قوقىسقا تاستاي سالاتىن قاقپاق بىرەۋدىڭ ءومىرىن ساقتاپ قالاتىنىن بىلەسىز بە؟ كادىمگى بوتەلكەنىڭ پلاستماسسا قاقپاعى قاتەرلى ىسىككە شالدىققان بالالارعا ءومىر سىيلاسا, ەكىنشى جاعىنان تابيعاتتى از دا بولسا تازارتۋعا سەپتەسەدى. جۋىقتا كىتاپحانا قابىرعاسىنان اشىلعان «جاسىل ۇيدە» قاقپاق جيناۋ اكتسياسى باستالعان.
قازاقستان كولەمىندە قولعا الىنعان قايىرىمدىلىق شاراسىنان وسكەمەندىكتەر دە تىس قالعان جوق. «ششەرباكوۆتىڭ جاسىل ۇيىندە» جينالىپ جاتقان قاقپاقتاردى ۆولونتەرلەر قايتا وڭدەۋگە جىبەرەدى. ال قاقپاقتاردى قابىلداپ العان زاۋىت وكىلدەرى تولەنۋى ءتيىس قارجىنى قاتەرلى ىسىككە شالدىققان بالالاردىڭ شوتىنا اۋدارادى ەكەن. راس, اقشالاي كومەك كورسەتە الماساڭىز, قاقپاق وتكىزىپ, ناۋقاس بالالارعا ءومىر سىيلاڭىز. كوشەدەن جيناماي-اق, كۇندەلىكتى تۇتىنعان شىرىننىڭ, ءسۇتتىڭ بوساعان قۇتىلارىنىڭ قاقپاقتارىن جەكە ىدىسقا سالىپ, تولعان كەزدە «جاسىل ۇيگە» اپارىپ وتكىزۋگە ابدەن بولادى. الايدا ءبىر عانا جەرگە جيناقتالماي, قالا مەكتەپتەرى دە قايىرىمدىلىق شاراسىنا قولداۋ كورسەتسە, قۇبا قۇپ بولار ما ەدى. مەكتەپتەر عانا ەمەس, مۇمكىندىگى بار مەكەمەلەردىڭ بارلىعى ات سالىسسا ارتىق بولماس.
– ۇيدە ىدىسقا بوتەلكەلەردىڭ قاقپاقتارىن جيناقتاپ وتىرامىز. تولعان كەزدە وسى كىتاپحاناعا, «جاسىل ۇيگە» الىپ كەلىپ وتكىزەمىز. وسى اكتسيا مەكتەبىمىزدە قولعا الىنسا, ءار وقۋشى اپارىپ وتكىزەر مە ەدى, – دەيدى 7 سىنىپ وقۋشىسى ايلين داۋرەن.
ءيا, كىتاپحانا قىزمەتكەرلەرى دە قاقپاق جينايتىن نۇكتەلەردى كوبەيتۋ كەرەگىن ايتادى. بۇل اكتسيا كورشىلەس مەملەكەتتەردە بۇرىننان جۇرگىزىلىپ كەلەدى ەكەن. ەندەشە, قاراپايىم عانا قاقپاق جيناپ, نەگە قايىرىمدىلىق جاساماسقا؟!