كوشى-قون قىزمەتى ورگاندارىنىڭ دەرەكتەرى بويىنشا, 2022 جىلعى قاڭتار-اقپاندا قازاقستاننان 3520 ادام كەتىپ, ەلگە 2869 ادام كەلگەن. وسىلايشا كوشى-قون سالدوسى - 651 ادامدى قۇرادى, دەپ حابارلايدى Egemen.kz.
«ەلدىڭ نەگىزگى كوشى-قون الماسۋى تمد مەملەكەتتەرىمەن ءجۇرىپ جاتىر. تمد ەلدەرىنەن كەلگەندەردىڭ ۇلەسى 87,3%-دى, كوشىپ كەتكەندەردىڭ ۇلەسى - جالپى كوشىپ-قونۋشىلار سانىنىڭ 79,2%-ىن قۇرادى», دەلىنگەن ۇلتتىق ستاتيستيكا بيۋروسىنىڭ اقپاراتىندا.
سونىمەن قاتار ەل ىشىندە كوشىپ-قونۋشىلار سانى 12,6%-عا ازايدى.
وڭىرارالىق اۋىسۋلار بويىنشا حالىقتىڭ كوشى-قونىنىڭ وڭ سالدوسى ەلدىڭ ءتورت وڭىرىندە قالىپتاستى: نۇر-سۇلتان (5447 ادام), الماتى (5734 ادام), شىمكەنت (776 ادام) جانە ماڭعىستاۋ وبلىسى (7 ادام).