قازاقستان ەلشىسى بولات يمانباەۆ ارمەنيا پرەزيدەنتى ۆااگن حاچاتۋريانمەن كەزدەسىپ, پرەزيدەنت قاسىم-جومارت توقاەۆتىڭ «جاڭا قازاقستان: جاڭارۋ مەن جاڭعىرۋ جولى» اتتى جولداۋىنىڭ نەگىزگى قاعيدالارى تۋرالى حاباردار ەتتى, دەپ حابارلايدى Egemen.kz قر سىرتقى ىستەر مينيسترلىگىنە سىلتەمە جاساپ.
ءوز كەزەگىندە, ۆ.حاچاتۋريان قر پرەزيدەنتىنىڭ «جاڭا قازاقستاندى» قۇرۋ جونىندەگى باستامالارىن جوعارى باعالادى. ونىڭ ايتۋىنشا, ترانسفورماتسيالاۋ بويىنشا ۇسىنىلعان رەفورمالاردى ىسكە اسىرۋ ەلدى زاماناۋي جاھاندىق سىن-قاتەرلەر جاعدايىندا دامۋدىڭ جاڭا ساپالى دەڭگەيىنە كوتەرەدى. قازاقستان باسشىلىعىنىڭ ساياساتىنا قولداۋ بىلدىرە وتىرىپ, ەكونوميكاسى مىقتى الەۋمەتتىك مەملەكەت قۇرۋ جولىنداعى قازاقستاندىق تاجىريبە ارمەنيا ءۇشىن ماڭىزدى ەكەنىن حابارلادى.
سونىمەن قاتار, تاراپتار ساياسي, ساۋدا-ەكونوميكالىق جانە مادەني-گۋمانيتارلىق سالالارداعى قازاقستان-ارميان ىنتىماقتاستىعىن دامىتۋ ماسەلەلەرىن, 2022 جىلى وتەتىن حالىقارالىق ءىس-شارالار مەن جوعارى جانە اسا جوعارى دەڭگەيدەگى ەكىجاقتى كەزدەسۋلەردىڭ كەستەسىن تالقىلادى.
تاراپتار 2021 جىلدىڭ قورىتىندىسى بويىنشا 30 پايىزعا وسكەن ەكىجاقتى تاۋار اينالىمىنىڭ وڭ ديناميكاسىنا نازار اۋدارىپ, ىسكەرلىك بايلانىستاردى دامىتۋ جانە ورتاق ەكونوميكالىق جوبالاردى ىسكە اسىرۋ بويىنشا بىرلەسكەن كۇش-جىگەردى جالعاستىرۋدىڭ ماڭىزدىلىعىن اتاپ ءوتتى.
ارمەنيا پرەزيدەنتى ەلدەرىمىز اراسىنداعى ءوزارا ءتيىمدى قارىم-قاتىناستاردى ودان ءارى نىعايتۋعا دايىن ەكەنىن مالىمدەدى.