مونپەلەدە ونەر كورسەتەدى

قازىرگى كەزدە وسى سپورت تۇ­رى­نەن قاي مەملەكەتتىڭ قارقىنى كۇشتى ەكەنىن انىقتاۋ ءۇشىن تاريحتى قوپارماي-اق, سوڭعى 10-12 جىل شەڭبەرىندە وتكەن الەم چەمپيوناتتارىنىڭ ناتيجەلەرىنە زەر سالساق تا جەتكىلىكتى. سول ارا­لىق­تا تورتكۇل دۇنيەنىڭ ءار قيى­رىنان جينالعان مانەرلەپ سىر­عا­ناۋ­شىلاردىڭ قاتىسۋىمەن وتكەن ءدۇبىرلى دودانىڭ شى­مىل­دى­عى 11 مارتە ءتۇرىلدى. ەرلەر جايىندا ايتار بولساق, العاشىندا 2010 جىلى تۋريندە جاپونيالىق دايسۋكە تاحاكاسي توپ جاردى. 2014 جانە 2017 جىلدارى جاپونيانىڭ تاعى ءبىر جۇلدىزى يۋدزۋرۋ حانيۋعا تەڭ كەلەر ەشكىم تابىلمادى. سول ارالىقتا يسپانيالىق حاۆەر ەرناندەستىڭ دە جۇلدىزى جارقىراي جاندى. پيرەنەي تۇبەگىنىڭ تارلانى 2015 جىلى شانحاي مەن 2016 جىلى بوستوندا باس جۇلدەنى قانجىعاسىنا بايلادى. اقش-تا دۇنيەگە كەلىپ, سول ەلدىڭ تۋى استىندا ونەر كورسەتكەن قىتايلىق نەيتان چەننىڭ سوڭعى ءۇش جارىستا شوقتىعى بيىك بولدى. ول ميلان, سايتاما جانە ستوكگولمدە التىن تۇعىردان قول بۇلعادى. بىلتىر سكانديناۆيا تۇبەگىندە وتكەن باسەكەدە چەن تەڭدەسسىز دەپ تانىلسا, ەكىنشى جانە ءۇشىنشى ورىنداردى كۇن شىعىس ەلىنىڭ قوس قىرانى – يۋما كاگياما مەن يۋدزۋرۋ حانيۋ ءوزارا ءبولىستى.

ايەلدەر اراسىندا سوڭعى 11 الەم چەمپيوناتىنىڭ بەسەۋىندە رەسەي سپورتشىلارى قارسىلاس شاق كەلتىرمەدى. اتاپ ايتساق, 2015 جىلى ەليزاۆەتا توقتامىشەۆا, 2016 جانە 2017 جىلدارى ەۆگەنيا مەدۆەدەۆا, 2019 جىلى الينا زاگيتوۆا جانە 2021 جىلى اننا ششەرباكوۆا سىندى ارۋلار التىننان القا تاقتى. ءۇش رەت جاپون قىزدارى جەڭىمپاز اتاندى. ولار – ماو اسادا (2010, 2011 جىلدارى) مەن ميكي اندو (2014). سونداي-اق يتاليالىق كارولينا كوستنەر (2012), كورەيالىق كيم ەن ا (2013) جانە كانادالىق كەتلين وسموند (2018) ءبىر-ءبىر رەتتەن سونداي قۇرمەتكە بولەندى. بىلتىر ستوكگولمدە ۇيىمداستىرىلعان باسەكەدە جۇلدەلى ورىنداردىڭ بارلىعىن رەسەيلىكتەر يەلەندى: اننا ششەرباكوۆا – التىن, ەلي­زا­ۆەتا توقتامىشەۆا – كۇمىس جانە الەكساندرا ترۋسوۆا – قولا.

2010 جىلدان بەرگى ۋاقىتتا جۇپ­تىق سايىستا مىنا سپورت­شى­لاردىڭ مەرەيى ۇستەم بولدى: پان تسين/تۋن تسزيان (قىتاي. 2010), الەنا ساۆچەنكو/روبين شولكوۆى (گەرمانيا. 2011, 2012, 2014), تاتيانا ۆولوسوجار/ماكسيم تارانكوۆ (رەسەي. 2013), مەگان ديۋامەل/ەريك رەدفورد (كانادا, 2015, 2016), سۋي ۆەنتسزين/حان تسۋن (قىتاي. 2017, 2019), الەنا ساۆچەنكو/برۋنو ماسسو (گەرمانيا. 2018) جانە اناستاسيا ميشينا/الەكساندر گاللياموۆ (2021. رەسەي). ال سپورتتىق بيدەن وتكەن سايىس­تاردا باس جۇلدە مىنا ساڭلاقتارعا بۇيىردى: تەسسا ۆەرتيۋ/سكوت موير (كانادا. 2010, 2012, 2017), مەريل دەۆيس/ چارلز ۋايت (اقش. 2011, 2013), اننا كاپپەلليني/لۋكا لانوتتە (يتاليا. 2014), گابريەلا پاپاداكيس/گيوم سيزەرون (فرانتسيا. 2015, 2016, 2018, 2099) جانە ۆيكتوريا سينيتسينا/نيكيتا كاتسالاپوۆ (رەسەي, 2021).

قازاقستاننىڭ مانەرلەپ سىر­عا­ناۋشىلارى الەم چەمپيو­نات­تارىندا ءۇش رەت جەڭىس تۇعى­رى­نا كوتەرىلدى. 2013 جىلى لون­دون قالاسىندا اتاعى الىسقا جايىلعان پاتريك چاننان عانا قالىپ قويعان دەنيس تەن كۇمىس مەدالدى موينىنا ءىلدى. ءدال سول دەنيس 2015 جىلى قىتايدىڭ شانحاي شاھارىندا جالاۋى جەلبىرەگەن جارىستا حاۆەر ەرناندەس پەن يۋدزۋرۋ حانيۋدى العا جىبەرىپ, قولا جۇلدەنى يەلەندى. وسىدان ءۇش جىل بۇرىن جاپونيانىڭ سايتاماسىندا ەليزابەت تۇرسىنباەۆا كۇمىس مەدالدى ولجالاپ, كۇللى الاش جۇرتىن قۋانتتى. قازاق قىزى تەك وليمپيادا چەمپيونى الينا زاگيتوۆاعا عانا ەسە جىبەردى.

بۇل جولعى جارىسقا باس­تى فاۆوريتتەردىڭ ءبىرى – رەسەي قۇراماسى قاتىسپايدى. سەبەبى ۋكرايناداعى جاعدايعا بايلانىس­تى اتالعان مەملەكەتتىڭ وكىلدەرى كوپتەگەن سپورت تۇرلەرى بويىنشا وتەتىن حالىقارالىق جارىستاردان شەتتەتىلدى. رەسەيلىكتەرمەن قاتار بەلارۋس سپورتشىلارىنا دا ءدال سونداي قاتاڭ شارا قول­دا­نىلدى.

جالپى, مونپەلەدەگى باسە­كە­دە رەسەيدىڭ – 12, اقش-تىڭ – 11, جاپونيانىڭ – 8, كانادانىڭ – 7, يتاليانىڭ – 5, وڭتۇستىك كورەيانىڭ – 4, قىتايدىڭ – 3, بەلگيا, اۋستريا, ۇلىبريتانيا جانە فرانتسيانىڭ 2 سپورتشىسى باق سىناۋ قۇرمەتىنە بولەندى. سونداي-اق تاعى بىرنەشە مەملەكەتتە ءبىر-ءبىر جولدامادان بار. الايدا جوعارىدا ايتىلعان شەك­تەۋگە بايلانىستى رەسەي مەن بەلارۋس قۇرامالارىنىڭ ورنىن باسقا ەلدىڭ ورەندەرى باس­تى. دەسەك تە, ودان جارىستىڭ قىزىعى ەش كەمىپ قالمايدى دەگەن ويدامىز. ويتكەنى ادەمىلىك پەن اسەمدىككە نەگىزدەلگەن سپورت­تىڭ بۇل تۇرىندە جاسىنداي جار­قىلداپ جۇرگەن جۇلدىزدار جەتىپ ارتىلادى.