جۇرتشىلىقتى ءبىرازدان بەرى ەلەڭدەتىپ وتىرعان ەل پرەزيدەنتىنىڭ جولداۋى قوعامدىق-ساياسي ءومىرىمىزدىڭ اسا كۇردەلى ماسەلەلەرىنە ارنالعان باعدارلامالىق تاريحي قۇجات بولدى دەۋگە بولادى.
ءسوزىنىڭ القيسساسىن «قاڭتار قاسىرەتىنىڭ» سەبەپتەرى مەن سالدارىنا ارناعان مەملەكەت باسشىسى ءبىراز ءتۇيىندى ويلارىن ورتاعا سالدى. ودان ارعى ويلارىن وسى قاسىرەتتەن ساباق الا وتىرىپ, جاڭا قازاقستاندى قۇرۋداعى ساياسي رەفورمالاردىڭ تۇجىرىمدامالىق نەگىزدەمەلەرىن سالا-سالاعا ءبولىپ تاراتا ايتتى. بۇل رەفورمانىڭ جۇيەلى كەشەندى سيپاتتا جۇزەگە اسىرىلاتىنىن ەسكەرتتى. ەلىمىزدەگى باسقارۋ جۇيەسى پرەزيدەنتتىك بيلىككە شوعىرلانىپ قالعانىن تىلگە تيەك ەتە كەلىپ, بۇدان بىلاي «كۇشتى پرەزيدەنت – ىقپالدى پارلامەنت, ەسەپتى ۇكىمەت» دەگەن ءۇش تارماقتى بيلىك جۇيەسىنە جەدەل كوشۋ قاجەتتىگىن كورسەتتى. بۇل دەگەنىڭىز پرەزيدەنتتىك بيلىكتىڭ ءبىراز بولىگى پارلامەنت پەن ۇكىمەتكە بەرىلەتىندىگىن بىلدىرەدى. وكىلەتتى بيلىكتىڭ بارلىق ساتىسىنىڭ پارمەنى كۇشەيىپ, قوعامدىق ۇيىمدارمەن بايلانىس نىعايادى. ورتالىق بيلىكتىڭ ءبىراز قىزمەتى وڭىرلەرگە بەرىلە وتىرىپ, جەرگىلىكتى جەردىڭ بەلسەندىلىگىن ارتتىرۋعا دا باسا ءمان بەرىلەدى دەگەن ءسوز.
ارينە, جولداۋدان تالاي استارلى ويلاردى سۋىرتپاقتاۋعا بولادى. ەڭ باستىسى, وسى رەفورمالاردى دايىنداۋدا حالىق پەن قوعامدىق ينستيتۋتتاردىڭ ۇسىنىس-تىلەكتەرى بارىنشا ەسكەرىلگەندىگىن پرەزيدەنت اتاپ كورسەتتى. سونىڭ ناتيجەسىنەن بولار, جولداۋدا كورسەتىلگەن كوپتەگەن ناقتى ءىس جۇرتشىلىق كوڭىلىنەن شىققانىنا داۋ جوق سياقتى. ماسەلەن, وزىمىزگە ۇناعان ونىڭ بىرقاتار تۇجىرىمداماسى مىنالار: «پرەزيدەنت وكىلەتتىگىن بارىنشا شەكتەۋ», «پرەزيدەنتتىڭ ساياسي پارتيانى باسقارۋىن توقتاتۋ», «بيلىكتە وتىرعان پرەزيدەنتتىڭ تۋعان-تۋىسقاندارىنىڭ ساياسي بيلىككە ارالاسپاۋى, ءتىپتى كۆازيمەملەكەتتىك مەكەمەلەردى باسقارۋعا دا قاتىسپاۋى», «كاسىبي جانە ماجوريتارلى سايلاۋ جۇيەسىن ەنگىزۋ», ء«ماسليحاتتاردىڭ ءرولىن كوتەرۋ», «ساياسي پارتيالاردى تىركەۋدى جەڭىلدەتۋ», «سايلاۋ جۇيەسىن جەتىلدىرۋ», «ازاماتتىق قوعام ينستيتۋتتارى مەن باق وكىلدەرىنىڭ پارمەنىن ارتتىرۋ», «كونستيتۋتسيالىق كەڭەستىڭ كونستيتۋتسيالىق سوت بولىپ وزگەرۋى», «ۇلتتىق قۇرىلتاي» ينستيتۋتىن قۇرۋ», ت.ب وسىنداي تولىپ جاتقان جاقسى جاڭالىقتار بار. سولاردىڭ ىشىندە بارشانىڭ جۇرەگىنە جىلى تيگەن جاڭالىق اباي وبلىسى, جەتىسۋ وبلىسى, ۇلىتاۋ وبلىسى سياقتى تاريحي سانامىزعا تاڭبالانعان, قازاقى رۋحىمىزعا سەرپىن بەرەتىن كيەلى وڭىرلەردىڭ جاڭاشا وركەن جايۋى بولسا كەرەك. ءبىر سوزبەن ايتقاندا, مەملەكەت باسشىسىنىڭ بۇل جولداۋىنىڭ ءاربىر تاراۋى ارنايى اڭگىمە جاساي وتىرىپ سارالايتىن, ەل بولاشاعى ءۇشىن باعدارلامالىق ماڭىزى بار تاريحي قۇجات دەۋگە بولادى.
كەنجەحان ماتىجانوۆ,
م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى,
قازاقستاننىڭ ەڭبەك سىڭىرگەن قايراتكەرى