اۋتيزم – تاعدىرعا تاڭبالانعان, ماڭدايعا باسىلعان دەرت ەمەس, وڭالتۋعا كونەتىن اۋىتقۋ دەسە دە بولادى. الايدا كوپ اتا-انا بالانىڭ بويىنداعى بۇل ەرەكشەلىكتى ەرتە بايقاي بەرمەيدى. كوبىنە-كوپ دارىگەرلەر انىقتاپ, دياگنوز قويىپ جاتاتىنى بەلگىلى. ال ەرتە انىقتالعان ءاربىر اقاۋ تۇزەتۋگە, وڭالتۋعا, الدىن الۋعا كونەتىنى انىق. سوندىقتان وسى ەرەكشەلىك تۋرالى اتا-انانى نەعۇرلىم كوپ اقپاراتتاندىرعان ءجون.
جۋىردا 2 ءساۋىر – دۇنيەجۇزىلىك اۋتيزم ماسەلەسى تۋرالى اقپارات تاراتۋ كۇنىنە وراي ەلورداداعى «استانا-وپەرا» تەاترىندا قايىرىمدىلىق كونتسەرتى ۇيىمداستىرىلدى. نۇر-سۇلتان قالاسى اكىمدىگىنىڭ قولداۋىمەن وتكەن ءىس-شارانىڭ باستى قاتىسۋشىلارى – كۇردەلى مەديتسينالىق دياگنوزى بار دارىندى بالالار. ساحنا شەبەرلەرىمەن بىرگە ولار دا ءان شىرقاپ, مۋزىكالىق اسپاپتاردا وينادى. وزگە دە شىعارماشىلىق شەبەرلىكتەرىن كورسەتتى. مۇنداي قايىرىمدىلىق قادامى «استانا-وپەرا» قىزمەتىنىڭ ماڭىزدى باعىتتارىنىڭ ءبىرى سانالادى.
– قازاقستاندا جاريالانعان بالالار جىلىندا وسكەلەڭ ۇرپاققا ەرەكشە نازار اۋدارعىم كەلەدى. سوندىقتان وسى تەاتر قابىرعاسىندا جاس تالانتتاردىڭ قاتىسۋىمەن قايىرىمدىلىق كونتسەرتىن وتكىزۋ باستاماسىنا قۋانا ءۇن قوستىق. مۋزىكانىڭ ەمدىك كۇشى ونداي بالالاردىڭ وڭالۋىنا مۇمكىندىك بەرەدى. جەكە تۇلعانىڭ جاڭا قىرلارىن اشىپ, شىعارماشىلىعىن, شەبەرلىگىن شىڭداۋعا كومەكتەسەدى. جاس ارتىستەردىڭ باستامالارىنا قولداۋ كورسەتە كەلگەن كوزىقاراقتى كورەرمەندەرگە دە العىسىم شەكسىز. زال تولعانىنا شىن جۇرەكتەن قۋانىشتىمىز. ولاردى الدا جاڭا جەتىستىكتەرگە تولى شىعارماشىلىق ءومىر كۇتىپ تۇر دەپ ۇمىتتەنەمىز, – دەدى «استانا-وپەرا» تەاترى ديرەكتورىنىڭ ورىنباسارى ايجان قۇرمانعاليەۆا.
كونتسەرتكە قاتىسقانداردىڭ ءبىرى – 3-سىنىپ وقۋشىسى دارىن اجمولداەۆ. ول ۆوكالمەن كاسىبي تۇردە اينالىسادى ءارى تابيعي تالانت كەرەمەت تازا داۋىسقا يە. دارىن بۇل جولى نەاپوليتاننىڭ Santa Lucia ءانىن, ن.جاقىپتىڭ سۇيىكتى «اكە-انا» ءانىن جانە باسقا دا شىعارمالاردى ورىندادى. وعان ءتورت جاسىندا اۋتيزم دياگنوزى قويىلعان ەدى. ال 6 جاسىنا دەيىن سويلەي المايتىن. بىراق ۇنەمى مۋزىكا تىڭداپ ءجۇردى. مىنەز-ق ۇلىقتى تۇزەتۋدىڭ ءتيىمدى ءادىسىنىڭ ناتيجەسىندە ول دامۋدا ۇلكەن جەتىستىكتەرگە جەتتى. الدىمەن ءان ايتاتىن, كەيىننەن سويلەيتىن بولدى. قازىر دارىن ۆوكال مەكتەبىندە وقۋىن جالعاستىرىپ جاتىر. رەسپۋبليكالىق جانە حالىقارالىق بايقاۋلاردىڭ لاۋرەاتى اتاندى. «ۇركەر» اۋلا كلۋبىنىڭ «بالاۋسا» بالالار ينكليۋزيۆتى حورىنىڭ قۇرامىندا ءان ايتادى.
سونىمەن قاتار ح.حارسيەۆ ينگۋش حالقىنىڭ ءانى «لورسا ليدانى» ورىنداسا, ە.تۇرماحانبەتوۆ ا.باحانوۆتىڭ «اسىل انا» شىعارماسىن قويدى. سول سياقتى ياسمين بەكتەۋباەۆا, دانيال دجۋاسوۆ, نۇرىم نارىمباەۆ جانە باسقا دا جاس دارىندار ءوز ونەرلەرىن ورتاعا سالدى. كەش قوناقتارى ءۇشىن تەاتر فويەسىندە «اۋتيزممەن اۋىراتىن بالا تاربيەلەپ وتىرعان وتباسىنىڭ ءبىر كۇنى» اتتى فوتوكورمە جانە اۋتيزم سپەكترى بۇزىلعان بالالار جاساعان سۋرەتتەر مەن قولونەر ەكسپوزيتسياسى ۇسىنىلدى.
– كەيىنگى 7 جىلدا قازاقستاندىق بالالاردىڭ اراسىندا انىقتالعان اۋتيزم جاعدايلارىنىڭ سانى 5 ەسە ءوستى. بىلتىرعى دەرەكتەرى بويىنشا, اۋتيستىك سپەكتردىڭ بۇزىلۋىمەن ديناميكالىق باقىلاۋدا 4,8 مىڭنان استام پاتسيەنت تۇر. ءبىزدىڭ ءىس-شارامىزدىڭ باستى ماقساتى ءاۋتيزمى بار بالالار كەرەمەت ءان ايتىپ, بي بيلەپ, سۋرەت سالىپ, ءمۇسىن جاساپ, مۋزىكالىق اسپاپتاردا ويناي الاتىنىن كورسەتۋ بولدى. ەڭ باستىسى, شىعارماشىلىق ساباقتار بالالاردىڭ الەۋمەتتەنۋىنە كومەكتەسەدى, – دەدى Abaqus-daryn ءبىلىم بەرۋ قورىنىڭ قۇرىلتايشىسى شىنار اجمولداەۆا.