پاۆلودار قالاسىندا شاھاردىڭ شىرايىن بۇزعان «ساقالدى» قۇرىلىستار از ەمەس. كاسىپكەرلەردىڭ جوبانى اياقتاۋعا قاراجاتى جەتپەدى مە ەكەن, الدە ىرگەتاسى قالانعاننان كەيىن جايباراتتىققا جول بەردى مە ەكەن؟ نە دەسەك تە, وبلىس اكىمدىگى بۇل ماسەلەنى شەشۋدى مىقتاپ قولعا العاننان بەرى كەيبىر قۇرىلىسقا قان جۇگىرە باستادى.
قۇرىلىسى اياقسىز قالعان جوبالار ەكىباستۇز جانە اقسۋ قالالارىندا دا از ەمەس. قاڭىراپ بوس تۇرعان عيماراتتاردىڭ كوبى – كاسىپكەرلىك نىساندارى. قوجايىنداردىڭ ارقايسىسىمەن ءتۇسىندىرۋ جۇمىستارى جۇرگىزىلىپ, جوبانى اياقتاۋ ءۇشىن ءتيىمدى تەتىكتەر ۇسىنىلۋدا. نىسان يەلەرىنىڭ كەيبىرى عيماراتتى بۇزىپ, قۇرىلىس ماتەريالىن ساتۋعا كوشكەن. ال ءبىرى ينۆەستور ىزدەۋدە. ەسكەرتۋگە قۇلاق اسپاعاندارمەن اڭگىمە بولەك. ماسەلەن, بىلتىر ەكىباستۇز قالاسىنىڭ اكىمدىگى ءۇنسىز جاتقان عيمارات يەلەرىن سوتقا بەرگەن-ءدى. وسىلايشا, وبلىس باسشىلىعىنىڭ باستاماسى بويىنشا رەسپۋبليكالىق دەڭگەيدە قولدانىستاعى اباتتاندىرۋ ەرەجەلەرىنە تۇزەتۋلەر ەنگىزۋ ماسەلەسى قاراستىرىلۋدا. ماماندار قۇرىلىسى ۇزاققا سوزىلعان نىساننىڭ يەسىن اۋماقتى قورشاۋ, ونىڭ ساۋلەتتىك بەينەسىن قالپىنا كەلتىرۋ جانە بوگدە ادامداردىڭ كىرۋىنە تىيىم سالۋدى زاڭنامالىق تۇرعىدان مىندەتتەۋدى ۇسىنىپ وتىر. بۇل ءوز كەزەگىندە مەملەكەتتىك ورگاندارعا جاعدايدى باقىلاۋدا ۇستاپ, ءتيىستى شارالاردى قابىلداۋعا مۇمكىندىك بەرۋگە ءتيىس.
اكىمدىكتەگىلەردىڭ قاتاڭ شاراسىنىڭ اسەرى مە, الدە قالتاسى قاراجاتقا تولدى ما, ايتەۋىر كۇن جىلىنعاننان بەرى كاسىپكەرلەر قۇرىلىس جۇمىستارىن اياقتاۋعا كىرىستى. وعان قۋانۋىمىز بەكەر ەكەن. كەيبىر قۇرىلىس نىساندارى جالپىعا ورتاق جەردە سالىنىپ, تۇرعىنداردىڭ اشۋىن تۋعىزۋدا. سويتسەك, ينجەنەرلىك-كوممۋنيكاتسيالىق جەلىلەر وتەتىن ۋچاسكەلەر الدەقاشان جەكەنىڭ قولىنا ءوتىپ كەتكەن. «ساقالدى» قۇرىلىس بولعاندىقتان كەزىندە رۇقسات قاعازىن ۇلەستىرگەن شەندىلەردى تابۋ قيىن شىعار. بۇل جەردە سىبايلاس جەمقورلىقتىڭ ءيسى شىعاتىنى ايتپاسا دا تۇسىنىكتى.
جاقىندا الەۋمەتتىك جەلىلەردە تۇرعىندار دابىل قاعىپ, م.گوركي, 27/1 جانە ساتباەۆ, 245/1 مەكەنجايلارى بويىنشا سالىنىپ جاتقان تۇرعىن ءۇي قۇرىلىسىنىڭ قانشالىقتى زاڭدى ەكەنىن قۇزىرلى ورگانداردان تالاپ ەتتى. الاڭداۋعا نەگىز بار. سەبەبى قۇرىلىس جۇمىستارى سۋ جانە كارىز جۇيەلەرى وتەتىن ۋچاسكەدە جالعاسۋدا. بەلگىلى بولعانداي, جەر ۋچاسكەسى ءاۋ باستا اۆتوتۇراق رەتىندە ساتىپ الىنىپتى. كەيىن جەردى پايدالانۋ ماقساتى «تۇرعىن ءۇي قۇرىلىسىن جۇرگىزۋ» رەتىندە وزگەرتىلگەن. ول اۋماقتا ديامەترى 150 مم بولاتىن شارۋاشىلىق سۋ قۇبىرلارى مەن ديامەترلەرى 300 مم جانە 700 مم كارىز كوللەكتورلارى ورنالاسقان. كوللەكتور ساتباەۆ-ءماشھۇر ءجۇسىپ, م.گوركي-شوكين كوشەلەرىنىڭ اۋماعىنداعى كوپقاباتتى ۇيلەرگە, الەۋمەتتىك نىساندارعا, بالاباقشالار مەن مەكتەپتەرگە قىزمەت كورسەتەدى. اتالعان اۋدانداعى جالعىز جۇيە ەكەنىن دە اتاپ وتكەن ءجون. سوندىقتان ونىڭ ۇستىنەن ءۇي تۇرعىزۋ دۇرىس ەمەس دەپ ەسەپتەيدى تۇرعىندار. ەكىنشى تاراپ ءوز كەزەگىندە ءتيىستى قۇجاتتاردى كورسەتىپ, ەشقانداي زاڭبۇزۋشىلىق جوق ەكەنىن العا تارتۋدا. بۇل ىسكە «پاۆلودار-ۆودوكانال» جشس باسشىسى اناتولي مويسەي ارالاسىپ, ءمان-جايدى ءتۇسىندىرىپ بەردى.
– «پاۆلودار-ۆودوكانال» جشس ەكى كوپقاباتتى ءۇيدىڭ قۇرىلىسىن ەمەس, سۋمەن قامتۋ جانە سۋدى ءبولۋ جەلىلەرىنىڭ ورنالاسقان جەرىن اۋىستىرۋدى عانا ماقۇلدادى. ال سۋ جەلىلەرىنە قوسىلۋ ءۇشىن تەحنيكالىق شارت بەرۋگە قاتىستى ءوتىنىش كەرى قايتارىلدى. سونىمەن قاتار جەكەمەنشىك كومپانيانىڭ قۇرىلىس جۇرگىزۋگە رۇقسات بەرەتىن قۇجاتتارى جوق. جەردى پايدالانۋ ماقساتىن ينجەنەرلىك جەلىلەرگە قىزمەت كورسەتەتىن كاسىپورىندارمەن كەلىسپەي وزگەرتۋى دە زاڭعى قايشى ارەكەت. سوندىقتان «پاۆلودار-ۆودوكانال» سەرىكتەستىگى ۇيلەردىڭ قۇرىلىسىن زاڭسىز دەپ تانۋ جونىندە سوتقا ارىز بەردى. 4 ءساۋىر كۇنى پاۆلودار قالالىق سوتى اتالعان اۋماقتاردا قانداي دا ءبىر قۇرىلىس-مونتاجداۋ جۇمىستارىن جۇرگىزۋگە تىيىم سالدى, – دەپ مالىمدەدى كومپانيا باسشىلىعى.
تۇرعىندار باس كوتەرگەن سوڭ تۇرعىن ءۇي قۇرىلىسى توقتادى. الداعى ۋاقىتتا مۇنداي كەلەڭسىزدىكتەر ءجيى كەزدەسەتىنىن سەزىپ وتىرمىز. «ساقالدى» قۇرىلىسقا اينالعان نىسانداردىڭ شيكىلىگى كوپ. بۇل شارۋامەن ANTIKOR اينالىسسا, ءبىراز بىلىقتىڭ اشىلارى ءسوزسىز.
پاۆلودار