قىزىلوردا وبلىسىندا ۇشەم دۇنيەگە كەلدى, دەپ حابارلايدى Egemen.kz.
سىرداريا اۋدانىنا قاراستى قالجان احۋن اۋىلىندا تۇراتىن قياسوۆتار اۋلەتىندە بۇدان بۇرىن بەس پەرزەنتى بولعان. وتكەن جىلى 34 جاستاعى وتاناسى ەگىز ءسابيدى دۇنيەگە اكەلدى. باقىتبەك قياسوۆ پەن ەلۆيرا ابدىعاپپاروۆانىڭ قۋانىشىن بولىسكەن وبلىس اكىمى نۇرلىبەك نالىباەۆ قۇتتىقتاۋ حاتىن جىبەردى.
حاتتى وبلىستىق ىشكى ساياسات باسقارماسىنىڭ باسشىسى ميرا قازبەكوۆا مەن وبلىستىق دەنساۋلىق ساقتاۋ باسقارماسىنىڭ باسشىسى ءسابيت پازىلوۆ تابىستادى.
«دۇنيە ديدارىنا كەلىپ, اۋلەتتى قۋانىشقا بولەگەن باۋىر ەت بالاپاندارىڭىز ەلىنە ەلەۋلى, ۇلتقا ادال قىزمەت ەتەر ازامات اتانسىن! شاڭىراقتارىڭىزدى قۋانىشقا كەنەلتىپ جاتقان ۇشەمدەردىڭ باۋى بەرىك, ءومىر جاسى ۇزاق بولسىن», دەپ جازىلعان ايماق باسشىسىنىڭ قۇتتىقتاۋىندا.
ايتا كەتەيىك, بۇل قىزىلوردا وبلىسىندا بيىل دۇنيەگە كەلگەن العاشقى ۇشەم. قىزىلوردا ايماعى تۋ كورسەتكىشى بويىنشا ەلىمىزدە الدىڭعى ورىندا كەلەدى. وڭىردە جىلما-جىل 19-20 مىڭ نارەستە ءومىر ەسىگىن اشادى.