الەمدىك ارەنالاردا ەل نامىسىن ابىرويمەن قورعاپ جۇرگەن «قايرات» فۋتزال كلۋبى كەزەكتى رەت قازاقستان بىرىنشىلىگىندە دارا شىقتى. چەمپيوناتتىڭ 31-32 تۋر ويىندارىن سىرت الاڭدا «اتىراۋمەن» وتكىزگەن الماتىلىق ۇجىم الاڭ يەلەرىنەن ەكى ماتچتا دا باسىم ءتۇسىپ, مەرزىمىنەن بۇرىن چەمپيوندىق تاجگە قول جەتكىزدى.
30-تۋر ويىندارىنان كەيىن 65 ۇپاي جيناعان «قايرات» تۋرنير كەستەسىندە ەكىنشى ورىندا كەلە جاتقان «اياتتان» (رۋدنىي) 8 ۇپايعا ۇزاپ كەتتى. وتكەن ەكى تۋردا «ايات» بىرىنشىلىكتە ءۇزىلىس الىپ, «قايرات» ماڭىزدى ەكى ويىندا التى ۇپايعا قول جەتكىزگەن سوڭ, قالعان ءتورت تۋردا قوستانايلىقتاردىڭ «قايراتتى» قۋىپ جەتە المايتىنى بەلگىلى بولدى.
اتىراۋدا وتكەن العاشقى ويىندا قوناقتار 4:1 ەسەبىمەن سەنىمدى تۇردە جەڭىسكە جەتتى. 2-مينۋتتا كەزدەسۋدىڭ ەسەبىن اشقان البەرت اقبالىقوۆ 22 جانە 25-مينۋتتاردا حەت-تريكتىڭ اۆتورى اتانىپ, تابلوداعى كورسەتكىشتى 3:0-گە جەتكىزدى. 34-مينۋتتا «اتىراۋ ساپىنان نۇرسۇلتان ماديەۆ پەنالتيدى ءساتتى ورىنداپ, ەسەپ ايىرماسىن قىسقارتتى. ماتچتىڭ اياقتالۋىنا ەكى مينۋت قالعاندا شىڭعىس ەسەنامانوۆ مەرگەندىگىمەن كوزگە ءتۇسىپ, ويىننىڭ نۇكتەسىن قويدى – 4:1.
ەكىنشى كۇنگى كەزدەسۋدە الماتىلىقتار ماتچ پەن چەمپيوندىقتىڭ تاعدىرىن ءبىرىنشى تايمنىڭ وزىندە-اق شەشىپ تاستادى. 9-مينۋتتا «قايراتتىڭ» رەسەيلىك لەگيونەرى اندرەي گرافسكي گول سوقسا, ارتىنشا 2021 جىلعى قازاقستاننىڭ ۇزدىك ويىنشىسى داۋرەن تۇرساعۇلوۆ ەسەپتى ەسەلەدى. ال 32-مينۋتتا الىستان تاماشا سوققى جاساعان ا.گرافسكي ءدۋبلدىڭ اۆتورى اتاندى. ماتچ سوڭىندا اتىراۋلىق باۋىرجان ومىرباەۆ كەزەكتى ايىپ سوققىسىنان كەيىن الەمنىڭ بەس دۇركىن ۇزدىك قاقپاشىسى يگيتانى قاپى قالدىرىپ, ادەمى گول سوقتى – 3:1. وسىلايشا ەكى ويىندا ماڭىزدى التى ۇپايعا قول جەتكىزگەن «قايرات» 71 ۇپايمەن «اياتپەن» اراداعى ۇپاي سانىنىڭ ايىرماشىلىعىن 14-كە جەتكىزدى.
ال ەكى ويىندا ءبىر-بىردەن گول سوققان «اتىراۋ» كەزەكتى رەت جەڭىلىپ, كۇمىس جۇلدەدەن كۇدەرىن ۇزە باستادى. ازىرگە اتىراۋلىقتار ەكىنشى ورىنداعى «اياتتان» ءۇش ۇپايعا قالىپ تۇر. الايدا رۋدنىي كومانداسى «مۇنايشىلارعا» قاراعاندا ەكى ويىن كەم وتكىزگەن. ەگەر «ايات» الداعى دەمالىس كۇندەرى وتەتىن كەزەكتى تۋردا ەلوردانىڭ «نۇر-سۇلتان» كومانداسىنان ەكى ماتچتا دا ۇپاي الاتىن بولسا, وندا «اتىراۋ» ەكىنشى ورىننان ءۇمىتىن ۇزەدى دەگەن ءسوز. ءسويتىپ چەمپيوناتتا «اتىراۋ» مەن «كاسپي» اراسىندا ءۇشىنشى ورىنعا تالاس قىزا تۇسپەك. ويتكەنى «اتىراۋدان» جەتى ۇپايعا قالىپ تۇرعان «كاسپي» ءتورتىنشى ورىندا كەلەدى. سونداي-اق اقتاۋلىق كوماندانىڭ ەنشىسىندە قوسىمشا تاعى ەكى ويىنى بار.
«كاسپي» كەلەسى تۋردا ەسكى دە جاڭا ەل چەمپيوندارى – «قايراتپەن» كەزدەسەدى. بيىلعى تاپسىرمانى مەرزىمىنەن بۇرىن ورىنداعان الماتىلىق كوماندا بۇل ويىندا الاڭعا جاس ءارى قاجەتتى دەڭگەيدە ويىن تاجىريبەسىنە يە بولا الماي جۇرگەن فۋتزالشىلارىن شىعاراتىنى انىق. سوندىقتان «كاسپيگە» ءۇشىنشى ورىنعا كوتەرىلۋگە تاماشا مۇمكىندىك تۋىپ تۇر. اقتاۋلىقتار وتكەن تۋردا تۋرنير كەستەسىندە بەسىنشى ورىندا تۇرعان «اقتوبەمەن» كەزدەسىپ, العاشقى ويىندا 9:4 ەسەبىمەن باسىم تۇسسە, ەكىنشى ويىندا تەڭ ەسەپ تىركەلدى – 4:4.
التىنشى ورىنداعى ورالدىڭ «بايتەرەك» كلۋبى مەن سەگىزىنشى ساتىداعى اقتوبەنىڭ «راحمەتى» ءبىر-بىردەن جەڭىسكە جەتسە, «نۇر-سۇلتان» (№7) مەن «وقجەتپەس» (№9) كلۋبى اراسىنداعى ەكى ويىندا دا ەلوردالىقتاردىڭ مەرەيى ۇستەم بولدى (6:4, 6:0). تۋرنير كەستەسىندە سوڭعى ورىندا قالىپ قويعان كوكشەتاۋ كومانداسى بيىلعى چەمپيوناتتىڭ پلەي-وفف كەزەڭىنەن تىس قالدى. ەندى الداعى ءتورت تۋردا ەكىنشى جانە ءۇشىنشى ورىن يەگەرلەرى مەن شيرەك فينالدىڭ جۇپتارى بەلگىلى بولماق.