شىعىس قازاقستان وبلىسىندا ءساۋىر ايىنىڭ باسىنان بەرى 150 دالا ءورتى ءسوندىرىلدى, دەپ حابارلايدى Egemen.kz.
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, وڭىردە ءساۋىر ايىندا باستالعان ءورت قاۋپى جوعارى كەزەڭ 180 كۇنگە سوزىلادى.
«وسى كەزەڭدە ورمان جانە دالا ورتتەرىنىڭ الدىن الۋ ماقساتىنداعى ءىس-شارالار جوسپارى بەكىتىلدى. بىرلەسكەن رەيد جۇرگىزۋ ءۇشىن ازاماتتىق قورعاۋ قىزمەتكەرلەرىنەن ءموبيلدى توپتار قۇرىلدى. «Geosat» جشس-مەن تەرمونۇكتەلەر بويىنشا عارىشتان مونيتورينگ جۇرگىزۋ ءۇشىن ءتيىستى شارت جاسالدى. بۇگىنگى تاڭدا وسىنداي باقىلاۋدىڭ كومەگىمەن قۇتقارۋشىلار ءورتتىڭ تارالۋىن ۋاقتىلى تەجەپ ۇلگەردى», دەلىنگەن اقپاراتتا.
وسى اي باستالعالى بەرى ايماق بويىنشا 150-گە جۋىق دالا ءورتى شىققان. تجد قىزمەتكەرلەرى كۇن سايىن 30 رەتكە دەيىن قىزىل جالىندى سوندىرۋگە شىعادى.
«ساياجايلارداعى ءورتتىڭ كوپشىلىگى كوكتەم كەزىندە بولادى. ءۇي يەلەرى ءورت قاۋىپسىزدىگى ەرەجەلەرىن ورەسكەل بۇزىپ جاتادى. اكىمشىلىك قۇقىق بۇزۋشىلىق تۋرالى كودەكستىڭ 336-بابىنا سايكەس وسى تالاپتاردى ساقتاماعان ادامعا 20 اەك مولشەرىندە ايىپپۇل سالىنادى», دەيدى دەپارتامەنتتىڭ مەملەكەتتىك ءورت باقىلاۋ باسقارماسى باستىعىنىڭ ورىنباسارى نۇرجان ءومىرجانوۆ.