سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد قازاقستاننىڭ تۇڭعىش پرەزيدەنتى اتىنداعى ۇلتتىق قورعانىس ۋنيۆەرسيتەتىنىڭ جەكە قۇرامىمەن كەزدەستى.
سەناتور اسكەري مەكەمەنىڭ تىڭداۋشىلارى مەن پروفەسسورلىق-وقىتۋشىلىق قۇرامىنا كونستيتۋتسياعا وزگەرىستەر ەنگىزۋ جونىندەگى الداعى رەفەرەندۋم تۋرالى ايتىپ, تۇزەتۋلەر نەگىزگى زاڭ باپتارىنىڭ ۇشتەن بىرىنە اسەر ەتەتىنىن ايتتى.
«اتاپ ايتقاندا, پرەزيدەنت وكىلەتتىكتەرىن جۇزەگە اسىرۋ كەزەڭىندە ونىڭ ساياسي پارتيالارعا مۇشە بولۋىنا تىيىم سالىنادى. مەملەكەتتىك ورگانداردا جانە كۆازيمەملەكەتتىك سەكتور سۋبەكتىلەرىندە پرەزيدەنتتىڭ جاقىن تۋىستارىنا باسشى لاۋازىمداردى اتقارۋعا تىيىم سالىنادى. سونداي-اق وكىلدى ورگانداردىڭ وكىلەتتىكتەرىن قالىپتاستىرۋ جانە كۇشەيتۋ ءتارتىبى دەموكراتيالاندىرىلاتىن بولادى. سونىمەن قاتار ءتيىستى زاڭ جوباسىندا كونستيتۋتسيادا جەر جانە ونىڭ قويناۋى, سۋ, وسىمدىك الەمى جانە باسقا دا تابيعي رەسۋرستار قازاقستان حالقىنا تيەسىلى ەكەندىگى تۋرالى نورمانى بەكىتۋ تۋرالى ماڭىزدى مازمۇن جازىلعان», دەدى سەناتور م.قۇل-مۇحاممەد.
كەزدەسۋ بارىسىندا اسكەري قىزمەتشىلەر تاراپىنان باسقا دا كونستيتۋتسيالىق وزگەرىستەرگە قاتىستى, ونىڭ ىشىندە ازاماتتاردىڭ قۇقىقتارىن قورعاۋ تەتىگىنە بايلانىستى ماسەلەلەر ايتىلدى. سەناتور سۇراقتارعا جاۋاپ بەرە وتىرىپ, قولدانىستاعى شارالار ايتارلىقتاي كۇشەيتىلەتىنىن اتاپ ءوتتى.
«ازاماتتاردىڭ قۇقىقتارىن قورعاۋ تەتىگىن كۇشەيتۋ ماقساتىندا كونستيتۋتسيالىق سوت قۇرىلادى, وندا ازاماتتار وزدەرىنىڭ قۇقىقتارى مەن بوستاندىقتارىن تىكەلەي قوزعايتىن نورماتيۆتىك-قۇقىقتىق اكتىلەردىڭ نەگىزگى زاڭعا سايكەستىگىنە ءوتىنىش جاساي الادى. بۇدان بىلاي ءولىم جازاسىنا تولىقتاي تىيىم سالىنادى, ادام قۇقىقتارى جونىندەگى ۋاكىلدىڭ مارتەبەسى كوتەرىلەدى, ونىڭ قىزمەتى كونستيتۋتسيالىق زاڭمەن رەتتەلەدى», دەدى سەناتور.
كەزدەسۋگە قاتىسۋشىلار سونىمەن قاتار كونستيتۋتسياعا حالىقتىڭ ەلدى باسقارۋعا قاتىسۋىن ارتتىرۋ, پارلامەنتتىڭ ءرولى مەن مارتەبەسىن وزگەرتۋ جانە باسقا دا بولىكتەرىندەگى وزگەرىستەردى تالقىلادى.