پولشانىڭ ۆلاديسلاۆوۆو قالاسىندا وتكەن WTT Youth Contender تۋرنيرىندە قازاقستاندىق ۇستەل تەننيسشىسى الان قۇرمانعاليەۆ تابىستى ونەر كورسەتتى.
اتالعان دودادا 33 مەملەكەتتەن كەلگەن 260 سپورتشى باق سىنادى. 15 جاسقا دەيىنگىلەر اراسىندا قازاقتىڭ ورەنىنە تەڭ كەلەر ەشكىم تابىلمادى. ول قاتارىنان جەتى كەزدەسۋدە جەڭىسكە جەتىپ, باس جۇلدەنى ولجالادى. فينالدا قاراعاندىلىق جاس شەبەر فرانتسيالىق انتۋان نۋارادان باسىم ءتۇستى. جارىس اياقتالعان بەتتە ۇستەل تەننيسىنەن رەسپۋبليكالىق فەدەراتسيانىڭ پرەزيدەنتى دانيار ابىلعازين جەڭىمپاز بەن ونىڭ جەكە باپكەرىن قۇتتىقتادى. «بۇل تابىستىڭ كەزدەيسوق ەمەستىگى انىق. وسى دەڭگەيگە جەتۋ ءۇشىن الان قۇرمانعاليەۆ كوپ ەڭبەكتەندى. سوڭعى ۋاقىتتا عانا ول ITTF ساناتىنداعى حالىقارالىق جارىستاردا 13 مەدال الدى. سونىڭ ارقاسىندا قازاق سپورتشىسى 15 جاسقا دەيىنگىلەر اراسىندا الەمدىك رەيتينگتە كوش باستاپ تۇر. مەن الان جانە ونىڭ جەكە جاتتىقتىرۋشىسى ەلميرا اليەۆانى جارقىن جەڭىستەرىمەن قۇتتىقتايمىن», دەدى د.ابىلعازين.
سونداي-اق قۇرمانعاليەۆ 17 جاسقا دەيىنگى ويىنشىلار اراسىندا كۇمىس مەدالدى يەلەندى. باسەكە بارىسىندا دجۋزەپپە كالاركو (يتاليا), ەگور لاركوۆ (ليتۆا), پيوتر گاۆلاس (پولشا), روحەليو كاسترو (مەكسيكا), لي حويۋن (وڭتۇستىك كورەيا) جانە ناتانا لامانى (فرانتسيا) ۇتقان ول فينالدا وڭتۇستىك كورەيانىڭ تاعى ءبىر وكىلى و چجۋن سۋنۋعا ەسە جىبەردى.