بۇل جاڭاشىلدىق 2023 جىلدان باستاپ ەنگىزىلمەك. بۇل تۋرالى نۇر-سۇلتان قالاسى پوليتسيا دەپارتامەنتى كوشى-قون قىزمەتى باسقارماسىنىڭ باسشىسى ارمان بايمۇحامەت ايتتى, دەپ حابارلايدى Egemen.kz.
سپيكەردىڭ ايتۋىنشا, الداعى جىلى ەلوردا تۇرعىندارىنا جەكە قۇجات بەرىلگەن ساتتە ساۋساق ءىزى الىنادى.
«2023 جىلدان باستاپ جەكە باسىن كۋالاندىراتىن قۇجاتتاردى العان نەمەسە اۋىستىرعان كەزدە ساۋساق ءىزىن ەنگىزۋدى جۇزەگە اسىرۋ جوسپارلانعان. قازىر اتالعان جاڭاشىلدىق سارىارقا اۋداندىق حالىققا قىزمەت كورسەتۋ ورتالىعىندا پيلوتتىق رەجيمدە جۇزەگە اسىپ جاتىر. بۇل زاڭسىز قۇجات قاۋپىن تومەندەتەدى», دەيدى نۇر-سۇلتان قالاسى پوليتسيا دەپارتامەنتى كوشى-قون قىزمەتى باسقارماسىنىڭ باسشىسى.
سونىمەن قاتار سپيكەر جەكە باسىن كۋالاندىراتىن قۇجاتتى بەرۋ مەحانيزمى جەتىلدىرىلگەنىن اتاپ ءوتتى.
«بيىل 3 ايدىڭ ىشىندە 48 مىڭ 744 تولقۇجات پەن جەكە كۋالىك بەرىلدى. قۇجاتتاردى دايىنداۋعا كەتەتىن ۋاقىت تا قىسقاردى. ياعني جالپى تارتىپكە سايكەس 20 جۇمىس كۇنى ىشىندە, ال جەدەلدەتىلگەن تارتىپتە 1 جانە 3 جۇمىس كۇنىندە قۇجات دايىن بولادى», دەدى باسقارما باسشىسى.