ەلورداداعى № 2 كوپبەيىندى قالالىق اۋرۋحانانىڭ دارىگەرلەرى بوسانۋ كەزىندە وتە اۋىر حالدە بولعانىنا قاراماستان, پاتسيەنت ايناگۇل ورازبەكوۆانى ءساتتى بوساندىردى. وعان كوروناۆيرۋس جانە اۋىر دارەجەلى ەكىجاقتى ۆيرۋستىق پنەۆمونيا دياگنوزى قويىلعان ەدى. اۋىر جاعدايعا قاراماستان, ناۋقاس سالماعى 4 000 گرامم بولاتىن دەنى ساۋ قىز بالانى دۇنيەگە اكەلدى. بۇل قازىرگى زاماناۋي مەديتسينا قىزمەتىندەگى ءبىر مىسال عانا.
ء«بىزدىڭ اۋرۋحاناعا ناۋقاس ا.ورازبەكوۆا شۇعىل تۇردە وتە اۋىر جاعدايدا ەكىجاقتى ۆيرۋستىق پنەۆمونيامەن جانە وكپە ءتىنىنىڭ جالپى – 100% زاقىمدانۋىمەن ءتۇستى», دەدى №2 كوپبەيىندى قالالىق اۋرۋحانا ديرەكتورى نۇربول تۇرسىنباەۆ.
جانساقتاۋ بولىمشەسىندە انانىڭ ءومىرى ءۇشىن دارىگەرلەر ەكى اي كۇرەستى.
«بوسانعاننان كەيىن ناۋقاستىڭ جاعدايى ناشارلادى: ساتۋراتسياسى تومەن, تەمپەراتۋراسى جوعارى, وزدىگىنەن دەم الا المادى, ينتوكسيكاتسيا سيندرومى ساقتالدى. بىرنەشە رەت كونسيليۋم جۇرگىزىلدى, ناتيجەسىندە, پاتسيەنت ەكمو-عا (ەكستراكورپورالدى مەمبرانالىق وكسيگەناتسيا) قوسىلدى. 20 كۇن بويى وكسيگەناتسيا جانە گەموديافيلتراتسيا جۇرگىزىلدى», دەپ تولىقتىردى شۇعىل كارديولوگيا جانە كارديوحيرۋرگيا ورتالىعىنىڭ باسشىسى سەيىل مۇحامەتقاليەۆ.
ناۋقاس وتتەگى تەراپياسىنا قوسىلعانىنا قاراماستان, ونىڭ دەساتۋراتسياسى وزگەرمەدى. سوندىقتان كونسيليۋمنىڭ شەشىمى بويىنشا ناۋقاس ءوجج اپپاراتىنا اۋىستىرىلدى.
«ەكى اي بويى دارىگەرلەر مەن مەيىرگەرلەر ناۋقاستى ەمدەپ, بارىنشا كۇتتى. كوپ ۇزاماي اۋىر وتكەن وتانىڭ – جوعارى تەحنولوگيالىق مەديتسينالىق قىزمەتتىڭ ناتيجەسى ءبارىمىزدى قۋانتتى. 50 تاۋلىكتەن كەيىن پاتسيەنت رەانيماتسيادان بەيىندى بولىمشەگە اۋىستىرىلدى. ءبىزدىڭ اۋرۋحانا ماماندارىنىڭ كوماندالىق جۇمىسىنىڭ ارقاسىندا ناۋقاستىڭ جالپى جاعدايى جاقساردى, گەموديناميكاسى تۇراقتاندى, ەڭ باستىسى, ول ءوز بەتىنشە تىنىس الادى», دەدى ينفەكتسيالىق بلوكتىڭ مەڭگەرۋشىسى گۇلنۇر اشيربەكوۆا.
«ايناگۇل ءۇشىن تۋىسىمىزداي الاڭدادىق. ءبىزدى كۇيەۋىنىڭ دارىگەرلەرگە تولىق سەنىم ارتىپ, ءبارى جاقسى بولاتىنىنا نىق سەنگەنى شابىتتاندىردى», دەدى ەمدەۋشى دارىگەر, پۋلمونولوگ گۇلجان بايىربەكوۆا.
ايتا كەتەيىك, مەديتسينالىق قىزمەتتەر ءمامس جۇيەسىندە جۇرگىزىلدى. ساقتاندىرىلماعان ازامات ءۇشىن مۇنداي وتا مەن مەديتسينالىق كومەك 16 ملن تەڭگەنى قۇرار ەدى.
اۋرۋحانادان جازىلىپ شىققان ايناگۇل دارىگەرلەر مەن مەيىرگەرلەرگە, سانيتارلار مەن بارلىق قىزمەتكەرلەرگە العىسىن ايتتى:
«دارىگەرلەرگە, مەيىرگەرلەرگە, سانيتارلارعا جانە ارقتب جانە ينفەكتسيالىق بلوكتىڭ بارلىق قىزمەتكەرلەرىنە العىس ايتامىن. بارشاڭىزدىڭ الدارىڭىزدا باسىمدى ءيىپ, تاعزىم ەتەمىن. كورسەتىلگەن كومەك پەن كاسىبي بىلىكتىلىكتەرىڭىز ءۇشىن تاعى دا راحمەت. بۇل سوزدەردەن باسقا ەشتەڭە ايتا المايمىن, ريزامىن. تەز ءسابيىمدى قولىما العىم كەلەدى», دەدى ا.ورازبەكوۆا.