جاستار بيزنەستى جاعالاپ ءجۇر

Finprom.kz-ءتىڭ ەسەبىنشە, ءبىر جىل ىشىندە جۇمىس ىستەپ تۇرعان جەكە كاسىپكەرلىك سۋبەكتىلەرى 8,3 پايىزعا كوبەيىپ, 1,2 ملن-عا جەتتى. ونداعى جاس كاسىپكەر­لەر­دىڭ ۇلەسى 14,5 پايىزدان 18,2 پا­يىزعا ارتتى.

جەكە كاسىپكەرلىگى بار جاس­تاردىڭ 109,1 مىڭى – ەرلەر, 102,8 مىڭى – ايەلدەر. ەرلەردىڭ سانى ءبىر جىل ىشىندە 24,7 پايىزعا ۇلعايسا, ايەلدەر سانى بىردەن ءبىر جارىم ەسە ءوستى. وسىلايشا, جۇ­مىس ىستەپ تۇرعان جاس كاسىپكەر­لەر­­دىڭ جالپى سانىنداعى ايەل­دەر­دىڭ ۇلەسىن 43,7 پايىزدان 48,5 پايىزعا دەيىن ارتتىردى.

سونىمەن قاتار اۋىل مەن قالا كا­سىپ­كەرلەرىنىڭ اراسىن­دا دا ايىر­ماشىلىق كوپ. ماسە­لەن, قالالىق جەردە جۇمىس ىستەپ تۇرعان جەكە كاسىپكەرلىك سۋبەك­تى­لەرىنىڭ سانى 158,4 مىڭدى قۇ­رادى. كورسەتكىش وتكەن جىل­مەن سالىستىرعاندا 38,3 پا­يىزعا جوعارى. ال اۋىلدىڭ ۇلەس­ىنە سەكتورداعى بارلىق جەكە كاسىپ­كەرلىكتىڭ تورتتەن ءبىر بولىگى عانا تيەسىلى. دەسە دە, ولاردىڭ سانى 30,9 پايىزعا نەمەسە 53,4 مىڭعا دەيىن وسكەنىن اتاپ وتكەن دۇرىس.

جاس كاسىپكەرلەر نەگىزىنەن كوتەرمە جانە بولشەك ساۋدادا, سونداي-اق اۆتوجوندەۋ سالاسىندا شوعىرلانعان. اتالعان باعىتتاردا 73,6 مىڭ جەكە كاسىپ­كەر جۇمىس ىستەيدى. ونداعى ايەل­دەردىڭ ۇلەسى – 49,9 پايىز نەمەسە 36,7 مىڭ جەكە كا­سىپ­كەرلىك. ودان كەيىنگى ورىن­دا اۋىل, ورمان جانە بالىق شارۋا­شى­لىقتارى تۇر. مۇندا 15,4 مىڭ جە­كە كاسىپكەرلىك بار. ونىڭ ۇشتەن ءبىرى ايەلدەرگە تيەسىلى. جاستار كوپ شوعىر­لان­عان سالالار­دىڭ ۇشتىگىن وڭدەۋ ونەر­كاسىبى قۇراپ وتىر. مۇن­داعى جاس كاسىپكەرلەردىڭ سانى 12,4 مىڭعا جۋىقتايدى. ونىڭ 61,7 پايىزى – ايەلدەر.

بيزنەستەن باق ىزدەگەن قىز-جىگىت­تەردىڭ نەگىزگى بولىگى الماتى (33 مىڭ) جانە نۇر-سۇلتان (24,7 مىڭ) قالالارىندا شوعىرلانعان. ال جاس كاسىپكەرلەردىڭ ۇلەسى از وڭىرلەردىڭ ۇشتىگى كەلەسىدەي: سول­تۇستىك قازاقستان (2,6 مىڭ), پاۆلودار (5 مىڭ) جانە اقمولا (5,5 مىڭ).

ەلدەگى 17 ءوڭىردىڭ التاۋىنداعى جاس كاسىپكەرلەردىڭ باسىم بولىگىن ايەلدەر قۇراپ وتىر. ايتالىق, ماڭعىستاۋ وبلىسىنداعى جاس­تار اشقان جەكە كاسىپكەرلىك سۋبەكتىلەرىنىڭ 63,2 پايىزى ايەل­دەرگە تيەسىلى. بۇل كورسەتكىش شىعىس قازاقستان وبلىسىندا 62,3 پا­يىزعا تەڭ. قاراعاندىنىڭ كور­سەتكىشى – 51,9 پايىز. كەرى­سىنشە, ايەلدەردىڭ ۇلەسى تومەن وڭىرلەردىڭ قاتارىندا سولتۇستىك قازاقستان (39,2 پايىز) مەن تۇركىستان (40,5 پايىز) وبلىستارى بار.