تۇركىستان وبلىسىنىڭ ساۋران اۋدانىنداعى مايدانتال ورتا مەكتەبىن الىس-جاقىنداعى اعايىندار جاقسى بىلەدى. الايدا بۇل مەكتەپتىڭ اتاعى ۇستازدارىنىڭ بىلىكتىلىگى نەمەسە وقۋشىلارىنىڭ ءتۇرلى سيمپوزيۋمدار مەن ءبىلىم وليمپيادالارىندا توپ جارۋىمەن شىققان جوق.
وسىدان جيىرما جىل بۇرىن جەرتولەدەگى بۋدىڭ سالدارىنان ىرگەتاسى سوگىلىپ, قابىرعاسى قاقىراپ, كۇن ساناپ جەرگە شوگىپ بارا جاتقان سوڭ, جەرگىلىكتى ۇستالار ءتورت جاعىنان تەمىرمەن قۇرساۋلاپ, رەلسكە تىگىنەن بەكىتىپ تاستاعان. مىنە, سودان بەرى قۇلاپ قالماي تۇرعانىنا ەل ءالى كۇنگە دەيىن قايران قالادى. جيىرما جىلدا مىڭنان استام تۇلەك توبەسىنە كىرپىش قۇلاماي, امان-ەسەن مەكتەپ ءبىتىرىپ كەتتى.
مايدانتال مەكتەبىنىڭ ديرەكتورى قۋانىش رىسباەۆ بولسا, قانشا جىلدان بەرى جاڭا مەكتەپ سالدىرتۋعا تاپسىرىس بەرىلگەنىمەن, ورىندالماي كەلە جاتقانىن ايتادى. بيىلعى جىلى ساۋران اۋدانى بويىنشا ون ەكى مەكتەپكە كۇردەلى جوندەۋ جۇمىستارى جۇرگىزىلسە, اشا, قىزىلاسكەر, قوجانوۆ, اباي اۋىلدارىندا جاڭا مەكتەپتەر سالىنادى ەكەن. ولاردىڭ قاتارىندا مايدانتال مەكتەبى جوق. ساۋران اۋدانىنىڭ اكىمى عاني رىسبەكوۆ قۇرىلعانىنا ءبىر جىل ەندى تولعان جاڭا اۋدانداعى بارلىق وتىزدان استام اۋىلدى بىرنەشە قايتارا ارالاپ شىعىپ, جەرگىلىكتى تۇرعىندارمەن كەزدەسۋلەر وتكىزىپتى. مايدانتالداعى مەكتەپتىڭ جاعدايىنان تولىق حاباردار ەكەن. ال بىراق جاڭا وقۋ وشاعىنىڭ قاشان بوي كوتەرەتىنى ءالى بەلگىسىز...
ەسكەندىر ەرتاي,
جۋرناليست
تۇركىستان وبلىسى