جولداۋدان باستى تۇيگەنىم – قاسىم-جومارت كەمەل ۇلى بارلىق قولعا الىنعان رەفورما مەن قابىلداناتىن ماڭىزدى شەشىمدەردى قازاقستاننىڭ تۇراقتى دامۋىنا ارناپ وتىر.
ورنىقتى دامۋ ۇعىمى ماعان ءجىتى تانىس. نەگە دەسەڭىز, مەن ەلىمىزدىڭ «جاسىل» قاۋىمداستىعى, ياعني ەكولوگيالىق بىرلەستىكتىڭ وكىلىمىن. مۇنىڭ الدىندا بۇۇ دامۋ باعدارلاماسىنىڭ ورنىقتى دامۋ بويىنشا ءبولىمىن باسقارعاندىقتان كەز كەلگەن مەملەكەتتىڭ تۇراقتى دامۋىن ساياسي شەشىمسىز جۇزەگە اسىرۋ قيىن ەكەنىن جاقسى تۇسىنەتىنمىن. مەملەكەت باسشىسى وسى ايتىلعان ۇسىنىستاردىڭ كەلەشەكتە قوعامنىڭ يگىلىگىنە قىزمەت ەتەتىنىن بىرنەشە رەت جەتكىزدى.
ماڭىزدىسى سول, پرەزيدەنت كوتەرگەن ستراتەگيالىق باستامالاردىڭ باعىتى ايقىن. كونستيتۋتسياعا 30-دان استام تۇزەتۋ ەنگىزىپ, 20-دان ارتىق زاڭدى وزگەرتۋ ماسەلەسى كۇن تارتىبىنە قويىلىپ وتىر. بۇل – اۋقىمدى جۇمىستى قاجەت ەتەتىن شارۋا. كەيبىرەۋلەر نەگە پارلامەنتتى بىردەن تاراتىپ, سايلاۋ وتكىزبەسكە دەپ سۇرايدى. بىراق مۇنى ىسكە اسىرۋ ءۇشىن ءتيىستى زاڭناماعا وزگەرىستەر ەنگىزۋ قاجەت ەكەنىن جاقسى تۇسىنەمىز.
ەكىنشىدەن, جولداۋدىڭ باستى تۇسىندا ءۇش وبلىستى قۇرۋ جونىندە باستاما كوتەرىلدى. اتاپ ايتقاندا, ۇلىتاۋ, جەتىسۋ جانە اباي وبلىستارى. كەز كەلگەن قازاقستان ازاماتى سەكىلدى وسى وڭىرلەردە مەنىڭ دە كوپتەگەن دوسىم تۇرادى. ولار تاريحي ادىلدىكتىڭ ورنىققانىنا ءدان ريزا. ماسەلەن, جەزقازعان وبلىسى بۇرىن دا بولعان. قازىر كەنشىلەر وڭىرىندە قازبا بايلىقتارى سارقىلىپ بىتكەن كەن ورىندارى وتە كوپ. سوندىقتان جاڭا جۇمىس ورىندارىن اشۋ اسا ماڭىزدى. ال جەكە الدىنا اباي وبلىسىنىڭ قۇرىلۋى – سەمەيلىكتەردىڭ ەرتەدەن اڭساپ كەلە جاتقان قالاۋلارىنىڭ ءبىرى. الماتى ءوڭىرى ءۇشىن دە بۇل ورىندى شەشىم دەپ سانايمىن. ەگەر حالىق قاپشاعاي قالاسىنىڭ اتاۋىن قوناەۆقا وزگەرتۋدى قۇپتاسا, اتالعان ءوڭىردىڭ كوركەيە تۇسۋىنە جول اشىلادى دەگەن سەنىمدەمىز.
باسقا دا كوپتەگەن جاقسى وزگەرىس پەن ۇسىنىس ايتىلدى. سول سەبەپتى پارلامەنت پەن پرەزيدەنت اكىمشىلىگىنە قىرۋار جۇمىس اتقارۋعا تۋرا كەلەدى.
پرەزيدەنت پەن ءوڭىر اكىمدەرىنىڭ ساياسي پارتيالاردىڭ قۇرامىندا بولماۋى كەرەك دەگەن ۇسىنىستى دا قولدايمىن. بۇل كەز كەلگەن پارتيانىڭ مۇددەلەرىن ىلگەرىلەتۋ ءۇشىن اكىمشىلىك رەسۋرستاردى پايدالانۋ ىقتيمالدىعىن الدىن الادى دەپ ەسەپتەيمىن. سونىمەن قاتار وسى ارقىلى كوپپارتيالىق پەن باسەكەلەستىككە مۇمكىندىك بەرىلىپ, جاڭا ساياسي مادەنيەت قالىپتاسادى. وسى رەتتە ءبىز كەيىنگى كەزدەرى «جاسىل» پارتيا قۇرۋ جونىندە باستاما كوتەرىپ كەلەمىز. مۇنداي شەشىم قابىلداۋعا ەلىمىزدە ورىن العان ۋتيلالىم مەن كوبەيتۇز ماسەلەسىنە بايلانىستى رەزوناستى وقيعالار يتەرمەلەدى. بولاشاقتا ءبىز وسىعان كەلەمىز دەپ ويلايمىن.
ارمان قاشقىنبەكوۆ,
قازاقستاننىڭ جاڭعىرمالى ەنەرگەتيكا قاۋىمداستىعىنىڭ باس ديرەكتورى