شايبالى حوككەيدەن قازاقستان چەمپيوناتى ءوز مارەسىنە تاياپ قالدى. پلەي-وفف كەزەڭىنىڭ جارتىلاي فينالىندا باق سىناپ جاتقان قاراعاندىنىڭ «سارىارقاسى» ءتورت كوماندانىڭ ىشىندە العاشقىلاردىڭ ءبىرى بولىپ فينالعا جولداما الدى. پلەي-وففتا ەلوردانىڭ «نومادىمەن» كەزدەسكەن قاراعاندىلىق حوككەيشىلەر سوڭعى, شەشۋشى ماتچتا قارسىلاستارىن ءىرى ەسەپپەن جەڭىپ, فينالعا شىقتى. ال جارتىلاي فينالدىڭ ەكىنشى جۇبىندا ونەر كورسەتىپ جاتقان اتىراۋدىڭ «بەيبارىسى» مەن كوكشەتاۋدىڭ «ارلانى» جەتىنشى كەزدەسۋ وتكىزەتىن بولدى.
«سارىارقا» مەن «نوماد» اراسىنداعى بەسىنشى ماتچتىڭ الدىندا «كەنشىلەر» كومانداسى سەريادا 3:2 ەسەبىمەن الدا تۇردى. قاراعاندىدا وتكەن بەسىنشى كەزدەسۋدە «نوماد» 5:3 ەسەبىمەن جەڭىسكە جەتىپ, سەرياداعى ەسەپ ايىرماسىن قىسقارتتى. ءوز مۇزايدىنىندا وتەتىن ماڭىزدى, التىنشى ويىننىڭ قارساڭىندا «كوشپەندىلەر» قوسىمشا موتيۆاتسياعا يە بولدى. «سارىارقا» حوككەيشىلەرى ءبىر اياعىمەن فينالدا تۇرعاندىقتان, ولار دا بۇل ويىندا ايانىپ قالمايتىنى انىق ەدى.
ەكى كوماندا ءۇشىن دە ماڭىزدى ءارى شەشۋشى ماتچ بولعاندىقتان, كەزدەسۋ ء«ا» دەگەننەن تارتىستى باستالدى. ەكى كلۋبتىڭ حوككەيشىلەرى دە ەسەپتى ءبىرىنشى بولىپ اشۋعا تىرىستى. ءبىرىنشى كەزەڭنىڭ 17-مينۋتىندا سان باسىمدىعىنا يە بولعان «سارىارقالىقتار» ءوز مۇمكىندىكتەرىن ءمۇلت جىبەرگەن جوق. نيكيتا اناحوۆسكيدەن تاماشا پاس العان شابۋىلشى سەرگەي گولودنيۋك نيكيتا بوياركين قورعاعان قاقپادان ساڭىلاۋ تاۋىپ, كومانداسىنا باسىمدىق سىيلادى. ۇزىلىستەن كەيىن قارقىنىن ودان ءارى كۇشەيتكەن قوناقتار 21-مينۋتتا ەسەپتى 2:0-گە جەتكىزدى. شايبا اۆتورى – دەنيس فەدوروۆ. ال 38-مينۋتتا تاعى دا سان باسىمدىعىنا يە بولعان «سارىارقا» ەسەپتەگى باسىمدىعىن ءۇش گولعا دەيىن جەتكىزدى. بۇل جولى ميحايل راحمانوۆ مەرگەندىگىمەن كوزگە ءتۇستى.
چەمپيوناتتىڭ فينالىنا بەرىلەتىن جولداما ۋىسىنان شىعىپ بارا جاتقانىن اڭعارعان «نوماد» ويىنشىلارى بۇل كەزەڭدە اندرەي شۋتوۆ قاقپاسىنىڭ الدىندا ءبىراز قاۋىپتى شابۋىل ۇيىمداستىرىپ, گول سوعۋ ءۇشىن بارىن سالعانىمەن, قاراعاندىلىق حوككەيشىلەر مۇمكىندىك بەرمەدى. ەسەسىنە كەزدەسۋدىڭ اياقتالۋىنا ءۇش مينۋت قالعاندا اندرەي ياكوۆلەۆ ويىننىڭ نۇكتەسىن قويىپ, «سارىارقاعا» جەڭىس سىيلادى – 0:4. وسىلايشا, التى ويىنعا سوزىلعان جارتىلاي فينالدا 4:2 ەسەبىمەن جەڭىسكە جەتكەن «سارىارقا» ەل بىرىنشىلىگىنىڭ فينالىنا شىقتى.
ەندى «سارىارقا» ەكىنشى جارتىلاي فينالداعى «بەيبارىس» پەن «ارلان» كلۋبتارىنىڭ جەڭىمپازىمەن وينايدى. قازىر ەكى كلۋب اراسىندا جالپى سەريادا تارازى باسى تەڭ – 3:3. التىنشى ماتچتا «بەيبارىس» 3:1 ەسەبىمەن جەڭىسكە جەتىپ, تارازى باسىن تەڭەستىرگەن ەدى.