سارىارقانىڭ سايىن دالاسىنا سالىنعان استانامىزدىڭ اۋا رايىن جاقتىرمايتىن جاندار جەتەرلىك. ءبىرى قاڭتارى قارلى, اقپانى ايازدى دەسە, ەندى ءبىرى كوكتەمى كەلىپ بولمايتىن سۋىق مەكەنگە تەڭەپ جاتادى.
سىرتىمىزدان سىناعانداردى ەستىگەندە, جاراتقاننان جالبارىنىپ سۇراپ العان جالعىز ۇلداي جان-جاعىنان قورعاشتاۋعا تىرىساسىڭ. ال كەيدە ءبىر مەملەكەتتىڭ استاناسى دەگەن دارداي داڭقى بولعان سوڭ, كەلەڭسىزدىكتەر مەن كەمشىلىكتەرگە جول بەرمەسە ەكەن دەپ كەيتىنىمىز بەلگىلى. قىس كەلسە, قار باسىپ, كوكتەم كەلسە, باتپاق پەن سۋعا بەلشەسىنەن باتاتىن قالا تۇرعىندارىنىڭ قاپالاناتىنداي ءجونى بار. جۋىردا سول جاعالاۋدا ورنالاسقان Binom Turan مەكتەبىنە كىرەبەرىس جولدارداعى كورىنىستەر ءسوزىمىزدىڭ دالەلى بولسا كەرەك. الەۋمەتتىك جەلىلەردەگى بەينەلەردەن اۋرەگە تۇسكەن اتا-انا مەن وقۋشىنى كورۋگە بولادى. بالتىرىنان بالشىققا باتقان بالالاردىڭ بىلىمگە دەگەن قۇشتارلىعى تومەندەمەي مە؟!
ۇيىنەن ۇكىلەپ جىبەرگەن پەرزەنتىنىڭ لاي كەشىپ, لاس بولىپ كەلگەنى قاي اتا-اناعا ۇنايدى دەيسىز؟ الەۋمەتتىك جەلىدە ءاليا ەسىمدى اتا-انا اتالعان وقۋ ورداسىنا دەگەن ارىز-شاعىمىن بىلاي دەپ جەتكىزەدى.
«مەكتەپكە باراتىن جول ماسەلەسىن تەز ارادا شەشۋدى تالاپ ەتەمىز. بالالار باتپاقتىڭ ۇستىنە قۇلاپ جاتىر. بارۋ دا, كەلۋ دە مۇمكىن ەمەس. نەگە تەزىرەك شەشپەيسىزدەر؟! بالا مىناداي جولمەن مەكتەپكە جەتكەنشە وقۋعا دەگەن ىنتاسى قاشىپ كەتەدى نەمەسە جول جوندەلىپ, جەر كەپكەنشە ونلاين رەجىمگە كوشىرىڭىزدەر», دەيدى ول.
جوعارىداعى جايتقا بايلانىستى مەكتەپ اكىمشىلىگىمەن سويلەسكەنىمىزدە: ء«بىز مەكتەپتىڭ ىشكى جۇمىسىنا عانا جاۋاپ بەرەمىز», دەپ قىسقا قايىردى.
مەكتەپتەن جاقىن ماڭداعى ايالداماعا دەيىنگى قاشىقتىق – ءبىر شاقىرىمداي. وسىنىڭ بارىندە وقۋشىلار مەن ولاردىڭ اتا-انالارى اياق استىنداعى سازدى يلەپ, ۇلكەن شالشىقتاردىڭ ۇستىنەن سەكىرۋگە ءماجبۇر. كولىكپەن كەلەتىندەر ءۇشىن دە وڭاي ەمەس. بىراق كيىمىڭدى كىرلەتىپ جاياۋ جۇرگەننەن كولىكپەن كەلگەن اناعۇرلىم وڭايعا تۇسەرى انىق. دەيتۇرعانمەن, ەلدىڭ بارىندە تەمىر تۇلپار بار دەپ ايتا المايسىز.
تاعى ءبىر جايت, بيىلعى وقۋ جىلىندا بىردەن ءۇش BINOM School العاشقى وقۋشىلارىن قابىلدادى. ولار – Nova City شاعىن اۋدانىندا, بايتۇرسىنوۆ كوشەسى اۋدانىندا (SARYARQA) جانە جاعالاۋ شاعىن اۋدانىندا (TURAN). جوبانى BI Group يننوۆاتسيالىق قۇرىلىس حولدينگى جەرگىلىكتى اتقارۋشى ورگاندارمەن بىرلەسىپ, مەملەكەت-جەكەشەلىك ارىپتەستىگى ء(مجا) قاعيداتى بويىنشا ىسكە اسىرۋدا. جوعارىداعى كوتەرىلگەن ماسەلە بويىنشا كومپانيا ماماندارىنا حابارلاستىق.
«Binom Turan مەكتەبىنە كىرەبەرىس جولدارعا قاتىستى ايتار بولساق, ءمجا شارتى بويىنشا BI Group كومپانياسى مەكتەپ پەن الاڭىشىلىك جەلىلەردى سالۋدى جۇزەگە اسىردى. وقۋ ورنى اۋماعىنان تىس وبەكتىگە ينجەنەرلىك كوممۋنيكاتسيالار مەن كىرمە جولداردى سالۋ جانە پايدالانۋ مەملەكەتتىك سەرىكتەستىڭ مىندەتتەمەلەرىنە كىرەدى. وسى ماسەلە بويىنشا قوسىمشا اقپارات الۋ ءۇشىن ءسىز نۇر-سۇلتان قالاسىنىڭ اكىمدىگىنە جۇگىنە الاسىز», دەدى كومپانيا وكىلدەرى.
«نۇر-سۇلتان قالاسىنىڭ كولىك جانە جول-كولىك ينفراقۇرىلىمىن دامىتۋ باسقارماسىنىڭ مالىمەتىنشە, وسى جىلى كىرەبەرىس جولداردى اسفالتبەتون جابىنىمەن قامتاماسىز ەتۋ, اباتتاندىرۋ جانە كوشەلەردى جارىقتاندىرۋ بويىنشا قۇرىلىس-مونتاج جۇمىستارىن جۇرگىزۋ جوسپارلانۋدا.
«الەۋمەتتىك نىساندارعا كىرەبەرىس جولداردى سالۋ» جوباسىن جۇزەگە اسىرۋدا. بۇل – ە17, ە20, ە33, ە45 كوشەلەرىنىڭ قۇرىلىسى (جاعالاۋ اۋدانى, Binom ءبىلىم بەرۋ مەكەمەسى). 2021 جىلى سۋمەن جابدىقتاۋ, شارۋاشىلىق-تۇرمىستىق جانە جاڭبىر كارىزدەرىنىڭ ينجەنەرلىك جەلىلەرىن ورناتۋ جانە قامتاماسىز ەتۋ جۇمىستارى جۇرگىزىلدى. وسى جىلى جوبا اياسىندا كىرەبەرىس جولداردى اسفالتبەتون جابىنىمەن قامتاماسىز ەتۋ, اباتتاندىرۋ جانە كوشەلەردى جارىقتاندىرۋ بويىنشا قۇرىلىس-مونتاج جۇمىستارىن جۇرگىزۋ جوسپارلانۋدا. سونداي-اق كولىكتەردىڭ قاۋىپسىز قوزعالىسىن جانە كولىكتەردىڭ كەدەرگىسىز ءوتۋىن قامتاماسىز ەتۋ ماقساتىندا جاقىن ارادا جول بولىگىن ۋاقىتشا ينەرتتى ماتەريالمەن تولتىرۋ جۇمىستارى جۇرگىزىلەدى», دەدى اتالعان باسقارما وكىلدەرى.
ازاماتتاردىڭ ارىز-شاعىمىنىڭ ناتيجەسىندە جاعالاۋ اۋدانىنداعى Binom مەكتەبىنە ۋاقىتشا جاياۋ جۇرگىنشىلەر جولى توسەلدى. الايدا City Transportation Systems جشس ءباسپاسوز قىزمەتى مەكتەپكە باراتىن جولدىڭ قاناعاتتانارلىقسىز جاعدايىنا بايلانىستى №7, 61 اۆتوبۋستار «Binom» مەكتەبىنە ۋاقىتشا قاتىنامايتىنىن, «جاعالاۋ-4» ايالداماسىنان كەرى بۇرىلاتىنىن ايتتى.
قالاي بولعاندا دا, بالالاردىڭ الاڭسىز ءبىلىم الۋى ءۇشىن وسىنداي ولقىلىقتارعا جول بەرىلمەگەنى ءجون. «اۋىرىپ ەم ىزدەگەنشە, اۋىرمايتىن جول ىزدەسەك» بولماي ما؟! بۇرىن ء«بىلىم ينەمەن قۇدىق قازعانداي» دەۋشى ەدىك, ەندى ء«بىلىم بالتىردان بالشىق كەشكەندەي» دەپ جۇرمەيىك...