قازاقستان پرەزيدەنتى قاسىم-جومارت توقاەۆتىڭ اۋقىمدى رەفورمالارعا تولى جولداۋىمەن تانىسىپ شىقتىم. قازاقستاننىڭ ناعىز دوسى رەتىندە پرەزيدەنت قولعا العان بارلىق باستامالاردى قۇپتايمىن. قاسىم-جومارت توقاەۆتىڭ ءوزى باستاماشىل بولعان بارلىق رەفورمانى جۇيەلى تۇردە جۇزەگە اسىراتىنىنا جانە قازاقستاننىڭ كورەيا رەسپۋبليكاسى سياقتى الەۋمەتتىك دامۋعا قول جەتكىزەتىنىنە سەنىمىم مول.
ءبىز رەفورمالاردىڭ اۋقىمى كەڭ ەكەنىن جانە ولاردىڭ مەملەكەتتىك باسقارۋدىڭ بارلىق باعىتىن قامتيتىنىن كورىپ وتىرمىز. مۇنداي رەفورمالاردىڭ تولىققاندى جوسپارىن جاساۋ وڭاي شارۋا ەمەس, ال سول رەفورمالاردى ءتۇسىنۋ پروتسەسى ودان دا قيىن. ۇكىمەتتىڭ حالىق الدىنداعى مىندەتتەمەلەرىنىڭ جاۋاپكەرشىلىگى زور بولعاندىقتان, بيلىك قوعامدا قالىپتاسقان قارسىلىق پسيحولوگياسىن جەڭۋ ءۇشىن قولدان كەلگەننىڭ ءبارىن جاساۋى كەرەك. ال حالىق پرەزيدەنت باستامالارىن قولداۋى, شىدامدىلىق تانىتۋى ءتيىس.
بۇگىندە ەكونوميكالىق دامۋ مەن دەموكراتياعا قول جەتكىزگەن كورەيا رەسپۋبليكاسىنىڭ قازىرگى تاريحىنا كوز جۇگىرتە وتىرىپ, ۇكىمەتتىڭ ۋادەلەرىن ورىنداۋدىڭ, سونداي-اق حالىقتىڭ ءتۇسىنۋى مەن قاتىسۋىنىڭ ماڭىزدىلىعىن اتاپ وتكىم كەلەدى.
ۇكىمەت پەن حالىق رەفورمالار جوسپارىن ىسكە اسىرۋ پروتسەسىندە تۋىندايتىن ماسەلەلەردىڭ ورىندالۋى كەزىندە شىدامسىزدىق تانىتپايدى, كەرىسىنشە ۇزاق مەرزىمدى پەرسپەكتيۆاعا ءۇمىت ارتا وتىرىپ, بارلىق قاجەتتى ءىس-شارالاردى قابىلدايدى دەپ ۇمىتتەنەمىن. سوندا عانا رەفورمالاردىڭ قوزعاۋشى كۇشى ساقتالىپ, مۇمكىن بولاتىن قۇرباندىق پەن شىعىن كولەمى ازايادى.
قازاقستان حالقى مەن ۇكىمەتىنە قازىر باعانىڭ ءوسۋى ءوز اۋىرتپالىعىن تيگىزىپ وتىرعانى انىق. الايدا بۇل مەملەكەتتىڭ جەتىلۋى كەزىندە ءجۇرىپ وتەتىن جولى, پروتسەسى ەكەنىن ۇمىتپاۋ كەرەك.
كورەيا رەسپۋبليكاسى دا مۇنداي وتكىر ماسەلەلەرمەن بەتپە-بەت كەزدەسكەن. وزەكتى پروبلەمالاردى ەڭسەرگەن. ەلىمىز تىنىمسىز اتقارىلعان جۇمىستار مەن رەفورمالاردىڭ ارقاسىندا بۇگىنگى پروگرەسكە قول جەتكىزدى. قازاقستاننىڭ دا بارلىق قيىندىقتاردى جەڭىپ شىعاتىنىنا بەك سەنىمدىمىن.
قازاقستان كوروناۆيرۋس ىندەتىنىڭ تارالۋىن تەجەپ, بەلگىلى ءبىر دەڭگەيدە جەڭىسكە جەتكەنى ءمالىم. جاھان جۇرتىن ابىگەرگە سالعان ىندەتپەن بەلسەندى كۇرەسكەن ەلدىڭ قازىرگى ساياسي-الەۋمەتتىك ماسەلەلەردى دە ەڭسەرە الاتىنى داۋسىز.
قازاقستان تاۋەلسىزدىك العاننان كەيىن ورتالىق ازياداعى ەڭ ءىرى دامۋشى ەل بولدى. بۇل قازاقستان ۇكىمەتى مەن حالقىنىڭ بىرلىگىنىڭ, بەرەكەلى تىرلىگىنىڭ بەلگىسى دەپ بىلەمىن. بۇل جولى قازاقستان رەفورمالار مەن دامۋدىڭ قوزعاۋشى كۇشىن العا ەكى قادام جاساۋ مۇمكىندىگى رەتىندە پايدالانا الاتىنىنا يلانامىن. قىسقاسى, مەملەكەتتىڭ جۇيەلى جۇمىستار ارقىلى تابىسقا جەتەتىنى داۋسىز.
كيم دە سيك,
كورەيا رەسپۋبليكاسى گۋبەرناتورلارى قاۋىمداستىعى حالىقارالىق قاتىناستار دەپارتامەنتىنىڭ باس ديرەكتورى