ءۇندىستاننىڭ باس شاھارى – نيۋ-دەليدە تەننيستەن 14 جاسقا دەيىنگىلەر اراسىندا World Junior Tennis Competition 14&under ازيا/تىنىق مۇحيت ايماعى ىرىكتەۋ كەزەڭىنىڭ جەرەبەسى تارتىلدى.
قازاقستان تەننيس فەدەراتسياسىنىڭ مالىمەتى بويىنشا, قازاقستاندىق تەننيسشى قىزدار D توبىندا وزبەكستان, يران جانە نەپال قۇرامالارىمەن سىنعا تۇسەتىن بولدى. كەشە جەرلەستەرىمىز نەپال تەننيسشىلەرىنە قارسى العاشقى ويىنىن وتكىزدى. ال جالپى ىرىكتەۋ ءتۋرنيرى 18-23 ءساۋىر ارالىعىندا وتەدى. بۇل سىندا ەل نامىسىن ەۆا كورىشەۆا (اقتوبە), اريانا گوگۋلينا (نۇر-سۇلتان) جانە ءساتيما تورەگەن (الماتى) قورعايدى. كوماندا كاپيتانى – مۇقام ەرماتوۆ.
ايتا كەتەيىك, وتكەن اپتانىڭ سوڭىندا تەننيستەن قازاقستان قىزدار قۇراماسى بيللي دجين كينگ كۋبوگى جولىنداعى جارىستىڭ ىرىكتەۋ كەزەڭىندە گەرمانيا قۇراماسىنان باسىم ءتۇسىپ, تۇڭعىش رەت اتالعان ءتۋرنيردىڭ فينالىنا جولداما جەڭىپ العان ەدى.