نەمىس قىزدارىن بەت قاراتار ەمەس

قازاقستان تەننيس فەدەراتسياسىنىڭ مالىمەتى بويىنشا ە.رىباكينا العاشقى اينالىمدا دۇنيەجۇزىلىك رەيتينگتە 224-ورىندا تۇرعان, جارىسقا ارنايى شاقىرتۋمەن قاتىسىپ جاتقان گەرمانيالىق ناستاسيا-ماريانا شۋنك­پەن شەبەرلىك بايقاستى. قارسىلاستار بۇعان دەيىن كەزدەسپەگەن. وتكەن اپتادا ەلوردادا قازاقستان-گەرمانيا ماتچىندا لاۋرا زيگە­مۋند پەن انجەليكا كەربەردى ۇتقان ەلەنا بۇل جولى دا نەمىس قىزىن قاپى قالدىردى. ءبىرىنشى پارتيادا 19 جاستاعى تەننيسشى 4:2 ەسەبىمەن العا شىققانىمەن, قازاقستاندىق تەننيسشى تارازى باسىن تەڭەستىردى. تاي-برەيكتە ە.رىباكينا باسىمدىق تانىتتى – 7:6 (7:3). ەكىنشى سەتتى ەلەنا برەيكپەن باستادى – 2:0. الاي­دا ماتچقا دوپ بەرگەندە, شۋنك برەيك جاساپ كەتتى – 5:5. دەگەنمەن رىباكينا سول بويدا قاي­تادان برەيككە قول جەتكىزدى – 6:5. سوڭعى گەيم­دە وتانداسىمىز مۇمكىندىگىن ءمۇلت جىبەرگەن جوق – 7:5.

ە.رىباكينا جۇلدە قورى 703 580 اقش دوللارىنا باعالانعان دودانىڭ شيرەك فينالىنا ءوتۋ ءۇشىن الەمنىڭ 3-راكەتكاسى, يسپانيالىق پاۋلا بادوساعا قارسى كورتقا شىعادى.