استانا تۇرعىندارى ارحيۆ مەكەمەلەرىن ارالاۋدى ادەتكە اينالدىرعالى قاشان!؟ اسىرەسە ەكىنشى دۇنيەجۇزىلىك سوعىستا ەرلىكپەن قازا تاپقان باتىرلاردىڭ ۇرپاقتارى اتالارىن ىزدەپ, مۇراعاتتارعا جۇگىنەدى. بۇگىندە ەسكى قۇجاتتارعا رەستاۆراتسيا جۇمىستارى جۇرگىزگەلى وقىرمان بىتكەن ىزدەگەنىن لەزدە تاۋىپ الىپ جاتىر. بۇل – نۇر-سۇلتان قالالىق ءارحيۆىنىڭ جەتىستىگى. شاما-شارقىنشا اقپاراتتاردى تسيفرلى فورماتقا كوشىرىپ, زامانعا ساي قام-قارەكەت قىلىپ كەلەدى.
قالالىق ارحيۆ مەكەمەسى زاماناۋي تەحنيكالىق قۇرال-جابدىقتاردىڭ كومەگىمەن بوياۋى وشكەن مالىمەتتەردىڭ ماڭىزىن كىلكىپ ءجۇر. بۇل يگىلىكتى ىسكە جۇمىس ساپارى اياسىندا ءماجىلىس دەپۋتاتتارى نۇرلىبەك وجاەۆ, ءنازيلا راززاق, گۇلدارا نۋرۋموۆا جانە سەناتور ەدىل مامىتبەكوۆ كۋا بولدى.
ەلوردا ءارحيۆىنىڭ ديرەكتورى مەيرام بەكتەمباەۆ جانە نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ ارحيۆ جۇمىسىمەن تانىستىردى. حالىق قالاۋلىلارى رەستاۆراتسيالاۋ زەرتحاناسىنىڭ قىزمەتىن, زاماناۋي اۆتوماتتاندىرىلعان جۇيەسى بار ارحيۆ قويماسىن, RFID (راديومەتكالار), ءدوو (دەرەكتەردى وڭدەۋ ورتالىعى) جانە تسيفرلى ارحيۆ قۇرۋ پروتسەستەرىن تاماشالادى.
«بۇل مەكەمە قازاقستاننىڭ ارحيۆ قىزمەتىنىڭ كوشباسشىلارىنىڭ ءبىرى رەتىندە, ارحيۆتانۋ عىلىمىن دامىتۋدا جانە مەملەكەتتىك باعدارلامالاردى جۇزەگە اسىرۋدا جەتەكشى ءرول اتقارۋدا. 1920-1930 جىلدارداعى قۇجاتتاردى قايتا جاڭعىرتىپ جاتىرمىز. قۇجاتتارداعى اقپاراتتاردىڭ جويىلىپ كەتپەۋى ءۇشىن بار كۇش-جىگەرىمىزدى سالۋدامىز. رەستاۆراتسيالاۋعا ارنالعان سوڭعى ۇلگىدەگى اپپاراتتار وسىندا ورنالاسقان. ۇلت مۇددەسى ءۇشىن قاجىماي ەڭبەك ەتىپ كەلە جاتىرمىز», دەدى قالالىق ارحيۆ ديرەكتورى مەيرام بەكتەمباەۆ.
دەپۋتاتتار قالالىق ارحيۆ قىزمەتىن جوعارى باعالاپ, مەكەمە قىزمەتكەرلەرىنە العىستارىن ءبىلدىردى.