سەرگەك قالاداعى سپورت تىنىسى

تاقىرىپتى كەڭىنەن تارقاتۋ ءۇشىن نۇر-سۇلتان قالاسىنىڭ دەنە شىنىقتىرۋ جانە سپورت باسقارماسى وكىلدەرىمەن سويلەسىپ, جۇزەگە اسقان جانە اتقارىلىپ جاتقان جۇمىس­تارمەن تانىستىق.

باسقارما بەرگەن مالىمەت بويىنشا, قازىرگى ۋاقىتتا ەلوردادا دەنە شىنىقتىرۋ جانە سپورت سالاسىندا 11 بالالار مەن جاسوسپىرىمدەر سپورت مەكتەبى, 2 وليمپيادالىق جانە وليمپيادالىق ەمەس سپورت تۇرلەرى بويىنشا سپورتتى دامىتۋ ديرەكتسياسى, سپورتتىق-بۇقارالىق ءىس-شارالاردى وتكىزۋ ديرەكتسياسى, وليمپيادالىق رەزەرۆتى دايارلاۋ ورتالىعى جانە تەننيستەن «داۋ­لەت» سپورت كەشەنى جۇمىس ىستەيدى. ولاردىڭ كونتينگەنتى 60 سپورت ءتۇرى بويىنشا 8 655 سپورتشىنى قامتيدى. قالانىڭ قۇراما كومانداسىندا 5 مىڭنان اسا سپورتشى بار. ال شتاتتىق قۇراما كومانداسىندا 150 ادام بار. ايتا كەتەتىن جايت, 2022 جىلى جازعى سپورت تۇرلەرى بويىنشا ۇلتتىق قۇراما كومانداسى قۇرامىنداعى ەلوردالىق سپورتشىلار سانى 1 165 سپورتشىنى قۇرايدى. ولاردىڭ ىشىندە وليمپيادالىق تۇرلەرى بويىن­شا – 641 ادام, وليمپيادالىق ەمەس سپورت تۇرلەرىندە – 497 ادام, ۇلت­تىق سپورت تۇرلەرى بويىنشا – 27 ادام, پاراليمپيادالىق سپورتتا – 39 ادام, سۋردوليمپيادالىق سپورت تۇرلەرىندە 17 ادام بار. جات­تىقتىرۋشىلاردىڭ جالپى سانى – 408 ادام. ونىڭ 336-ءى – وليم­پيادالىق جانە 72-ءسى – وليم­پيا­دالىق ەمەس جاتتىقتىرۋشىلار. ال شتاتتىق نەگىزدە 286 ادام.

جالپى, ەلوردادا 113 سپورت ءتۇرى جانە ەرەكشە قاجەتتىلىكتەرى بار ادامدار ءۇشىن 36 سپورت ءتۇرى دامىپ جاتىر. مەملەكەت باسشىسىنىڭ تاپسىرماسىن ورىنداۋ ماقساتىندا, سونداي-اق بالالار مەن جاسوسپىرىمدەر جانە بۇقارالىق سپورتتى دامىتۋدىڭ باسىمدىعىن ەسكەرە وتىرىپ, 2021 جىلدان باستاپ 775 ملن تەڭگە (2020 جىلى – 1,975 ملن, 2021 جىلى – 1,2 ملن) كولەمىندەگى قاراجات كاسىبي سپورت تۇرلەرىنەن بالالار مەن جاسوسپىرىمدەر جانە بۇقارالىق سپورتقا بولىنگەن.

«دەنە شىنىقتىرۋمەن جانە سپورتپەن اينالىساتىن ازاماتتاردى قامتۋدى ۇلعايتۋ ماقساتىندا «قولجەتىمدى سپورت» باعدارلاماسى ازىرلەندى. «قولجەتىمدى سپورت» جوباسى ەلوردانىڭ سپورت زالدارىندا جۇزەگە اسىرىلدى. سپورتتىڭ 6 ءتۇرى (فيتنەس/زۋمبا, سكانديناۆيالىق ءجۇرىس, كاراتە, جۇگىرۋ, توعىزقۇمالاق, ۇستەل تەننيسى) بويىنشا ساباقتار قالا بويىنشا 40-تان استام جەردە وتكىزىلدى. مىسالى, سكانديناۆيالىق سەرۋەندەۋ ساياباقتاردا تازا اۋادا ءوتتى. كەز كەلگەن ادام سپورت ءتۇرىن تاڭداپ, اپتاسىنا 3 رەت جاتتىعۋ جاساي الادى. جوبا جوعارى ساناتتى جاتتىقتىرۋشىلار, سپورت شەبەرلەرى جانە بىلىكتى نۇسقاۋشىلارمەن جۇرگىزىلدى. جاتتىعۋلار كلۋب اۋلالارىندا, سپورت ورتالىقتارىندا جانە سپورت سارايلارىندا, سونىڭ ىشىندە QAZAQSTAN جەڭىل اتلەتيكا مانەجىندە, تاۋەلسىزدىك سارايىندا, «الاۋ» مۇز سارايىندا وتكىزىلگەن ەدى. كۇن سايىن Instagram-دا جاتتىعۋلاردان بەينەلەر مەن فوتوسۋرەتتەر جاريالاندى, جازىلۋشىلار ءوز پىكىرى مەن تىلەگىن قالدىردى. قاتىسۋشىلاردىڭ جالپى سانى 5 مىڭنان اسا ادامدى قۇ­رادى», دەدى دەنە شىنىقتىرۋ جانە سپورت باسقارماسىنىڭ ماماندارى.

سونىمەن قاتار باسقارما تاراپىنان 2022 جىلى جوبانى جۇزەگە اسىرۋ ماۋسىمنان جەلتوقسانعا دەيىن جوسپارلانىپ وتىرعانى تۋرالى ماعلۇماتقا قانىقتى. باسا نازار اۋداراتىن جايت, ەلوردادا العاش رەت بوكس ورتالىعى, كوركەم گيمناس­تيكا ورتالىعى, جاۋىنگەرلىك ونەر ورتالىعى, جەكپە-جەك زالى اشىلدى. اتالعان ورتالىقتاردا جاتتىعۋلار قالانىڭ قۇراما جانە بارلىق سپورت مەكتەبىنىڭ سپورتشىلارى ءۇشىن تەگىن وتكىزىلەدى. جاڭا بوكس ورتالىعىندا ءبىر ۋاقىتتا 500-دەن اسا ادام, ال جاۋىنگەرلىك ونەر ورتالىعىندا مىڭنان اسا ادام سپورتپەن شۇعىل­دانا الادى. 2021 جىلى باسقار­ما ۆەدومستۆولىق باعىنىستى ۇيىم­دارمەن جانە سپورت تۇرلەرى بويىنشا قالالىق فەدەراتسيالارمەن بىرلەسىپ 237 سپورتتىق-بۇقارالىق ءىس-شارا وتكىزدى. قاتىسۋشىلاردىڭ جالپى قامتىلۋى شامامەن 15 مىڭ ادامدى قۇرادى.

مەملەكەتتىك سپورتتىق تاپسىرىس شەڭبەرىندە 4-17 جاستاعى بالالار كونتينگەنتى بار سپورتتىڭ 24 ءتۇرى بويىنشا 502 سپورت سەكتسيا­سى قىزمەتىن جۇزەگە اسىرادى. 36 مىڭنان اسا ۆاۋچەر العان بالالار سپورت سەكتسيالارىنا تەگىن قاتى­سادى. ءار بالانىڭ سپورتتىق جانە شىعارماشىلىق باعىتتا 2 ۆاۋچەر الۋعا مۇمكىندىگى بار ەكەنىن ايتا كەتۋ كەرەك.

«قالادا 28 اۋلا كلۋبى بار. قازىرگى ۋاقىتتا حالىقتىڭ الەۋمەتتىك وسال توپتارىنان 3 مىڭنان اسا بالا تەگىن ءبىلىم الۋدا جانە جاتتىعۋدا. 2021 جىلدىڭ قورىتىندىسى بويىنشا قالادا جۇيەلى تۇردە دەنە شىنىقتىرۋمەن جانە سپورتپەن شۇعىلدانۋشىلار سانى 406 552 ادامدى قۇرادى. بۇل تۇرعىنداردىڭ جالپى سانىنىڭ 33,08%-ىن قۇرايدى (2020 جىلى – 340 459 ادام نەمەسە 29,7%), ءوسىم – 3,38 %. 2025 جىلعا دەيىن قامتۋدى 35%-عا دەيىن ارتتىرۋ جوسپارلانۋدا. وسى جىلى تۇڭعىش رەت «دەنە شىنىقتىرۋ جانە سپورت» ماماندىعى بويىنشا ءۇمىتتى سپورتشىلاردى وقىتۋعا باعىتتالعان اكىمنىڭ 50 گرانتىنا اقشالاي قاراجات ءبولۋ جوباسى ىسكە اسىرىلدى. الداعى ۋاقىتتا جاس مامانداردى جۇمىسقا ورنالاستىرۋ مۇمكىندىگى قاراستىرىلادى», دەدى قالالىق دەنە شىنىقتىرۋ جانە سپورت باسقارماسى ماماندارى.

نۇر-سۇلتان قالاسىندا 1 016 سپورت عيماراتى جۇمىس ىستەيدى, ونىڭ ىشىندە كۇنىنە 7 مىڭنان اسا ادام شۇعىلداناتىن 32 ءىرى سپورتتىق نىساندار بار.

تۇڭعىش پرەزيدەنت – ەلباسىنىڭ 2018 جىلعى 12 قازانداعى №772 جارلىعىمەن بەكىتىلگەن, 2018 جىلعى 5 قازانداعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ 46-2 تارماعىنا سايكەس, ەلوردانىڭ ءتورت تۇرعىن الابىندا, اتاپ ايتقاندا, «كوكتال-2», ء«وندىرىس», «ۇركەر» جانە «جەلەزنودوروجنىي» تۇرعىن الاپتارىندا بۇكىل حالىق ءۇشىن جاپپاي دەنە شىنىقتىرۋمەن اينالىسۋعا تەڭ قولجەتىمدىلىكتى قامتاماسىز ەتۋ ماقساتىندا ءتورت دەنە شىنىقتىرۋ-ساۋىقتىرۋ كەشە­نىنىڭ قۇرىلىسى جوسپارلانعان. ولاردىڭ ەكەۋى, ياعني «كوكتال-2» جانە ء«وندىرىس» الاپتارىنداعى دشسك پايدالانۋعا بەرىلىپ, وقۋ-جاتتىعۋ ساباقتارى جۇرگىزىلۋدە. «ۇركەر» جانە «جەلەزنودوروجنىي» تۇرعىن الاپتارىنداعى دشسك قۇرى­لىسىن اياقتاۋ 2023 جىلعا جوس­پارلانىپ وتىر ەكەن.

قالا ماڭىنداعى تۇرعىنداردىڭ سپورتپەن شۇعىلدانۋىنا, ونىڭ ىشىندە مۇمكىندىگى شەكتەۋلى ادام­داردىڭ, حالىقتىڭ الەۋمەتتىك وسال توپتارىنىڭ سپورتپەن شۇعىل­دانۋىنا قادامدىق قولجەتىمدىلىكتى قامتاماسىز ەتۋ, سپورتتى دارىپتەۋ, سالاماتتى ءومىر سالتىن ناسيحاتتاۋ, سونداي-اق قوعامداعى الەۋمەتتىك شيەلەنىستى تومەندەتۋ, ءومىر ساپاسىن ارتتىرۋ, قالا تۇرعىندارىنىڭ بوس ۋاقىتى مەن دەمالىسىن وت­كىزۋگە قولايلى جاعداي جاساۋ ماق­ساتىندا ەلوردانىڭ باسقا دا اسا مۇقتاج اۋداندارىندا سپورت عيماراتتارىن سالۋدى جوسپارلاۋ جۇمىستارى جۇرگىزىلۋدە. سونىمەن قاتار ق.مۇڭايتپاسوۆ اتىنداعى فۋتبول ستاديونى مەن «قازاقستان» سپورت سارايىن قايتا قۇرۋ جانە جاڭعىرتۋ جۇمىستارى جۇرگىزىلۋدە. جۇمىستاردى اياقتاۋدىڭ جوسپارلانعان مەرزىمى – 2023 جىل.