ۇلى قازاقتىڭ ۇشقان ۇياسىنا قاراساڭىز ۇلان-عايىر دالانىڭ ءبىر پۇشپاعىنداعى قويشى اۋىلى قول بۇلعايدى. تۇيە ءمىنىپ ءتورت ت ۇلىگىن تۇگەندەگەن الاش بالاسىنىڭ اتادان قالعان اماناتى وسى – تۇياقتى مال. سوعان ساي سالت-ءداستۇرى دە سارالانىپ, جاڭا ورىستەي جاڭعىرىپ تۇرادى. سول ءۇردىستىڭ ءبىر ۇزىگى وسى شىعارمانىڭ التىن ارقاۋى سەكىلدى. جايلاۋداعى شوپاننىڭ ءانى مايداقوڭىر سامال جەلمەن بىرگە تەربەلىپ تۇرعانداي.
قازاقتىڭ ماڭدايىنا بىتكەن قىلقالام شەبەرى مولداحمەت كەنباەۆتىڭ «شوپان ءانى» كارتيناسى اۋىل بالاسىنىڭ اسقاق ارمانىنىڭ شامشىراعى ىسپەتتى. ناعىز قازاقتىڭ بەكزات بولمىسىن, دارقان ديدارىن, قويۋ پورترەتىن شوپاننىڭ بويىنا قۇيىپ قويعانداي.
بىلايعى جۇرتقا بەيتانىس مولداحمەت كەنباەۆ – قازاق دالاسىنىڭ ناعىز جىرشىسىنا اينالعان سۋرەتشىلەردىڭ ءبىرى. ونىڭ كارتينالارىندا تابيعات اداممەن, شوپاننىڭ ەڭبەگىمەن تىعىز بايلانىستى. سودان دا بولار پەيزاجدىق كومپوزيتسيالارىنىڭ جانرلىق باستاۋى سولاردان باستاۋ الادى.
1954 جىلى تىڭ جەرلەردى يگەرۋ باستالدى. جوعارى كۋرس ستۋدەنتتەرى ماسكەۋدەن تىڭ يگەرۋگە ءىس-تاجىريبەگە كەلدى. ولار كوكشەتاۋ وبلىسىنداعى ەسىل وزەنىنىڭ بويىندا شاتىرلاردا تۇرىپ جاتتى. ءدال وسى جەردە شوپانداردىڭ ەڭبەگىنە ارنالعان كارتينا جازۋ يدەياسى تۋادى.
شىنىندا «شوپان ءانى» ونىڭ ەڭ ۇزدىك كارتينالارىنىڭ بىرىنە اينالدى. كارتينا بوز, جوسا, قوڭىر سىندى نازىك تۇستەرمەن جازىلعان. بۇل سامال جەل تەربەتكەن جىبەكتەي بەتەگەلى دالانى انىق جەتكىزىپ تۇر. كارتينادا تۇستەردىڭ بارلىعى وتە تانىس ءارى بارىنشا تابيعي. كوكجيەگى بيىك, ۇشى-قيىرى جوق كەڭ دالانىڭ تەگىستىگى مەن تىنىشتىعىن ەش نارسە بۇزا المايدى. تەك تۇيە مىنگەن شوپاننىڭ تۇلعاسى مەن جايىلىپ جۇرگەن قويلار عانا وسى فوندا ەرەكشەلەنىپ تۇر. ول تۋعان جەردىڭ سۇلۋلىعىن جىرلايدى. ول – وسى شەكسىز ۇلى دالانىڭ قوجايىنى, سوندىقتان كەڭ دالاعا تاكاپپارلىقپەن قاراپ تۇر.
اتالعان شىعارمادا ءۇنسىز ۇيلەسىم بار, ادامزاتتىڭ تابيعاتپەن بايلانىسى سۋرەتشى ءۇشىن ماڭىزدى سانات رەتىندە اشىلعان. اسىرەسە جايلاۋداعى قازاقتىڭ قوڭىر كەلبەتى مەن كەڭپەيىل مىنەزىن ادەمى ۇيلەستىرگەن.