كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەلەرى ۆلاديمير ۆولكوۆ, قاناتبەك سافينوۆ, اندرەي لۋكين جانە نۇرلان بەكنازاروۆ قازاق ۇلتتىق ونەر ۋنيۆەرسيتەتىنىڭ وقىتۋشىلارىمەن جانە ستۋدەنتتەرىمەن كەزدەستى.
دەپۋتاتتار كەزدەسۋ بارىسىندا قاتىسۋشىلارعا ەلىمىزدىڭ كونستيتۋتسياسىنا ەنگىزۋگە ۇسىنىلعان وزگەرىستەر تۋرالى ايتىپ, مەملەكەت باسشىسىنىڭ وسى ماسەلە بويىنشا جالپى رەسپۋبليكالىق رەفەرەندۋم وتكىزۋ تۋرالى شەشىمى «حالىق ۇنىنە قۇلاق اساتىن مەملەكەت» قاعيداسىنا تولىق سايكەس كەلەتىنىن اتاپ ءوتتى.
«مەملەكەتتىڭ جەرگە, ونىڭ جەر قويناۋى مەن بايلىعىنا مەنشىك قۇقىعى, ءولىم جازاسىنا تولىق تىيىم سالۋ, كونستيتۋتسيالىق سوتتا كونستيتۋتسيالىق قۇقىقتار مەن بوستاندىقتاردى قورعاۋ جانە ت.ب. سياقتى ماڭىزدى ماسەلەلەر 27 جىل ىشىندە تۇڭعىش رەت قازاقستاننىڭ بارلىق ازاماتىنىڭ پىكىرىن ەسكەرە وتىرىپ شەشىلەتىن بولادى. ءبىز ءبارىمىز كونستيتۋتسياعا ەنگىزىلگەن ماڭىزدى تۇزەتۋلەر ءۇشىن داۋىس بەرۋىمىز كەرەك. بۇل وزگەرىستەر ارقىلى جۇزەگە اساتىن جاڭا ساياسي رەفورمالار دەموكراتيالىق قايتا قۇرۋعا دەگەن ادالدىقتى كورسەتەدى», دەدى كوميتەت توراعاسى ۆ.ۆولكوۆ.
دەپۋتات ن.بەكنازاروۆ ونەر سالاسىنداعى الەۋمەتتىك-مادەني جانە ەكونوميكالىق ماسەلەلەردى شەشۋدەگى مەملەكەتتىڭ ءرولىن قوزعاپ, الداعى رەفەرەندۋمعا بەلسەندى قاتىسۋعا شاقىردى.
«ۋنيۆەرسيتەت اعارتۋ ءىسىنىڭ بەسىگى جانە ۇلتتىق كاسىبي مۋزىكالىق ءبىلىمنىڭ, مادەنيەت پەن ونەر ورتالىعى بولىپ تابىلادى. وسى سالادا قىزمەت ەتەتىن جانداردىڭ جاڭا قازاقستاننىڭ يدەولوگياسىن جانداندىرۋدا ەرەكشە ورنى بار جانە الداعى رەفەرەندۋمدا سىزدەردىڭ داۋىستارىڭىز وتە ماڭىزدى», دەدى سەناتور ا.لۋكين.
ۆ.ۆولكوۆ كەزدەسۋدى قورىتىندىلاي كەلىپ الداعى رەفەرەندۋمنىڭ وڭ ناتيجەسى ازاماتتاردىڭ بەلسەندىلىگىنە بايلانىستى بولاتىنىن اتاپ ءوتتى.