنشى راۋندتا ۇرىپ جىقتى.
25 جاستاعى ەلجان الياسقار – تاەكۆوندودان قارا بەلبەۋ يەگەرى جانە پانكراتيوننان الەم چەمپيونى. بۇل اتاققا ول 2017 جىلى رەسەيدىڭ سوچي قالاسىندا قول جەتكىزدى. 2018 جىلى قانداسىمىز Kazakhstan Fighter تۋرنيرىندە باق سىناپ, فينالعا دەيىن جەتتى. شەشۋشى تۇستا ەلجان قازاقتىڭ تاعى ءبىر مىقتى ورەنى ەلامان شەرتاەۆقا ەسە جىبەردى. ارالاس جەكپە-جەكتەن بارلىعى 11 باسەكە وتكىزگەن الياسقار سونىڭ سەگىزىندە باسىمدىق تانىتتى.
سونداي-اق سول كەشتە جەرلەستەرىمىزدەن بولەك, الىس جانە جاقىن شەت مەملەكەتتەردەن كەلگەن تاعى بىرنەشە تانىمال سپورتشىلار ءوز ونەرلەرىن ورتاعا سالادى.