ەستونيا استاناسى – تالليندە ءوتىپ جاتقان مانەرلەپ سىرعاناۋدان جاستار اراسىنداعى الەم چەمپيوناتىندا قازاقستاندىق سپورتشى ميحايل شايداروۆ جوعارى ناتيجەگە قول جەتكىزىپ, جاھاندىق دودانىڭ كۇمىس جۇلدەسىن جەڭىپ الدى.
مۇنى قازاقستان مانەرلەپ سىرعاناۋ تاريحىنداعى ءىرى جەتىستىكتىڭ ءبىرى دەپ ايتۋعا تولىق نەگىز بار. ويتكەنى بۇعان دەيىنگى جاستار اراسىنداعى الەم بىرىنشىلىگىندە تالاي ورەندەرىمىز باق سىناسا دا, بىردە-بىرىنە جۇلدەگەرلەر قاتارىنان كورىنۋ باقىتى بۇيىرماعان ەدى. ءتىپتى وليمپيا ويىندارىنىڭ جۇلدەگەرى جانە قاتىسۋشىسى بولعان دەنيس تەن مەن جاراقاتىنا بايلانىستى بىلتىر عانا كارەراسىن اياقتاعان ەليزابەت تۇرسىنباەۆا دا الەمدىك سىندا ونەر كورسەتكەنىمەن, ەكەۋى دە جۇلدەگە سىنىق سۇيەم قالعاندا ءسۇرىنىپ, جارىستى ءتورتىنشى ورىنمەن اياقتاعان بولاتىن.
ەستونياداعى دودانىڭ جەكەلەي باعدارلاماسىندا ونەر كورسەتكەن 17 جاستاعى وتانداسىمىز تورەشىلەردىڭ 234,31 ۇپايىنا يە بولىپ, الەم چەمپيوناتىنىڭ كۇمىس جۇلدەسىن جەڭىپ الدى. باس جۇلدەنى 17 جاستاعى امەريكالىق يليا مالينين (276,11 ۇپاي) يەلەنسە, قولا جۇلدە 19 جاستاعى جاپونيالىق تاتسۋيا تسۋبويگە (233,82) بۇيىردى.