بۋراباي كولدەرىندە بالىق اۋلاۋعا ونلاين دايىندالۋ تەك وسى جىلى مۇمكىن بولدى. بۇعان دەيىن سپورتتىق (اۋەسقوي) بالىق اۋلاۋ ەرەجەلەرىنە سايكەس بالىقشىلار تىركەۋدەن قاعاز جۇزىندە وتۋگە مىندەتتەلگەن بولاتىن.
بالىقشىلاردىڭ كوپتەگەن ءوتىنىشى بويىنشا 2021 جىلدىڭ مامىر ايىندا «بۋراباي» ۇلتتىق پاركىنىڭ قىزمەتكەرلەرى ەرەجەگە وزگەرىستەر ەنگىزۋگە باستاماشى بولدى. سودان كەيىن ۆەدومستۆولاردا بەكىتۋلەر بولىپ, سىبايلاس جەمقورلىققا قارسى ساراپتامانىڭ قورىتىندىسىن الۋ, قۇقىقتىق اكتىلەردى پايدالانۋشىلاردىڭ قوعامدىق ونلاين تالقىلاۋىن وتكىزۋ مەن ساراپتامالىق كەڭەستىڭ قورىتىندىسىن الۋ قاجەت بولدى. مۇنى ءبىرىنشى بولىپ بۋراباي ۇلتتىق پاركىنىڭ قىزمەتكەرلەرى ەنگىزىپ, بۇگىندە ولاردىڭ تاجىريبەسىنە وزگە ۇلتتىق ساياباقتاعى ارىپتەستەر دە قىزىعۋشىلىق تانىتۋدا.
قورعالجىن مەملەكەتتىك قورىعىنىڭ تۇساۋكەسەر ورتالىعىندا ورمان شارۋاشىلىعى جانە جانۋارلار دۇنيەسى كوميتەتى «ەرەكشە قورعالاتىن تابيعي اۋماقتاردىڭ سۋ قويمالارىندا بالىق جانە باسقا دا سۋ جانۋارلارىن سپورتتىق, اۋەسقويلىق جانە مەليوراتيۆتىك اۋلاۋدى رەتتەۋ ماسەلەلەرى» اتتى سەمينار ۇيىمداستىردى.
«بۋراباي» مەملەكەتتىك ۇلتتىق پاركىنىڭ باس ورمانشىسى باۋىرجان ماحمەتوۆ ارىپتەستەرىن جاڭا ترەندپەن تانىستىردى. ول ەرەجەگە ەنگىزىلگەن وزگەرىستەردى ۇيلەستىرۋ الگوريتمى, مەملەكەتتىك ورگاندارمەن ءوزارا ءىس-قيمىل تۋرالى ايتتى. سونداي-اق ۇلتتىق ساياباقتىڭ سايتىندا بالىق اۋلاۋعا رۇقساتتاردى ەلەكتروندى تۇردە راسىمدەيتىن پلاتفورما قالاي جۇمىس ىستەيتىنىن كورسەتتى.
رۇقسات قاعازىن ونلاين ساتىپ الۋ وتە وڭاي, parkburabay.kz سايتىنداعى «ونلاين سپورتتىق بالىق اۋلاۋ» بولىمىنە كىرىپ, «ونلاين بيلەت ساتىپ الۋ» سىلتەمەسىندەگى فورمانى تولتىرۋ قاجەت. تولەم جاسايسىز دا, بالىق اۋلاۋعا باراسىز.