تەننيستەن قازاقستاننىڭ ايەلدەر قۇراماسى كەلەسى اپتانىڭ سوڭىندا ەلورداداعى ۇلتتىق تەننيس ورتالىعىندا بيللي دجين كينگ كۋبوگى جولىنداعى جارىستىڭ ىرىكتەۋ كەزەڭىندە گەرمانيا تەننيسشىلەرىمەن كەزدەسەدى. وسى ماتچ الدىندا قازاقستان قۇراماسىنىڭ ويىنشىلارى – يۋليا پۋتينتسەۆا, زارينا دياس جانە اننا دانيلينا كەزدەسۋ تۋرالى پىكىرلەرىن ورتاعا سالىپ, ۇلتتىق قۇراما ساپىنداعى العاشقى ويىندارىن ەسكە الدى.
– ءبىزدى گەرمانيا تەننيسشىلەرىنە قارسى وتە قيىن ماتچتار كۇتىپ تۇر. دەسە دە, بىزدە فينالدىق كەزەڭگە جولداما الاتىن جاقسى مۇمكىندىك بار. ويتكەنى ءبىز ءوز ەلىمىزدە, جانكۇيەرلەرىمىزدىڭ الدىندا وينايمىز. بۇل سپورتشىلارعا قوسىمشا كۇش بەرەدى. ءوز ەلىڭدە, ءوز جەرىڭدە كورتقا شىعۋ ەرەكشە اسەر سىيلايدى. جانكۇيەرلەرىمىز ۇلكەن قولداۋ كورسەتەدى. ماعان وسىنداي اتموسفەرا ۇنايدى. ۇلتتىق قۇراماداعى العاشقى ويىنىمدا قالاي ونەر كورسەتكەنىم ەسىمدە جوق, تەك جەڭىسكە جەتكەنىمدى بىلەمىن. سول كەزدە قاتتى قوبالجىعان بولۋىم كەرەك, – دەدى يۋليا پۋتينتسەۆا.
يۋليا پۋتينتسەۆا قازاقستان قۇراماسىنداعى العاشقى ويىنىن 2014 جىلدىڭ اقپان ايىندا يندونەزيا قۇراماسىمەن وتكىزىپ, ۆيتا مەديانانى ەكى سەتتە 6:2, 6:1 ەسەبىمەن جەڭگەن بولاتىن.
– گەرمانيا قۇراماسى – مىقتى قارسىلاس. ويتكەنى ولار بيللي دجين كينگ ءتۋرنيرىنىڭ تۇراقتى قاتىسۋشىلارى. ءبىز بۇل ويىندى ءوز ەلىمىزدە وتكىزەتىندىكتەن, ماتچ الدىندا ازداعان باسىمدىققا يەمىز. الداعى ويىندا تەك ءوزىمىز ءۇشىن ەمەس, بۇكىل ەلدىڭ نامىسى ءۇشىن وينايتىن بولعاندىقتان, كورتقا تەك جەڭىس ءۇشىن شىعامىز. ۇلتتىق قۇراماداعى العاشقى ويىنىمدى 2009 جىلى اۋستراليادا ازيا/تىنىق مۇحيت ايماعىنىڭ ەكىنشى توبىنداعى فەدەراتسيا كۋبوگى جولىنداعى باسەكەدە وتكىزدىم. گالينا ۆوسكوبوەۆامەن جۇپتىق ماتچتا يران قۇراماسىمەن ويناپ, 6:0, 6:0 ەسەبىمەن جەڭىسكە جەتكەنبىز. بۇل ماتچ مەنىڭ ەسىمدە ءومىر بويى ساقتالىپ قالادى, – دەپ اتاپ ءوتتى ز.دياس.
– ۇلتتىق قۇراماداعى ءار ويىنىمىزدا بار كۇشىمدى سالىپ ويناۋعا تىرىسامىز. گەرمانيا ساپىنداعى ويىنشىلاردىڭ ءبارى تاجىريبەلى ەكەنى بەلگىلى. سوندىقتان بۇل ماتچ وتە تارتىستى وتەدى دەپ ەسەپتەيمىن. الەم بىرىنشىلىگىنىڭ ىرىكتەۋ كەزەڭدەرىندە جەڭىل ماتچتاردى كۇتۋدىڭ قاجەتى جوق, سوندىقتان ءار ماتچقا دايىن بولۋىمىز كەرەك. ۇلتتىق قۇرامادا العاش رەت 2019 جىلى ازيا/تىنىق مۇحيت ايماعىنىڭ ءبىرىنشى توبىندا ەلورداداعى ۇلتتىق تەننيس ورتالىعىندا وينادىم. گالينا ۆوسكوبوەۆامەن جۇپتىق باسەكەدە كورتقا شىعىپ, تايلاند كومانداسىن ەش قيىندىقسىز جەڭگەن ەدىك, – دەدى اننا دانيلينا.
ايتا كەتەيىك, قازاقستان مەن گەرمانيا اراسىنداعى ويىن 15-16 ءساۋىر كۇندەرى ەلورداداعى «داۋلەت» تەننيس ورتالىعىندا وتەدى.