قازاقستاندىق جاس تەننيسشىلەر شەتەلدەردە ءوتىپ جاتقان بىرنەشە حالىقارالىق تۋرنيردە چەمپيون اتاندى.
ماسەلەن, ىستانبۇلدا ۇيىمداستىرىلعان ءتورتىنشى ساناتتاعى ITF Juniors دوداسىندا اسىلجان ارىستانبەكوۆا مەن ايا نۇپباي جۇپتىق سىندا توپ جاردى. ولار فينالدا قازاقستاندىق كارينا جۇماجانوۆا مەن مىسىرلىق ماريام ءيبراحيمدى 6:1, 6:2 ەسەبىمەن ۇتتى. ءبىر اپتا بۇرىن اسىلجان مەن ايا ىستانبۇلداعى تاعى ءبىر جارىستا ۇزدىك شىققان ەدى.
ال دۋشانبەدە 18 جاسقا دەيىنگى تەننيسشىلەر اراسىندا وتكەن ءدال وسىنداي حالىقارالىق تۋرنيردە ارتۋر حايرۋتدينوۆ پەن يسلام ورىنباسارعا تەڭ كەلەر ەشكىم تابىلمادى. ولار سوڭعى باسەكەدە بەلارۋس وكىلى ارتەم الەكسەيچۋك پەن گەرمان دۋمشەدەن ايلاسىن اسىردى – 6:2, 7:5. وسى جارىستا يسلامنىڭ ءابسوليۋتتى چەمپيون اتاناتىنداي مۇمكىندىگى بولعان ەدى. الايدا ول جەكەلەي سىننىڭ فينالىندا رەسەيلىك ولەگ كولنينوۆقا جول بەردى.
سونداي-اق سلوۆەنياداعى 14 جاسقا دەيىنگىلەر اراسىنداعى Tennis Europe – Grawe Open سەرياسىمەن وتكەن دودادا دامير جالعاسباي جۇپتىق سىندا چەمپيوندىق اتاققا قول جەتكىزدى. ول ۋكراينالىق نيكيتا بەلوزەرتتسەۆپەن بىرگە فينالدا جارىستىڭ التىنشى راكەتكالارى, شۆەتسيالىق لينۋس اندەرسون پەن دانيالىق مادس ءبرۋنحابيدى جەڭدى – 4:6, 6:2, 10:4.