شىعىس قازاقستان وبلىسىنداعى «تارباعاتاي مۇناي» كومپانياسىنا قىتايعا گاز ەكسپورتتاۋعا تىيىم سالىنۋى مۇمكىن, دەپ حابارلايدى Egemen.kz.
ايماق باسشىسى دانيال احمەتوۆ «تارباعاتاي مۇناي» كومپانياسىنا قحر-عا گاز ەكسپورتتاۋعا تىيىم سالۋ ماسەلەسى بويىنشا جينالىس وتكىزدى.
«بۇل كومپانيا زايسان اۋدانىنىڭ ورتالىعى مەن بىرنەشە كەنتتى كوگىلدىر وتىنمەن قامتاماسىز ەتىپ وتىر. 2024 جىلعا دەيىن تاعى سەگىز ەلدى مەكەندى گازداندىرۋ قاجەت. بۇل رەتتە قازىرگى قورى ەڭ كوپ دەگەندە 12-13 جىلعا جەتەدى. كومپانيا باسشىلىعى الداعى ۋاقىتتا ۇلكەن شىعىنعا ۇشىرايتىنىن, ولاردى قىتايعا 75 ميلليون تەكشە مەتر گاز ەكسپورتى عانا قۇتقاراتىنىن ايتىپ وتىر», دەدى وبلىس اكىمى.
الايدا كاسىپورىن دامۋ جوسپارىن ۇسىنباي, زايسان اۋدانىنىڭ تۇرعىندارىن گازبەن ۇزدىكسىز قامتاماسىز ەتەتىندىگىنە كەپىلدىك بەرگەن جوق.
«كومپانيا 2015 جىلدان باستاپ گاز باعاسىن 6 ەسە كوتەردى. كاسىپورىننىڭ مەنەدجمەنتى كوپتەگەن سۇراق تۋدىرادى. پرەمەر-ءمينيستردىڭ ءبىرىنشى ورىنباسارى رومان سكليار ەنەرگەتيكا مينيسترلىگىنە گاز ءوندىرۋشى كومپانيانىڭ بۇكىل شارتتارى مەن مىندەتتەمەلەرىن قايتا قاراۋدى تاپسىرعان», دەدى دانيال احمەتوۆ.
ونىڭ ايتۋىنشا, بەيىندى مينيسترلىك وكىلدەرى مەن كاسىپورىن باسشىلىعى 11 مامىردا اۋدان تۇرعىندارىمەن كەزدەسىپ, تولعاندىرعان بارلىق سۇراقتارعا جاۋاپ بەرىپ, زايساندى گازبەن ۇزدىكسىز قامتاماسىز ەتۋ تۋرالى مەموراندۋمعا قول قويۋى ءتيىس. ەگەر تالاپتار ورىندالماسا, «تارباعاتاي مۇناي» كومپانياسىنا شەتەلگە گاز ەكسپورتتاۋعا تىيىم سالىنادى.