«توبىل» توپ باسىنا شىقتى

ءتورتىنشى تۋردىڭ العاشقى ويى­نى اقتاۋدا جەرگىلىكتى «كاسپي» مەن شىمكەنتتىڭ «ورداباسى» كلۋبتارى اراسىندا ءوتتى. كەيىنگى ءۇش ماتچتىڭ ەكەۋىندە جەڭىسكە جەتىپ, بىرەۋىندە تەڭ ويناعان «كاس­پي» فۋتبولشىلارى بۇل جولى دا جەڭىس تويىن تويلادى. «جاس قا­نات» ستاديونىنداعى ويىندا الاڭ يەلەرى قارسىلاستارىنان 2:1 ەسەبىمەن باسىم ءتۇسىپ, تۋرنير كەستەسىندە ۋاقىتشا كوش باس­تادى. سىرت الاڭدا «تارازبەن» كەز­دەسكەن «اتىراۋ» قارسىلاس كوماندانى 1:0 ەسەبىمەن تىزە بۇكتىردى. كەزدەسۋدەگى شەشۋشى گولدى ءبىرىنشى تايمنىڭ 42-مينۋتىندا «اتىراۋدىڭ» جارتىلاي قورعاۋشىسى اندريا فيليپوۆيچ پەنالتيدەن سوقتى.

ال قۇرامىن شەتەلدىك جانە ۇلتتىق قۇرامادا ونەر كورسەتەتىن تا­جىريبەلى فۋتبولشىلارمەن جا­­ساق­تاعان «اقتوبە» بۇل تۋردا دا جانكۇيەرلەرىن قۋانتا الما­دى. ءوز الاڭىندا قارا­عان­دى­نىڭ «شاحتەرىن» قابىلداپ, 1:1 ەسە­بى­مەن تەڭ تارقاستى. ماتچتىڭ ەسەبىن 78-مينۋتتا «اقتوبە» ساپىنان ۋگو ۆيدەمون اشسا, 83-مينۋتتا «شاح­تەردىڭ» قورعاۋشىسى تيمۋر دوسماعامبەتوۆ تارازى باسىن تەڭەستىردى.

بيىل ەۋروكۋبوك باسەكەسىنە قاتى­ساتىن پەتروپاۆلدىڭ «قىزىل­جار» كلۋبىنان ازىرگە بىل­تىر­عىداي قارقىن بايقالمايدى. العاشقى ءۇش تۋردا بىردە-ءبىر ۇپاي جيناي الماعان اندرەي كارپوۆيچ شاكىرتتەرى ءتورتىنشى تۋردا ارەڭ دەگەندە العاشقى جەڭىسىنە قول جەتكىزدى. ءوز الاڭىنداعى ماتچتارىن «استانا ارەنادا» وتكىزىپ جۇر­گەن «قىزىلجار» «اقسۋ» كلۋبىن قابىلداپ, 2:1 ەسەبىمەن ۇتتى. ءبىرىنشى تايمدا ايبول ابىكەننىڭ پەنالتيدەن سوققان گولىنا الاڭ يەلەرىنەن مۋسسا ساەب كونە مەن يۋري بۋشمان ءبىر-ءبىر گولمەن جاۋاپ قايتاردى.

ءتورتىنشى تۋردىڭ تاعى ءبىر ما­ڭىزدى ويىنى ەلوردانىڭ «استانا» كلۋبى مەن تۇركىستان وبلىسىنىڭ «ماق­تاارال» كومانداسى ارا­سىندا ءوتتى. العاشقى ەكى تۋردا جە­ڭىلىسكە ۇشىراعان ەلىمىزدىڭ التى دۇركىن چەمپيونى سىرت الاڭدا «ماق­تاارالدى» ءىرى ەسەپپەن جەڭدى – 3:0. ءبىرىنشى تايمدا «اس­تانانىڭ» پورتۋگاليالىق جارتىلاي قور­عاۋ­شىسى پەدرۋ ەۋجەنيۋ ءدۋبل­دىڭ اۆتورى اتانسا, ەكىنشى تايم­نىڭ 57-مينۋتىندا مارين توما­سوۆ پەنالتيدەن گول سوعىپ, ويىن­نىڭ نۇكتەسىن قويدى. قا­تارى­نان ەكىنشى ويىندا جەڭىسكە جەت­كەن «استانا»  تۋرنير كەستەسىن­دەگى جاعدايىن ءبىرشاما جاقسارتىپ الدى.

ەكىنشى ويىن كۇنىنىڭ العاش­قى ماتچىندا الماتىنىڭ «قاي­راتى» ورالدا كۇتپەگەن جەردە «اقجايىقپەن» تەڭ ءتۇسىپ (0:0), قاتارىنان ەكىنشى كەزدەسۋىندە ۇپاي جوعالتتى. ماتچ تىزگىنى تولىقتاي قۇربان بەردىەۆ شاكىرتتەرىنىڭ قولىندا بولعانىمەن, «قايرات» فۋتبولشىلارى «اقجايىق» قاقپاسىنا گول سوعا المادى. ءتىپتى ويىننىڭ 88-مينۋتىندا ورالدىق ويىنشى ۆيتالي پريندەتا ەكىنشى سارى قاعازىن الىپ, الاڭنان قۋىلسا دا الماتىلىق كوماندا ودان ناتيجە شىعارا العان جوق. ءسوي­تىپ چەمپيونات اۋتسايدەرىنىڭ بىرىمەن ۇپاي بولىسكەن «قايرات» سەگىز ۇپايمەن تۋرنير كەستەسىندە ءۇشىنشى ورىنعا سىرعىدى. 

تۋردىڭ سوڭعى ويىنىندا قوس­تانايدىڭ «توبىلى» ءوز جان­كۇيەرلەرىنىڭ الدىندا تۇركىس­تاننىڭ «تۇران» كلۋبىن قابىل­داپ, 3:0 ەسەبىمەن جەڭىسكە جەتتى. الاڭ يەلەرى ساپىنان 19-مينۋتتا زوران توشيچ پەنالتيدەن گول سوقسا, ەكىنشى تايمدا اسحات تاعىبەرگەن دۋبل جاسادى. ءتورت تۋردا 10 ۇپاي جيناعان «توبىل» تۋرنير كەستەسىندە توپ باستادى. «كاسپيدە» دە 10 ۇپاي بولعانىمەن, اقتاۋلىق كوماندا دوپ ايىرماشىلىعىنا بايلانىس­تى ەكىنشى ورىنعا ءتۇسىپ قالدى.

ەندى V تۋر ويىندارى 9 (سەنبى) جانە 10 ءساۋىر (جەكسەنبى) كۇندەرى وتە­دى. بۇل تۋردا «ورداباسى» – «تو­بىل», «اتىراۋ» – «اقجايىق», «قاي­رات» – «كاسپي», «تۇران» – «قى­زىلجار», «استانا» – «تاراز», «اقسۋ» – «اقتوبە» جانە «شاحتەر» – «ماقتاارال» كوماندالارى كەزدەسەدى.