قۇرمەتتى قاسىم-جومارت كەمەل ۇلى!
2020 جىلى ءسىزدىڭ جارلىعىڭىزبەن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرىلىپ, رەسپۋبليكا اۋماعىندا كەشەندى جۇمىستار جۇرگىزىلۋدە.
بۇل – ەڭسەسى بيىك, ەڭبەگى ەرەن ەرلەردىڭ ەسىمدەرىن ەل ەسىندە قالدىرۋعا جəنە قازاقستان تاريحىندا تاڭبالاۋعا ارنالعان يگى باستاما.
وزىڭىزگە ءمəلىم, عاسىر زۇلماتىنىڭ كەسىرىنەن قازاق قوعامىنىڭ ەليتاسى, سول كەزدە ەلىمىزدى باسقارعان مەملەكەت جəنە قوعام قايراتكەرلەرى ۇ.ق ۇلىمبەتوۆ, ج.سəدۋاقاسوۆ, س.ەسقاراەۆ, ن.سىرعابەكوۆ, ت.جۇرگەنەۆ سەكىلدى اسىل ازاماتتار تيراننىڭ تۇزاعىنا ءتۇسىپ, ساياسي رەپرەسسيانىڭ جازىقسىز قۇربانى بولدى.
جوعارىدا اتالعان الاش ارىستارى 1938 جىلى قازىرگى دزەرجينسكي كوشەسى 108-ۇيدە, بۇرىنعى نكۆد تۇرمەسىندە «حالىق جاۋى» رەتىندە اتىلعان. سۇيەكتەرىن قاپشىققا سالىپ, الماتى وبلىسىنىڭ ىلە اۋدانىنداعى بورالداي سايىنا اپارىپ كومگەن. بوزداقتاردىڭ قانىنا بوككەن سايدى حالىق «قاندىساي» دەپ اتاپ كەتكەن. حالىق اۋزىندا ولاردى «وققا ۇشقان 19 ناركوم» دەپ اتاعان.
1988-1991 جىلدارى ارالىعىندا وسى «ون توعىز كوميسسار» ۇرپاقتارىنىڭ تالابىمەن بورالدايدا شاعىن ەسكەرتكىش ورناتىلعان. الايدا يدەولوگيالىق مازمۇننان جۇرداي ەسكەرتكىشتىڭ ارحيتەكتۋرالىق كەلبەتى سىن كوتەرمەيدى, حرونولوگياسى دا بۇرمالانعان.
قازىرگى تاڭدا بۇل ەسكەرتكىش ەلەۋسىز, قاراۋسىز, كۇتىمسىز كۇيدە. تۇتاس قازاق ەلىنە قامقور بولعان الاش ارىستارىنىڭ سۇيەكتەرى جاتقان قارالى, قاسيەتتى جەر بۇگىندە جاستاردىڭ كوڭىل كوتەرۋ ورنىنا, يت-قۇستىڭ مەكەنىنە اينالعان. ءتىپتى قورشاۋى جوق جەر قوقىسقا تولى. ەسكەرتكىش ەسكىرىپ, توزىعى جەتكەن. بۇل – ەلىنە قالتقىسىز قىزمەت ەتىپ, جازىقسىز وققا ۇشقان, ارۋلاپ جەرلەنبەگەن اسىل ازاماتتاردىڭ سۇيەگىن قورلاۋ دەپ سانايمىز!
وكىنىشكە قاراي, 2 ميلليوننان استام حالقى بار الماتى قالاسىنىڭ اۋماعىندا زۇلمات زاماننىڭ قۇرباندارىنا ارنالعان ەسكەرتكىش جوق.
وسى رەتتە سىزدەن بوزداقتار جەرلەنگەن جەرگە قۇربانداردىڭ ءتىزىمى جازىلعان تاقتا ورناتىپ, تəۋلىك بويى ازالى əۋەن وينايتىن جəنە بارلىق تاريحي فاكتىلەر مەن تالاپتارعا سəيكەس كەلەتىن جاڭا ەسكەرتكىش سالۋدى, سونداي-اق قۇرباندارعا قاتىستى قۇجاتتاردى قۇپياسىزداندىرۋ جəنە جاريالاۋدى جىلدامداتۋ مəسەلەسىن قاراستىرۋدى سۇرايمىز.
ساياسي قۋعىن-سۇرگىن قۇرباندارىنا ارنالعان قاستەرلى ورىن – قاسىرەتتى تاريحتان تاعىلىم الاتىن, وسكەلەڭ ۇرپاقتى ۇلىلاردى ۇلىقتاۋعا تəربيەلەيتىن مەكەنگە اينالاتىنى ءسوزسىز.
ءسىزدىڭ قولداۋىڭىزدى سۇرايمىز.
قۇرمەتپەن, ساياسي رەپرەسسيا قۇرباندارىنىڭ ۇرپاقتارى: ورىنشا قارابالينا-قازىباەۆا, قۇرمان سادۋاقاسوۆ, سۇڭقار قارابالين;
عالىمدار: مامبەت قويگەلديەۆ, حانكەلدى ءابجانوۆ, سايىن بورباسوۆ, بەيبىت قويشىباەۆ, ءسابيت شىلدەباي, سۆەتلانا سماعۇلوۆا