كەنشىلەر استاناسىندا قازاق كۇرەسىنەن وبلىستىق دەڭگەيدەگى «سارىارقا بارىسى» اتتى تۋرنير ءوتتى. وسىمەن 11-ءشى رەت جالاۋ كوتەرگەن دودادا ءوڭىردىڭ ۇزدىك دەگەن 26 بالۋانى ءوزارا كۇش سىناستى.
اۋىر سالماقتى ءاپايتوس بالۋاندار كۇرەسكەن تۋرنيردە بۇقار جىراۋ اۋدانىنىڭ نامىسىن جىرتقان ەرقانات مولداعۇلوۆ بەلدەسۋلەرىنىڭ ءبارىن ءساتتى وتكىزىپ, جەڭىس تۇعىرىنىڭ ەڭ بيىك ساتىسىنا كوتەرىلدى.
فينالدا ول شەت اۋدانىنىڭ اتىنان شىققان بالۋان اقجىگىت ورالوۆتى تىزە بۇكتىردى. ال جۇلدەلى ءۇشىنشى ورىن جەزقازعان قالاسىنان كەلىپ كۇرەسكەن بەكزات ەرمەكوۆ ەسىمدى بالۋانعا بۇيىردى.
«قازاقستان بارىسى» قازاق كۇرەسىن دامىتۋ قورىنىڭ سپورت مەنەدجەرى جاسۇلان مۇسابەكوۆ اتالعان تۋرنيردە جاس بالۋانداردىڭ كوپ بولعانىن ايتادى. مۇنىڭ ءوزى وڭىردە قازاق كۇرەسىنە دەگەن كوزقاراستىڭ جىلدان-جىلعا جاقسارىپ كەلە جاتقانىن, ناسيحات جۇمىستارىنىڭ جەمىستى جۇرگىزىلە باستاعانىن بىلدىرەدى دەپ اتاپ ءوتتى ول.
سونىمەن «سارىارقا بارىسى» تۋرنيرىندە توپ جارعان قوس بالۋان ەرقانات مولداعۇلوۆ پەن اقجىگىت ورالوۆ شىلدەنىڭ 3-ءى كۇنى ەلوردادا وتەتىن «قازاقستان بارىسى» رەسپۋبليكالىق تۋرنيرىندە قاراعاندى وبلىسىنىڭ نامىسىن قورعايتىن بولدى.
قاراعاندى