بۇل ايتايىق دەگەنىمىزدىڭ نەگىزگى سارىنى, ايتار ويى ايتىلعان. وسى باس گازەتتىڭ 16 ناۋرىز كۇنگى №51 سانىندا «قالامگەر كومەككە مۇقتاج» دەگەن اتپەن وزىندىك ماسەلە كوتەرگەن شاعىن ماقالام جارىق كورگەن. ول زيالى قاۋىم اراسىندا قىزۋ تالقىعا ءتۇستى.
جالپى قولداۋ تاپتى. زەينەت جاسىنا جەتكەن اقىن-جازۋشىلارعا اي سايىن الاتىن ازعانتاي زەينەتاقىسىنا قوسا, اي سايىن بەلگىلى مولشەردە كومەك اقشا بەرىلگەنى دۇرىس دەگەن قوعامدىق پىكىر قالىپتاستى. قولداۋشى جەتكىلىكتى, وسى تىلەك از عانا ۋاقىت ىشىندە ىسكە اسادى دەپ ۇمىتتەنىپ جۇرگەندەر قاراسى تىپتەن كوپ. بۇرىنعى كەمشىلىكتىڭ ءبارى تۇزەلىپ, دۇنيە ءوز ورنىنا كەلىپ جاتقان بۇگىنگى شاقتا, جاڭا قازاقستان قۇرامىز دەپ تالپىنىپ جاتقان قازىرگى كەزدە بۇل يگى تىلەك تە جۇزەگە اسادى دەگەن ويدامىز.
بۇگىنگى نەگىزگى ايتپاعىمىز مىناۋ ەدى. اقىن-جازۋشىلاردىڭ سوڭعى كەزدەن تارتىپ, وسىعان دەيىن باسپا بەتىن كورگەن ءتۇرلى جازبا دۇنيەلەرىنە, اڭگىمەلەرىنە, ولەڭ-داستاندارىنا, باسقاداي عىلىمي ماقالالارىنا قالاماقى تولەنبەيدى. بۇل ولقىلىقتىڭ ورىن العانىنا دا تالاي جىل بولدى. ەندى قاشانعا دەيىن جالعاسا بەرمەك.
ەكىنشى ايتارىمىز, مەملەكەتتىك ورگاندار جىل سايىن ۇزدىك ادەبي-عىلىمي كىتاپتارعا بايگە جاريالايدى. كىتاپتار ءوز اتالىمى بويىنشا جۇلدەگە قول جەتكىزەدى. بىراق سول العان اقشاسى مۇلدەم ماردىمسىز. انشەيىن كوڭىل الداعان ءبىر از ناپاقا.
ۇشىنشىدەن, بيىل پرەزيدەنتتىڭ شەشىمىمەن «بالالار جىلى» بولىپ بەلگىلەندى. ەندەشە, بالالار ادەبيەتىنە دە كوڭىل بولگەن ءجون. بالالارعا ارنالعان كىتاپتاردىڭ دا تارالىمىن كوبەيتۋ قاجەت. ول ەڭ كەمىندە 10-15 مىڭنان كەم بولماۋعا ءتيىس. سونىمەن قاتار بالالارعا ارناپ جازىلعان كىتاپتاردىڭ اقشاسىن دا ەكى-ءۇش ەسە كوتەرۋ كەرەك. سوندا عانا تۇراقتى بالالار اقىن-جازۋشىلارى قالىپتاسادى.
دانەش احمەت ۇلى,
جازۋشى
الماتى