شايبالى حوككەيدەن قازاقستان ۇلتتىق قۇراماسى فينليانديادا ءوتىپ جاتقان ەليتالى ديۆيزيوننىڭ الەم چەمپيوناتىندا قاتارىنان ەكىنشى ماتچتا جەڭىلىپ, ءوز جانكۇيەرلەرىن تاعى دا جەرگە قاراتتى. يۋري ميحايليس شاكىرتتەرى توپتىق كەزەڭدەگى ەكىنشى تۋر ويىنىن فرانتسيا حوككەيشىلەرىمەن وتكىزىپ, 1:2 ەسەبىمەن قارسىلاستارىنا جول بەردى.
چەمپيوناتتىڭ العاشقى تۋرىندا دانيادان ءىرى ەسەپپەن (1:9) جەڭىلگەننەن كەيىن دە ۇلتتىق قۇرامانىڭ باس باپكەرى يۋري ميحايليس سۆەدبەرگ – (سامات) دانيار, شەۆچەنكو – شەستاكوۆ – اكولزين بەستىگىنە سەنىم ءبىلدىرىپ, العاشقى مينۋتتان باستاپ مۇزايدىنعا شىعاردى. تەك ەكىنشى بەستىكتەگى شابۋىلشى ميحايل راحمانوۆتىڭ ورنىنا ءتورتىنشى بەستىكتىڭ ويىنشىسى كيريلل پانيۋكوۆتى شىعارسا, قورعاۋشى ءادىل بەكەتاەۆ ەگور شالاپوۆتى اۋىستىردى.
دەسە دە, كەزدەسۋدىڭ باستاپقى مينۋتتارىندا قازاقستاندىق حوككەيشىلەر بەلسەندى ويناپ, بىرنەشە قاۋىپتى شابۋىل ۇيىمداستىردى. ناتيجە دە كوپ كۇتتىرگەن جوق. ويىننىڭ التىنشى مينۋتىندا نيكيتا ءميحايليستىڭ وڭ قاپتالدان بەرگەن شايباسى قارسىلاس كوماندانىڭ ءۇش ويىنشىسىنىڭ اراسىنان ءوتىپ, قورعاۋشى ۆالەري ورەحوۆتىڭ كونكيىنە ءتيىپ, قاقپادان تابىلدى. الايدا فرانتسيا قۇراماسىنىڭ باپكەرلەرى ءبىزدىڭ ويىنشى شايبانى كونكيمەن سوقتى دەپ تورەشىلەرگە شاعىم ءتۇسىردى. بەينەقايتالاۋدان كەيىن تورەشىلەر شايبا ويىن ەرەجەسىنە ساي سوعىلعانىنا كوز جەتكىزىپ, ورەحوۆتىڭ گولىن ەسەپكە الدى.
العاشقى كەزەڭ 1:0 ەسەبىمەن قازاقستان قۇراماسىنىڭ پايداسىنا اياقتالعانىمەن, اندرەي شۋتوۆ قىراعىلىق تانىتپاعاندا, ءبىرىنشى 20 مينۋت تەڭ ەسەپپەن اياقتالۋى مۇمكىن ەدى. ايتكەنمەن, فرانتسيالىقتار ءبىرىنشى كەزەڭدە سالا الماعان شايباسىن ەكىنشى كەزەڭدە ارتىعىمەن سوقتى. 32-مينۋتتا الەكساندر تەكسەر مەرگەندىك تانىتىپ, تارازى باسىن تەڭەستىرسە, ەكىنشى كەزەڭنىڭ اياقتالۋىنا 25 سەكۋند قالعاندا سان باسىمدىعىنا يە بولعان ء«ۇش جولاقتى» ەلدىڭ حوككەيشىلەرى قاقپامىزعا ەكىنشى شايباسىن توعىتتى. گولدىڭ اۆتورى – فلوريان شاكياشۆيلي. شەشۋشى, سوڭعى كەزەڭدە قازاقستان قۇراماسى ەسەپتى تەڭەستىرۋگە قانشا تىرىسقانىمەن, ولارىنان ەش ناتيجە شىعارا المادى. قورىتىندى ەسەپ – 1:2.
وسىلايشا, العاشقى تۋردا سلوۆاكيادان (2:4) جەڭىلىپ, قازاقستاندى ءبىر شايبا ايىرماسىمەن ۇتقان فرانتسيا العاشقى ءۇش ۇپايىنا قول جەتكىزىپ, «ا» توبىنىڭ تۋرنير كەستەسىندە التىنشى ورىنعا كوتەرىلدى. ال قاتارىنان ەكى ويىندا جەڭىلىپ, بىردە-ءبىر ۇپاي الا الماعان جەرلەستەرىمىز سوڭعى, سەگىزىنشى ورىندا تۇر. جەتىنشى ورىنداعى يتاليا قۇراماسىنىڭ ەنشىسىندە دە ۇپاي جوق. الايدا ولار شايبا ايىرماشىلىعىمەن عانا ءبىزدىڭ الدىمىزدى وراپ تۇر. قازاقستان مەن يتاليا اراسىنداعى توپتىق كەزەڭنىڭ سوڭعى تۋرىنداعى ويىن ەكى قۇرامانىڭ قايسىسى ەليتالى ديۆيزيوندا قالاتىنىن, قايسىسى ءبىرىنشى ديۆيزونعا تومەندەيتىنىن انىقتاپ بەرۋى ىقتيمال. مۇندا دا ەگەر يتاليا مەن قازاقستان قالعان ويىندارىندا ۇپاي الا الماسا.
«بۇگىن ءبىز ءبىرىنشى ماتچقا قاراعاندا ءتارتىپتى ويىن وتكىزدىك. ءبىرىنشى كەزەڭ ءبىز ءۇشىن جاقسى باستالىپ ەدى. دەر كەزىندە قورعانىستان شابۋىلعا شىعىپ, مۇزايدىننىڭ بوس كەڭىستىكتەرىن ءتيىمدى پايدالانىپ جاتتىق. حوككەيشىلەر دە قارسىلاستىڭ ويىنشىلارىنان اشىلىپ, ءبىر-ءبىرىن ءتۇسىنىسىپ ءتاۋىر ويىن كورسەتتى. وكىنىشكە قاراي, ەكىنشى كەزەڭدە باسىمدىقتى قارسىلاستارعا بەرىپ قويدىق. ءۇشىنشى كەزەڭدە كەزدەسۋدىڭ باعىتىن وزگەرتۋگە تىرىستىق. كوپ قىسىم جاسادىق. بىراق ناتيجە بولعان جوق», دەدى يۋري ميحايليس ماتچتان كەيىن.
توپتىق كەزەڭنىڭ ەكىنشى تۋر ويىندارىنان كەيىن «ا» توبىندا شۆەيتساريا مەن كانادا حوككەيشىلەرى 6 ۇپايمەن تۋرنير كەستەسىندە كوش باستادى. شۆەيتساريا قۇراماسى ەكىنشى تۋردا دانيانى 6:0 ەسەبىمەن جەڭسە, كانادا يتاليانى 6:1 ەسەبىمەن ۇتتى. العاشقى تۋردا كانادادان جەڭىلگەن گەرمانيا بۇل تۋردا سلوۆاكيادان 2:1 ەسەبىمەن باسىم ءتۇسىپ, العاشقى ءۇش ۇپايىنا قول جەتكىزدى. ەكىنشى تۋردان كەيىن ءۇش ۇپاي ولجالاعان دانيا, سلوۆاكيا, گەرمانيا جانە فرانتسيا قۇرامالارى 3-6 ورىندارعا جايعاسقان.
«B» توبىندا دا ەكى تۋردان كەيىن جارىس قوجايىنى فينليانديا, سونداي-اق چەحيانى 3:5 ەسەبىمەن ۇتقان شۆەتسيا حوككەيشىلەرى التى ۇپايمەن ءبىرىنشى جانە ەكىنشى ورىنداردى ءبولىسىپ تۇر. اقش قۇراماسى اۋستريانى وۆەرتايمدا (3:2) جەڭىپ, ءۇشىنشى ورنىن ساقتاپ قالدى. بۋلليت سەرياسىندا ۇلىبريتانيادان ايلاسىن اسىرعان نورۆەگيا چەمپيوناتتاعى ءبىرىنشى جەڭىسىنە قول جەتكىزدى. ەكى ۇپاي ولجالاعان نورۆەگيالىقتار تۋرنير كەستەسىندە التىنشى ورىنعا كوتەرىلدى. بىردە-ءبىر ۇپايى جوق لاتۆيا ازىرگە سوڭعى ورىندا تۇر.
قازاقستان قۇراماسى بۇگىن توپتىق كەزەڭدەگى ءۇشىنشى تۋردا پلەي-وفف كەزەڭىنە وتۋگە بىردەن-ءبىر ۇمىتكەر شۆەيتساريا حوككەيشىلەرىمەن شەبەرلىك بايقاسادى. ەكى قۇراما ەڭ كەيىنگە رەت 2016 جىلى رەسەيدە وتكەن الەم چەمپيوناتىندا كەزدەسىپ, جەرلەستەرىمىز بۋلليت سەرياسىندا 3:2 ەسەبىمەن باسىم تۇسكەن بولاتىن. نەگىزگى ۋاقىتتاعى ەكى گولدى دا رومان ساۆچەنكو سالعان ەدى.