مۇز جارۋ جۇمىستارى باستالدى

بۇگىنگە دەيىن سۋ تاسقىنى كەزەڭىنە دايىندىق بارىسىندا وبلىستاعى 6 ءىرى جانە 50 شاعىن ەلدى مەكەننىڭ اينالاسىنا بوگەتتەر ورناتىلىپ, سۋ ارنالارىن ارشۋ جۇمىستارى جۇرگىزىلدى. الايدا توتەنشە جاعداي قىزمەتكەرلەرى 34 اۋىلعا ءالى دە قى­زىل سۋدان قاۋىپ ءتونىپ تۇرعانىن ايتتى. قازىر بۇل ەلدى مەكەندەر قۇتقارۋ­شىلاردىڭ ءجىتى باقىلاۋىنا الىنىپ, قاۋىپ دەڭگەيىن انىقتايتىن كۇندەلىكتى مونيتورينگ جۇمىستارى جۇرگىزىلۋدە.

بۇگىندە قالالىق جانە اۋداندىق اكىم­دىكتەر 9 مىڭ توننادان استام ينەرتتى ماتەريالدار مەن 46 مىڭنىڭ ۇستىندە قۇم قاپتارىن دايىنداپ قوي­عان. وعان قوسا 135 مىڭ توننادان اس­تام جانارماي قورى ساقتاۋلى تۇر. سۋ باسىپ قالۋى ىقتيمال ەلدى مەكەندەرگە ازىق-ت ۇلىك جەتكىزۋ ماسە­لەسى دە الدىن الا پىسىقتالىپ, شەشىلىپ قويعان.

سۋ تاسقىنىنان كەلەتىن قاۋىپتىڭ بەتى قايتقانشا وبلىستا توتەنشە جاع­داي قىزمەتى مەن بارلىق ازاماتتىق قور­عانىس قىزمەتتەردىڭ اپاتقا قارسى بىرلەس­كەن شتابى جۇمىس ىستەيتىن بولادى.

– بۇگىنگە دەيىن سۋ باسىپ قا­لۋى مۇمكىن ەلدى مەكەندەردىڭ تۇرعىن­دارىن ۋاقىتشا ورنالاستىراتىن 195 پۋنكت انىقتالدى. بۇل ورىندارعا شا­ما­مەن 11 مىڭنان استام ادامدى ورنالاستىرۋعا بولادى. وبلىس اۋ­ماعىن اۋەدەن, عارىشتان بارلاۋ جۇمىستارىن جۇرگىزۋ ءۇشىن ارنايى كەلىسىمشارتتار جاسالدى. سونىمەن قاتار 20 بوگەتكە, 3 قورعانىس ۆالىنا ينجەنەرلىك جوندەۋ جۇمىستارى جۇرگىزىلىپ, ۇزىندىعى 8 شاقىرىم بولاتىن ارىقتاردىڭ ەرنەۋى كەڭەي­تىلىپ, ءتۇبى تەرەڭدەتىلدى. مۇنىڭ سىرتىندا, ۇزىندىعى 10 شاقىرىمنان اساتىن سۋ وتكىزگىش قۇرىلعىلار مەن قالالىق كارىز جەلىلەرى قوقىستان تازارتىلدى, – دەدى وبلىستىق تجد باستىعى, ازاماتتىق قورعانىس پولكوۆ­نيگى ب.كارىموۆ.

تجد باستىعىنىڭ ايتۋىنشا, قىزىل سۋدىڭ استىندا قالۋ قاۋپى بار ەلدى مەكەندەردىڭ اۋماعىنان 630 مىڭ تەكشە مەتر قار شىعارىلعان. بۇل جۇمىستار ءالى دە قىزىپ جاتىر. ال جەرگىلىكتى اكىمدىكتەر مەن تج قىزمەتى كوكتەمگى سۋ تاسقىنى كەزەڭىندەگى كولدەنەڭ شىعىندارعا 629 ملن تەڭگە قارجى قاراستىرىپ قويعان.

وبلىستا كوكتەمگى سۋ تاسقىنى بولا قالعان جاعدايدا قاۋىپتىڭ الدىن توسۋ جۇمىستارىنا 1 070 تەحنيكا, 272 موتو­سورعىش قۇرىلعى, 114 قايىق جانە 2,5 مىڭنان استام ادام جۇمىلدىرىلماق.

قازىردىڭ وزىندە سۋ ارناسىن اشۋ ءۇشىن 7 اۋداننىڭ اۋماعىنداعى وزەن­دەردە مۇز جارۋ جۇمىستارى ءجۇ­رىپ جاتىر. سەڭ قوزعالعانشا جۇرە­تىن مۇنداي شارالار تاسقىننان تونە­تىن قاۋىپتى ازايتادى. مىسالى, مۇز جارۋمەن اينالىساتىن NIKSIT سەرىكتەستىگىنىڭ ماماندارى مەرەكە كۇندەرى ناۋىرزىم اۋدانىنداعى ءدامدى وزەنى مەن شولاقساي اۋىلىنىڭ ماڭىنداعى بوگەتتە جارىلىس جۇرگىزدى. سونداي-اق جارۋشىلار جاساعى قاراسۋ اۋدانى قارامىرزا اۋىلىنىڭ ماڭىنداعى ءتىنتۋىر وزەنى مەن قاراسۋ وزەنىندەگى مۇز كەپتەلىسىن جويدى.

مۇز جارۋ جۇمىستارى قاراسۋ اۋدانىنا قاراستى نوۆوسەلوۆ اۋىلىنان 3 شاقىرىم جەردەگى قۇندىزدى وزەنىندە, قاراسۋ اۋىلىنىڭ ماڭىندا, ناۋىرزىم اۋدانىنداعى بۋرەۆەستنيك اۋىلىنا جاقىن جاتقان بوگەتتەردە, اۋليەكول اۋدانى كوكتال اۋىلىنىڭ ماڭىنداعى تەرەكتى وزەنىنىڭ ساعاسىندا ءجۇرىپ جاتىر.

– مۇزدىڭ ورتاشا قالىڭدىعى 1 مەتر­دەن اسادى. مۇز جارۋ جۇمىستارىمەن توتەنشە جاعداي قىزمەتكەرلەرى, پوليتسەيلەر مەن جەرگىلىكتى اتقارۋشى ورگانداردىڭ وكىلدەرى جانە NIKSIT سەرىكتەستىگىنىڭ ماماندارى اينالىسىپ جاتىر. جارىلىس كەزىندە بارلىق قاۋىپسىزدىك شارالارى ەسكەرىلەدى, – دەپ مالىمدەدى وبلىستىق تجد-نىڭ قوعاممەن بايلانىس توبى.

قوستاناي وبلىسى