بۇل كۇندەرى ەلىمىزدىڭ ەكى قالاسىندا, اتاپ ايتقاندا, قاراعاندى مەن پەتروپاۆلدا شايبالى حوككەيدەن قازاقستان چەمپيوناتىنىڭ فينالدىق ويىندارى ءوتىپ جاتىر. ەل بىرىنشىلىگىنىڭ پلەي-وفف كەزەڭىندە بارلىق قارسىلاسىنان باسىم تۇسكەن قاراعاندىنىڭ «سارىارقاسى» مەن كوكشەتاۋدىڭ «ارلانى» بيىل قاتارىنان ەكىنشى جىل قازاقستان Pro Ligasy-نىڭ باس جۇلدەسىن ساراپقا سالىپ جاتىر.
بىلتىرعى ەل بىرىنشىلىگىنىڭ جەڭىمپازى «سارىارقا» پلەي-وفف كەزەڭىنىڭ جارتىلاي فينالىندا ەلوردانىڭ «نومادىمەن» كەزدەسىپ, قاراعاندىلىق حوككەيشىلەر سوڭعى, شەشۋشى ماتچتا قارسىلاستىرىن ءىرى ەسەپپەن جەڭىپ, جارىستىڭ فينالىنا شىقتى. جالپى ەسەپ – 4:2. ال جارتىلاي فينالدىڭ ەكىنشى جۇبىندا ونەر كورسەتكەن كوكشەتاۋدىڭ «ارلانى» جەتىنشى كەزدەسۋدە اتىراۋدىڭ «بەيبارىسىن» 2:1 ەسەبىمەن قاپى قالدىرىپ, جالپى سەريادا 4:3 ناتيجەسىمەن فينالدىق سايىسقا جولداما الدى.
ەكى فيناليست اراسىنداعى العاشقى كەزدەسۋ قاراعاندىداعى التى مىڭعا جۋىق جانكۇيەر سىياتىن «قاراعاندى-ارەنا» مۇزايدىنىندا ءوتىپ, قاراعاندىلىق كوماندا كۇتپەگەن جەردەن «ارلاننان» جەڭىلىپ قالدى. قاراعاندىلىق حوككەيشىلەر ماتچتىڭ ءبىرىنشى كەزەڭىندە كوكشەتاۋلىقتاردىڭ قاقپاسىنا تولاسسىز شابۋىل ۇيىمداستىرعانىمەن, يليا رۋميانتسەۆ قورعاعان قاقپادان ساڭىلاۋ تابا المادى. دەگەنمەن ەكىنشى كەزەڭنىڭ 36-مينۋتىندا مۇزايدىن يەلەرىنەن ميحايل راحمانوۆ مەرگەندىك تانىتىپ, ماقتاۋلى رۋميانتسەۆتەن ايلاسىن اسىردى. ءۇشىنشى 20 مينۋتتىقتا ويىنعا وزگەرىس جاساعان قوناقتار اينالدىرعان ءتورت مينۋتتىڭ ىشىندە ەكى شايبا سوعىپ, تارازى باسىن وزدەرىنە اۋداردى. 44-مينۋتتا رومان بەردنيكوۆ ويىنداعى ەسەپتى تەڭەستىرسە, 48-مينۋتتا رومان گرابورەنكو كومانداسىنىڭ ەكىنشى شايباسىن سوعىپ, ماڭىزدى جەڭىس سىيلادى – 2:1.
اراعا ءبىر كۇن سالىپ ەكى كوماندا قاراعاندىدا ەكىنشى ويىنىن وتكىزدى. بۇل كەزدەسۋدە دە كوكشەتاۋلىق كوماندا جەڭىسكە ءبىر تابان جاقىن تۇرعان ەدى. الايدا وۆەرتايمدا مىقتىلىق تانىتقان «سارىارقا» ويىنشىلارى جەڭىستى ج ۇلىپ الدى – 4:3. وسىلايشا, العاشقى ەكى ويىننان كەيىن سەرياداعى ەسەپ تەڭەستى.
ءبىرىنشى كەزەڭدە مۇزايدىن يەلەرىنەن كيريلل بەلياەۆ ءدۋبلدىڭ اۆتورى اتانسا, قوناق كوماندا ساپىنان الەكساندر مەنششيكوۆ پەن ۆيتالي جيلياكوۆ گول سوقتى. ال ءۇشىنشى كەزەڭدە ۆلاديمير بوروۆكوۆ «ارلاندى» العا شىعارعانىمەن, ماتچ اياقتالار تۇستا ميحايل راحمانوۆ تارازى باسىن تەڭەستىرىپ كەتتى. ءسويتىپ, ويىن وۆەرتايمعا ۇلاستى. قوسىمشا ۋاقىتتا الەكساندر بوريسەۆيچ مەرگەندىگىمەن كوزگە ءتۇسىپ, «سارىارقاعا» جەڭىس سىيلادى. سەريانىڭ كەلەسى ماتچتارى پەتروپاۆلدا وتەدى.
2021/22 جىلعى تۋرنير رەگلامەنتىنە سايكەس, ½ فينالدىڭ قورىتىندىسى بويىنشا جەڭىلىسكە ۇشىراعان جانە تۇراقتى چەمپيوناتتىڭ ناتيجەسى بويىنشا جوعارى ورىن العان «بەيبارىس» بيىلعى Pro Ligasy-نىڭ قولا جۇلدەگەرى اتاندى.