جۋىردا گازەتىمىزدە «شولاقسور تاعى سۋ استىندا قالۋى ىقتيمال» دەگەن تاقىرىپپەن ماقالا جاريالانعان ەدى. ءبىزدىڭ ماقساتىمىز – الدەكىمدى قارالاۋ ەمەس, اپاتتىڭ الدىن الۋ ءۇشىن دەر كەزىندە ارەكەت ەتۋگە شاقىرۋ بولاتىن. ايتىپ اۋىز جيعانشا بولعان جوق, وڭىردە ەرىگەن قاردىڭ سالدارىنان بىرنەشە ءۇي سۋ استىندا قالدى.
شولاقسور دەپ وتىرعانىمىز – اقتوعاي اۋدانى جالاۋلى اۋىلدىق وكرۋگىنىڭ قۇرامىنا كىرەتىن ەلدى مەكەن. قۇزىرلى ورگان ماماندارى اپاتتى سول جاقتان كۇتىپ, بار كۇشتى سوندا جۇمىلدىردى ما ەكەن, اتالعان اۋىلدىق وكرۋگكە قاراستى بالتاساپ اۋىلى نازاردان تىس قالعان سياقتى. وندا ەرىگەن قاردىڭ سۋى ءبىر ۇيگە كىرىپ, اشۋعا مىنگەن ءۇي يەسى بار جاعدايدى بەينەجازباعا ءتۇسىرىپ, الەۋمەتتىك جەلى ارقىلى مۇڭىن شاقتى. «كۇننىڭ كۇرت جىلىناتىنىن بىلمەي مە, تراكتور جىبەرمەي مە؟» دەپ كەيىدى ول. بۇل جايتتان حاباردار بولعان اۋىلدىق وكرۋگ اكىمى ازامات مەدەتوۆ ەلدى مەكەنگە بارىپ, ارنايى تەحنيكالار ارقىلى ءۇي اۋلاسىنا جينالعان قار سۋىن سورعىلاۋ جۇمىستارى جۇرگىزىلگەنىن مالىمدەدى. تۇرعىن ۇيلەرگە ەشقانداي قاۋىپ جوق ەكەنىنە سەندىردى. اۋدان اكىمى قارشىعا ارىنوۆ تا رەسمي جاۋابىن ۇسىندى.
– الەۋمەتتىك جەلى ارقىلى تاراعان بەينەجازباداعى وقيعانىڭ ورىن العانى راستالدى. كۇنى كەشە قۇزىرلى ورگان وكىلدەرىمەن بىرلەسىپ, جالاۋلى جانە جولبولدى اۋىلدىق وكرۋگتەرى اۋماعىنداعى سۋ باسۋ قاۋپى بار ەلدى مەكەندەردى ارالاپ شىقتىق. ناتيجەسىندە, بالتاساپ جانە شىلىكتى ەلدى مەكەندەرىندە ءۇي اۋلالارىن ەرىگەن قار سۋى باسۋ قاۋپى بار ەكەنى انىقتالدى. اتالعان اۋىلدارعا تەحنيكالار جونەلتىلىپ, تاۋلىك بويى اۋىسىم بويىنشا ءتيىستى جۇمىستار اتقارىلۋدا, – دەدى اۋدان باسشىسى.
نەگىزگى قاۋىپ كورشىلەس ورنالاسقان اقمولا وبلىسىنداعى سىلەتى سۋ قويماسىنان تونەتىنى جاسىرىن ەمەس. قويمادان سۋ بوساتىلعان ۋاقىتتا جايىلعان سۋ جالاۋلى اۋىلدىق وكرۋگىنىڭ اۋماعىنا دەيىن جەتىپ, جەرگىلىكتى تۇرعىنداردى قورقىنىشتا ۇستايتىنى راس. وسى ورايدا وبلىس اكىمىنىڭ ءبىرىنشى ورىنباسارى ولەگ كرۋك تا جەدەل جەتىپ, جاعدايدى ءجىتى نازارعا الدى. بۇگىندە سىلەتى وزەنىندە مۇزدى كەسۋ جۇمىستارى جالعاسۋدا.
ازىرگە اقتوعايلىقتاردىڭ ۇيقىسى تىنىش. ال پاۆلودار اۋدانى روجدەستۆەنكو اۋىلىنىڭ تۇرعىندارىنا ءۇش ۇيىقتاسا دا سۋدىڭ استىندا قالاتىندارى تۇسىنە كىرمەسە كەرەك. بۇرىن كوكتەمدە سۋ باسۋ قاۋپى بار ايماقتاردىڭ تىزىمىندە بولسا دا, كەيىنگى جىلدارى جاعداي تۇراقتى ەدى. مۇندا ەكى كۇندە 30 اۋلانى سۋ باسىپ, اباي كوشەسى 67 جانە 39/2 مەكەنجايىندا ورنالاسقان 2 ۇيگە سۋ كىرگەن. وبلىس اكىمى ابىلقايىر سقاقوۆ ءۇيى سۋدىڭ استىندا قالعان كوپبالالى وتباسىنىڭ ۇيىنە باردى. ءۇي جەردىڭ تومەنگى بولىگىندە ورنالاسقان ەكەن.
«بۇگىندە اۋىل تۇرعىندارى قاۋىپسىزدىكتە. سۋ باسقان ءۇيدىڭ وتباسىنا كومەك كورسەتىلىپ, كەلتىرىلگەن زالال وتەلەتىن بولادى. سۋ كولەمى تومەندەي باستادى, بارلىق قاجەتتى كۇشتەر مەن قۇرالدار جۇمىسقا قوسىلدى. قايتا سۋ باسۋ قاۋپى جوق», دەدى وبلىس اكىمى.
وسى جاعدايلاردان كەيىن وبلىستىق اكىمدىكتە سۋ تاسقىنى بويىنشا شۇعىل كەڭەس ءوتتى. بەلگىلى بولعانداي, اقسۋ اۋىلدىق ايماعىندا دا 15 ءۇيدى سۋ باسۋ قاۋپى ورىن العان. اسىرەسە بەرەكە اۋىلىنداعى جەتى اۋلانى سۋ باسۋ قاۋپى جوعارى بولىپ, قۇتقارۋشىلار مەن اكىمدىك قىزمەتكەرلەرى دەر كەزىندە قاۋىپتىڭ بەتىن قايتارىپتى. وبلىس ورتالىعىنداعى ساتپاەۆ, گاگارين, قامزين, اكادەميك شوكين, كرۋپسكايا, «كازپراۆدا» جانە ۆورۋشين كوشەلەرىندەگى جول ۋچاسكەلەرى سۋ استىندا قالىپ, كوممۋنالدىق قىزمەتتەر ەرىگەن قار سۋىن سورۋ جۇمىستارىن تولىقتاي اياقتاعان.
قازىر الەۋمەتتىك جەلىلەردە قالا جانە اۋدان اكىمدەرى بەلسەندى. سۋ باسۋ قاۋپى بار ايماقتاردا جۇرگەنىن جاريالاپ, جاعدايدىڭ تۇراقتى ەكەنىن ايتۋدا. دەسە دە, سوڭعى ءبىر-ەكى كۇندە بىرنەشە ءۇيدىڭ سۋ استىندا قالۋى ءالى دە بولسىن ساقتىق شارالارىن دۇرىس ۇيىمداستىرۋ كەرەك ەكەنىن ايقىنداپ بەردى. «قازگيدرومەت» كاسىپورنى ماماندارىمەن تىعىز بايلانىس ورناتىپ, اۋا رايىنىڭ كۇرت جىلىناتىنىنان حاباردار بولسا, وقىس وقيعالار ورىن الماس پا ەدى؟! نە دەسەك تە, مۇنى ەسكەرتۋ دەپ قابىلداعان ءجون. بوساڭسۋعا جول جوق!
پاۆلودار وبلىسى